'അമ്മ ഉറങ്ങുകയാണെന്ന് കരുതി'; മൃതദേഹത്തിനരികെ പെൺകുട്ടികൾ കഴിഞ്ഞത് ദിവസങ്ങളോളം

വടക്കുപടിഞ്ഞാറൻ ഫ്രാൻസിലെ ഒരു വീട്ടിലാണ് ദാരുണ സംഭവം നടന്നത്. അമ്മ മരിച്ചെങ്കിലും സംഭവിച്ചതെന്തെന്ന് അറിയാതെ അഞ്ചും ഏഴും വയസുള്ള രണ്ട് കുട്ടികൾ മൃതദേഹത്തിന് സമീപം ദിവസങ്ങളോളം കഴിയുകയായിരുന്നെന്നാണ് പ്രാദേശിക പ്രോസിക്യൂട്ടറെ ഉദ്ധരിച്ച് വാർത്താ ഏജൻസിയായ എഎഫ്പി റിപ്പോർട്ട് ചെയ്യുന്നത്. ദിവസങ്ങളോളം കുട്ടികളുടെ യാതൊരു വിവരവും ലഭിക്കാതെ വന്നതോടെ സ്കൂൾ അധികൃതർ പോലീസിനെ വിവരം അറിയിച്ചതോടെയാണ് സംഭവം പുറത്തറിയുന്നത്.

ദിവസങ്ങളോളം കുട്ടികള്‍ സ്‌കൂളില്‍ എത്താതിരിക്കുകയും യാതൊരു വിവരവും ലഭിക്കാതിരിക്കുകയും ചെയ്തതോടെ സ്‌കൂള്‍ അധികൃതര്‍ അറിയിച്ചതിനെ തുടര്‍ന്നാണ് പോലീസ് അപ്പാർട്മെന്‍റിൽ പരിശോധനയ്ക്ക് എത്തിയത്. 'മിണ്ടല്ലേ.. മമ്മി ഉറങ്ങുകയാണ്' എന്നായിരുന്നു പരിശോധനയ്ക്ക് എത്തിയ ഉദ്യോഗസ്ഥരോട് കുട്ടികൾ പറഞ്ഞതെന്നാണ് പ്രോസിക്യൂട്ടർ പറയുന്നത്.

അപ്പാർട്മെന്‍റിൽ നടത്തിയ പരിശോധനയിൽ 31കാരിയായ യുവതി മരിച്ച് കിടക്കുന്നതാണ് അധികൃതർ കണ്ടത്. ഐവറി കോസ്റ്റ് സ്വദേശിയായ യുവതിയുടേത് സ്വാഭാവിക മരണമാണെന്നാണ് അധികൃതർ പറയുന്നത്. പോസ്റ്റ്മോർട്ടം റിപ്പോർട്ട് ലഭിച്ചതായും ഉദ്യോഗസ്ഥർ വ്യക്തമാക്കുന്നു. ലെ മാൻസ് നഗരത്തിലെ വീട്ടിലാണ് നാടിനെ നടുക്കിയ ഈ സംഭവങ്ങൾ നടന്നത്.

ദിവസങ്ങളോളം അമ്മയുടെ മൃതദേഹത്തിനു സമീപം യാഥാര്‍ഥ്യമറിയാതെ കഴിഞ്ഞ കുട്ടികളെ ഇവിടെ നിന്ന് മാറ്റിയ ഉദ്യോഗസ്ഥർ അവരെ പരിശോധനയ്ക്കായി ആശുപത്രിയിലേക്ക് കൊണ്ടുപോവുകയും ഇരുവരെയും കൗണ്‍സിലിങ്ങിന് വിധേയരാക്കുകയും ചെയ്തു. അതേസമയം കുട്ടികൾ എത്രദിവസമാണ് അമ്മയുടെ മൃതദേഹത്തിനൊപ്പം കഴിഞ്ഞതെന്ന് വ്യക്തമായിട്ടില്ല. കുറച്ചുദിവസങ്ങൾ കൂടി കഴിഞ്ഞശേഷം കുട്ടികളിൽ നിന്ന് മൊഴി രേഖപ്പെടുത്തുമെന്ന് പ്രോസിക്യൂട്ടർ വ്യക്തമാക്കി.