വിമാനം പലചരക്കുകടയെക്കാള്‍ സുരക്ഷിതം
വിമാനത്തിനുള്ളിൽ മറ്റു പല കേന്ദ്രങ്ങളെ അപേക്ഷിച്ച് കൊവിഡ് 19 ബാധയേൽക്കാനുള്ള സാധ്യത കുറവാണെന്നാണ് ഗവേഷകര്‍ കണ്ടെത്തിയത്. വിമാനത്തെക്കാളും കൊവിഡ് 19 ബാധയ്ക്കുള്ള സാഹചര്യമുള്ളത് ഭക്ഷണശാലയിലും പലചരക്കുകടയിലുമാണെന്നാണ് ഗവേഷകര്‍ കണ്ടെത്തിയത്. ശരിയായ രീതിയിൽ എല്ലാവരും മാസ്ക് ധരിച്ചിട്ടുണ്ടെങ്കിൽ തൊട്ടടുത്ത സീറ്റിൽ ഇരിക്കുന്ന ആളിൽ നിന്ന് സെക്കൻഡറി കൊവിഡ് 19 ബാധയേൽക്കാനുള്ള സാധ്യത കുറവാണെന്ന് ഗവേഷകര്‍ കണ്ടെത്തി.
പ്രതിരോധ മാര്‍ഗങ്ങള്‍ സ്വീകരിക്കണം
മാസ്കും സാമൂഹിക അകലവും ഉള്‍പ്പെടെയുള്ള മാര്‍ഗങ്ങള്‍ ഉപയോഗിച്ച് കൊവിഡ് 19 നിയന്ത്രിക്കേണ്ടതിൻ്റെ ആവശ്യകതയിലേയ്ക്ക് വിരൽ ചൂണ്ടുന്നതാണ് പുതിയ പഠനം. യാത്രക്കാര്‍ തമ്മിലുള്ള സാമൂഹിക അകലം ഉറപ്പാക്കുന്നതും വിമാനത്താവളത്തിലും വിമാനത്തിനുള്ളിലുമുള്ള പ്രതലങ്ങള്‍ വൃത്തിയാക്കുന്നതും മാസ്കും ഫേസ് ഷീൽഡും നിര്‍ബന്ധമാക്കുന്നതും ഉള്‍പ്പെടെയുള്ള നടപടികളാണ് വിമാനത്തിനുള്ളിൽ രോഗബാധയ്ക്കുള്ള സാധ്യത കുറയ്ക്കുന്നതെന്നുമാണ് ഗവേഷകര്‍ പറയുന്നത്. ഏതെങ്കിലും ഒരു പ്രതിരോധസംവിധാനത്തിൻ്റെ മികവിനെക്കാള്‍ ഉപരി വിവിധ മാര്‍ഗങ്ങളുടെ ഉപയോഗം എങ്ങനെ രോഗനിയന്ത്രണത്തിന് സഹായിക്കുന്നുവെന്നാണ് കണ്ടെത്തിയത്.
ഗുണം വിമാനത്തിനുള്ളിലെ വെൻ്റിലേഷൻ്റേതും
അതേസമയം, കെട്ടിടങ്ങള്‍ക്കുള്ളിലെ സാഹചര്യത്തെ അപേക്ഷിച്ച് വിമാനത്തിനുള്ളിൽ വൈറസുകള്‍ ഉള്‍പ്പെടെയുള്ളവയെ പുറന്തള്ളാൻ മെച്ചപ്പെട്ട സംവിധാനങ്ങളുണ്ടെന്നാണ് ഗവേഷകര്‍ പറയുന്നത്. വിമാനത്തിനുള്ളിലെ വെൻ്റിലേഷൻ സംവിധാനം വീടുകളുടേതിനെ അപേക്ഷിച്ച് വളരെ മെച്ചപ്പെട്ടതാണ്. വിമാനത്തിനുള്ളിലെ മികച്ച വെൻ്റിലേഷൻ സംവിധാനം മറ്റു യാത്രക്കാരിലേയ്ക്ക് രോഗബാധ ഏൽക്കുന്നത് തടയുമെന്നും ഗവേഷകര്‍ വ്യക്തമാക്കുന്നു. മാസ്ക് ഉള്‍പ്പെടെയുള്ള പ്രതിരോധ മാര്‍ഗങ്ങള്‍ ഉപയോഗിക്കുമ്പോഴാണ് ഇത് ഫലപ്രദമായി നടപ്പാകുന്നതെന്നും ഗവേഷകര്‍ പറയുന്നു.