മക്കാഫി സ്ഥാപകൻ ജോൺ മക്കാഫിയെ ജയിലിൽ മരിച്ച നിലയിൽ കണ്ടെത്തി; അടുത്തത് അസാൻ‍ജെ എന്ന് എഡ്വേഡ് സ്നോഡൻ

നാലുവർഷമായി നികുതി സമർപ്പിക്കുന്നതിൽ പരാജയപ്പെട്ടുവെന്ന് കാണിച്ചാണ് 75 കാരനായ മക്അഫിയെ അറസ്റ്റ് ചെയ്തത്. പിന്നീട്, 2020 ഒക്ടോബര്‍ ആറിന് സ്പെയിനിലെ ജയിലിലേക്ക് മാറ്റിയിരുന്നു. ബാഴ്സലോണ എയര്‍പോര്‍ട്ടിൽ നിന്നുമാണ് ഇയാളെ അറസ്റ്റ് ചെയ്തത്. റിയൽ എസ്റ്റേറ്റ്, ഒരു യാർഡ് എന്നിവ ഉൾപ്പെടുന്ന സുപ്രധാന സ്വത്തുക്കൾ അദ്ദേഹം മറച്ചുവെന്ന ആരോപണം നേരിട്ടുവരികയാണ്.

75 കാരനായ മക്കാഫി സെല്ലിൽ ആത്മഹത്യ ചെയ്തുവെന്നാണ് സ്പാനിഷ് മാധ്യമങ്ങൾ റിപ്പോര്‍ട്ട് ചെയ്തത്. സ്പാനിഷ് പത്രമായ ലാ വാൻഗാർഡ് റിപ്പോര്‍ട്ട് ചെയ്തത്. അദ്ദേഹത്തെ പാർപ്പിച്ചിരുന്ന കാറ്റലോണിയയിലെ പ്രാദേശിക നീതിന്യായ വകുപ്പിന്റെ പ്രസ്താവന ഉദ്ധരിച്ചാണ് വാര്‍ത്ത നൽകിയിരിക്കുന്നത്.

അതേസമയം, ജോൺ മക്കാഫിയുടെ മരണത്തിൽ ദുരൂഹത ഉയരുന്നുണ്ട്. ഇത്തരത്തിൽ നിരവധി ആരോപണങ്ങളും വിവിധ കോണുകളില്‍ നിന്നും ഉയര്‍ന്നു വരിയാണ്. എഡ്വേഡ് സ്നോഡൻ ഇത് സംബന്ധിച്ച് നടത്തിയ ട്വീറ്റും ചര്‍ച്ചയായിട്ടുണ്ട്. ഇത്തരത്തിൽ മരിക്കുന്ന അടുത്തയാൾ ജൂലിയൻ അസാൻ‍ജെയാകുമെന്ന് എഡ്വേഡ് സ്നോഡൻ ട്വീറ്റ് ചെയ്തു.

വിക്കീലീക്സ് സ്ഥാപകനായ ജൂലിയൻ അസാൻ‍ജെ 2019 ഏപ്രിലിൽ ആണ് യുകെയിൽ നിന്നും അറസ്റ്റിലായത്. 18 ഓളം കേസുകള്‍ ചുമത്തിയാണ് ഇദ്ദേഹത്തെ അറസ്റ്റ് ചെയ്തിരിക്കുന്നത്. പിന്നീട്, 2021 ജനുവരിയിൽ യുഎസിലേക്ക് കൈമാറുന്നത് യുകെ കോടതി താൽക്കാലികമായി തടയുകയും ചെയ്തു.