ലോകാരോഗ്യ സംഘടനയുമായി ബന്ധം ശക്തിപ്പെടുത്തും
കൊവിഡ്-19 വ്യാപനത്തിന് പിന്നാലെയാണ് അമേരിക്കയും ലോകാരോഗ്യ സംഘടനയും തമ്മിലുള്ള ബന്ധത്തിന് വിള്ളൽ വീണത്. ലോകാരോഗ്യ സംഘടനയ്‌ക്കുള്ള സാമ്പത്തിക സഹായം നിർത്തലാക്കിയ ട്രംപിൻ്റെ നടപടി ഞെട്ടിക്കുന്നതായിരുന്നു. വൈറസ് വ്യാപനത്തിൻ്റെ പേരിൽ ചൈനയെ കുറ്റപ്പെടുത്തിയതിനൊപ്പം രൂക്ഷമായ ഭാഷയിലാണ് ലോകാരോഗ്യ സംഘടനയെ ട്രംപ് വിമർശിച്ചത്. ഇതോടെയാണ് ബന്ധം കൂടുതൽ വഷളായത്. ലോകാരോഗ്യ സംഘടനയുമായി തകർന്ന ബന്ധം പുനഃസ്ഥാപിക്കുകയാകും ബൈഡൻ്റെ പ്രധാന ലക്ഷ്യം.
ജനങ്ങൾക്ക് സാമ്പത്തിക സഹായം
കൊവിഡ് പ്രതിസന്ധി രൂക്ഷമായ രാജ്യത്തെ ഉത്തേജിപ്പിക്കാനുള്ള വൻ പ്രഖ്യാപനങ്ങൾ ബൈഡൻ്റെ ഭാഗത്ത് നിന്നും ഉണ്ടാകും. എതിർപ്പ് ശക്തമായ കുടിയൊഴിപ്പിക്കൽ, അടച്ച് പൂട്ടൽ പോലെയുള്ള നടപടികൾ വൈകിപ്പിക്കാൻ മാർച്ച് 31വരെ എങ്കിലും മൊറൊട്ടേറിയം പ്രഖ്യാപിക്കാൻ ഫെഡറൽ ഏജൻസികളോട് ബൈഡൻ ആവശ്യപ്പെടുമെന്നാണ് വിദേശ മാധ്യമങ്ങൾ റിപ്പോർട്ട് ചെയ്യുന്നത്. ഹൗസിങ് പേയ്‌മെൻ്റ് ബുദ്ധിമുട്ട് നേരിടുന്നവരെ സഹായിക്കാൻ 1.9 ട്രില്യൺ ദുരിതാശ്വാസ ഫണ്ടായി അനുവദിക്കുന്നതിന് കോൺഗ്രസിന് മുന്നിൽ ബൈഡൻ ആവശ്യം ഉന്നയിക്കും. വിദ്യാർഥികളുടെ വിദ്യാഭ്യാസ ലോൺ തിരിച്ചടവ് സെപ്‌റ്റം 30വരെ നിർത്തിവെക്കാനുള്ള നീക്കവും ഉണ്ടാകും.
കാലാവസ്ഥ ഉടമ്പടിയും വിവാദ മതിൽ പണിയും
ട്രംപ് സർക്കാരിനെ വിവാദങ്ങളിൽ നിറച്ച പ്രഖ്യാപനങ്ങളിൽ ഒന്നായിരുന്നു അമേരിക്ക - മെക്‌സിക്കോ അതിർത്തിയിൽ മതി പണിയാനുള്ള തീരുമാനം. കുടിയേറ്റം നിയന്ത്രിക്കുന്നതിനും തടയുന്നതിനുമുള്ള തീരുമാനമെന്ന് വ്യക്തമാക്കിയാണ് ഈ തീരുമാനത്തിലേക്ക് ട്രംപ് എത്തിയത്. എന്നാൽ അമേരിക്ക പോലെയൊരു രാജ്യം ഇത്തരമൊരു നീക്കം നടത്താൻ പാടില്ലെന്ന വിമർശനമാണ് ഉയർന്നത്. ബൈഡൻ പ്രസിഡൻ്റ് സ്ഥാനത്തേക്ക് എത്തിയ സാഹചര്യത്തിൽ മതിൽ പണിയാനുള്ള സാമ്പത്തിക സഹായം ബൈഡൻ നിർത്തിവച്ചേക്കും. കാലാവസ്ഥാ വ്യതിയാനത്തെ ചെറുക്കാനുള്ള ആഗോള ശ്രമങ്ങളുടെ ഭാഗമായി പാരീസ് ഉച്ചകോടിയുമായി അമേരിക്ക വീണ്ടും സഹകരിക്കും.
യാത്ര വിലക്ക് നീങ്ങുമോ?
വിവിധ രാജ്യങ്ങളിൽ നിന്നുള്ളവർക്ക് ട്രംപ് ഏർപ്പെടുത്തിയിരിക്കുന്ന യാത്ര വിലക്ക് ബൈഡൻ നീക്കുമെന്നാണ് പുറത്തുവരുന്ന റിപ്പോർട്ട്. തീവ്രവാദ ഭീഷണി ഒഴിവാക്കാൻ എന്ന പേരിലാണ് പശ്ചിമേഷ്യയിലെ ചില മുസ്ലീം രാജ്യങ്ങള്‍, മുസ്ലീം ഭൂരിപക്ഷമുള്ള ചില ഏഷ്യന്‍, ആഫ്രിക്കന്‍ രാജ്യങ്ങള്‍ എന്നിവിടങ്ങളില്‍ നിന്നുള്ള പൗരന്‍മാര്‍ക്ക് അമേരിക്കയിലേക്ക് ട്രംപ് യാത്ര വിലക്കേർപ്പെടുത്തിയത്. ഈ വിലക്ക് ബൈഡൻ നീക്കുമെന്നാണ് മാധ്യമ റിപ്പോർട്ട്.
കൊവിഡ് പ്രതിരോധം ശക്തമാക്കും
ലോകത്ത് ഏറ്റവുമധികം കൊവിഡ് കേസുകൾ റിപ്പോർട്ട് ചെയ്‌ത അമേരിക്കയിൽ സുരക്ഷാ മാർഗനിർദേശങ്ങൾ ബൈഡൻ ശക്തിപ്പെടുത്തും. കൊവിഡ് വാക്‌സിൻ വിതരണം ശക്തിപ്പെടുത്താൻ പ്രത്യേക പദ്ധതികൾ ആസൂത്രണം ചെയ്യും. മാസ്‌ക് അടക്കമുള്ള കൊവിഡ് പ്രതിരോധ പ്രവർത്തനങ്ങൾ കൂടുതൽ ശക്തിപ്പെടുത്തും. രാജ്യത്തെ ഫെഡറൽ ഓഫീസുകളിലെല്ലാം മാസ്‌ക് നിർബന്ധമാക്കും. ഇതിനായി പ്രത്യേക ക്യാമ്പയിൻ നടത്താനും തീരുമാനമുണ്ട്.
ബൈഡൻ എത്തുമ്പോൾ ഇന്ത്യക്ക് നേട്ടമോ?
ലോക വേദികളിൽ അമേരിക്ക അനുകൂലമായ തീരുമാനങ്ങൾ സ്വീകരിക്കുമോ എന്ന ആശങ്കയാണ് ഇന്ത്യക്കുള്ളത്. ഇന്ത്യയുമായുള്ള പ്രതിരോധ സഹകരണം തുടരുമെന്ന് അമേരിക്ക വ്യക്തമാക്കി കഴിഞ്ഞു. ബൈഡനുമായി പ്രധാനമന്ത്രി നരേന്ദ്ര മോദി സംസാരിച്ചിരുന്നു. എന്നാൽ ഇതുവരെയുള്ള നയങ്ങളിൽ ബൈഡൻ നിലപാട് വ്യക്തമാക്കിയിട്ടില്ല. സഖ്യ കക്ഷികളെ ഒപ്പം നിർത്തി ചൈനയ്‌ക്കെതിരെ നയം സ്വീകരിക്കുമെന്ന ബൈഡൻ്റ് പ്രഖ്യാപനം ഇന്ത്യക്ക് ആശ്വാസം പകരുന്നുണ്ട്. എന്നാൽ പാകിസ്ഥാൻ വിഷയത്തിൽ അദ്ദേഹം നിലപാട് വ്യക്തമാക്കാത്തത് ഇന്ത്യയെ സമ്മർദ്ദത്തിലാഴ്‌ത്തുന്നുണ്ട്. ഇന്ത്യക്കാരെ ബാധിക്കുന്ന എച്ച്1ബി വിസയുടെ കാര്യത്തിൽ ബൈഡൻ നിർണായക പ്രഖ്യാനം നടത്തുമെന്നാണ് പ്രതീക്ഷ.