ചൈനയിലേയ്ക്ക് മടക്കയാത്രയില്ല; ഇന്ത്യൻ വിദ്യാർഥികളുടെ ഭാവി പെരുവഴിയിൽ; ആശങ്ക

ന്യൂഡൽഹി: കൊവിഡ് 19 പ്രതിസന്ധിയെത്തുടര്‍ന്ന് ചൈനയിൽ നിന്ന് രാജ്യത്ത് തിരിച്ചെത്തിയ ഇന്ത്യൻ വിദ്യാര്‍ഥികളുടെ ഭാവി അനിശ്ചിതത്വത്തിൽ. ചൈനയിലേയ്ക്ക് വിദ്യാര്‍ഥികളെ മടക്കിയയ്ക്കുന്ന കാര്യത്തിൽ ചൈനീസ് സര്‍ക്കാരിൽ നിന്ന് അനുകൂല നടപടി ഉണ്ടാകാത്ത സാഹചര്യത്തിൽ ഇന്ത്യൻ വിദ്യാര്‍ഥികളുടെ പഠനം തുടരുന്ന കാര്യത്തിൽ വ്യക്തതയില്ല. ഇന്ത്യയിൽ നിന്ന് ചാര്‍ട്ടേഡ് വിമാനങ്ങള്‍ അനുവദിക്കുന്നതിനെതിരെയുള്ള ചൈനയുടെ നിലപാടാണ് പ്രതിസന്ധി സൃഷ്ടിക്കുന്നത്.

വിദ്യാര്‍ഥികളുടെ പ്രശ്നം ചൈനീസ് അധികൃതരുമായി ചര്‍ച്ച ചെയ്യുന്നത് തുടരുകയാണെന്നും എന്നാൽ ഇതുവരെ അനുകൂല നീക്കങ്ങള്‍ ഉണ്ടായിട്ടില്ലെന്നും ചൈനയിലെ ഇന്ത്യൻ എംബസി അറിയിച്ചു. ഇന്ത്യയും ചൈനയും തമ്മിൽ ചാര്‍ട്ടേഡ് വിമാനങ്ങള്‍ സര്‍വീസ് നടത്തുന്നത് ചൈന വിലക്കിയതായാണ് ഇന്ത്യൻ എംബസിയെ ഉദ്ധരിച്ചുള്ള എഎൻഐ റിപ്പോര്‍ട്ട്. വിഷയത്തിൽ വിശദമായ വാര്‍ത്താക്കുറിപ്പും എംബസി പുറത്തിറക്കിയിട്ടുണ്ട്.

Also Read: കുണ്ടന്നൂർ മേൽപാലം തുറന്നു; 3 കോടിയിലധികം പണം പൊതുമരാമത്ത് വകുപ്പ് തിരികെ നൽകിയതായി മുഖ്യമന്ത്രി, ചിത്രങ്ങൾ കാണാം

ബീജിങിലെ ഇന്ത്യൻ എംബസി ചൈനീസ് അധികൃതരുമായി ചര്‍ച്ച നടത്തി വരികയാണെന്നും എന്നാൽ ഇതുവരെ ശുഭസൂചകമായ തീരുമാനങ്ങള്‍ ഉണ്ടാകാത്ത സാഹചര്യത്തിൽ വിദ്യാര്‍ഥികള്‍ ഇന്ത്യൻ എംബസിയുടെയും സര്‍വകലാശാലകളുടെയും ഇന്ത്യയിലെ ചൈനീസ് കോൺസുലേറ്റുകളുടെയും വെബ്സൈറ്റുകളും സോഷ്യൽ മീഡിയ ഹാൻഡിലുകളും ശ്രദ്ധിക്കണമെന്നും എംബസി അറിയിച്ചു.

Also Read: അതിർത്തി കടന്നെത്തിയ ചൈനീസ് സൈനികൻ പിടിയിൽ; സംഭവം കിഴക്കൻ ലഡാഖിൽ

ചൈനയിൽ വീണ്ടും കൊവിഡ് കേസുകള്‍ കുതിച്ചുയരുന്ന സാഹചര്യത്തിൽ ചൈനയിൽ യാത്രാനിയന്ത്രണങ്ങള്‍ കര്‍ശനമാക്കിയിരിക്കുകയാണ്. ആഭ്യന്തരയാത്രകള്‍ക്കും ചൈനയിലേയ്ക്ക് മറ്റു രാജ്യങ്ങളിൽ നിന്നുള്ള യാത്രയ്ക്കും നിരോധനമുണ്ട്. ഈ സാഹചര്യത്തിൽ ഇന്ത്യൻ വിദ്യാര്‍ഥികളുടേത് അടക്കമുള്ള സ്റ്റുഡൻ്റ് വിസകളും ചൈന റദ്ദാക്കിയിരുന്നു. ഉടനെയൊന്നും ഈ നിയന്ത്രണങ്ങള്‍ നീക്കാൻ സാധ്യതയില്ലാത്തതിനാൽ അടുത്ത സെമസ്റ്ററിനായി തയ്യാറെടുക്കാനാണ് ചൈനീസ് സര്‍വകലാശാലകള്‍ വിദ്യാര്‍ഥികള്‍ക്ക് നല്‍കിയിരിക്കുന്ന നിര്‍ദേശം. എന്നാൽ ഓൺലൈൻ ക്ലാസുകള്‍ നടത്താൻ ബുദ്ധിമുട്ടുള്ള മെഡിക്കൽ വിദ്യാര്‍ഥികളോട് പഠനത്തിന് മറ്റു മാര്‍ഗങ്ങള്‍ തേടാനും നിര്‍ദേശിച്ചിട്ടുണ്ട്.