മുതിര്‍ന്നവരുടെ പ്രതിരോധശക്തിയെ സഹായിക്കും; ഓക്സ്ഫഡ് വാക്സിന്‍ 'വന്‍ നേട്ടമുണ്ടാക്കിയേക്കും'

ലണ്ടന്‍: ലോകം പ്രതീക്ഷയോടെ കാത്തിരിക്കുന്ന കൊവിഡ് വാക്സിനിൽ ഒന്നാണ് ഓക്സ്ഫഡ് യൂണിവേഴ്സിറ്റിയും അസ്ട്രാസെനകയും ചേർന്ന് വികസിപ്പിക്കുന്നത്. പരീക്ഷണത്തിന്‍റെ ഓരോഘട്ടത്തിലും ഓരോ രാജ്യങ്ങളിൽ നിന്നുമുള്ള വാർത്തയെ ലോകം ശ്രദ്ധയോടെയാണ് നോക്കി കണ്ടത്. ഇപ്പോഴിതാ ഓക്സഫഡ് കൊവിഡ് വാക്സിൻ എല്ലാപ്രായത്തിലുള്ളവരുടെയും പ്രതിരോധശക്തിയെ സഹായിക്കുമെന്നാണ് അസ്ട്രാസെനക പറയുന്നത്.

ഓക്സഫഡ് വാക്സിൻ പ്രായമായവരിലും ചെറുപ്പക്കാരിലും സമാനമായ രോഗപ്രതിരോധ ശേഷി ഉണ്ടാക്കുന്നു. പ്രായമായവരിൽ പ്രതികൂല പ്രതികരണങ്ങൾ കുറവാണ്. ബ്രിട്ടീഷ് മരുന്ന് നിർമ്മാതാക്കളായ അസ്ട്രാസെനെക പറയുന്നതായി ദേശീയ മാധ്യമമായ എൻഡിടിവി റിപ്പോർട്ട് ചെയ്യുന്നു. കൊവിഡിനെതിരായ പോരാട്ടത്തിൽ നിർണായക സ്വാധീനമാകും വാക്സിൻ ചെലുത്തുകയെന്നാണ് റിപ്പോർട്ട് ചൂണ്ടിക്കാട്ടുന്നത്.

Also Read : ദരിദ്രരാഷ്ട്രങ്ങള്‍ക്ക് വാക്‌സിന്‍ ഉറപ്പാക്കണം; വാക്‌സിന്‍ ദേശീയത കൊവിഡ് വര്‍ധിപ്പിക്കുമെന്ന് ലോകാരോഗ്യ സംഘടന

“മുതിർന്നവരിലും ചെറുപ്പക്കാരിലും രോഗപ്രതിരോധ പ്രതികരണങ്ങൾ സമാനമാണെന്നതും, കൊവിഡ്-19 രോഗതീവ്രത കൂടുതലുള്ള മുതിർന്നവരിൽ പാർശ്വഫലങ്ങൾ കുറവാണെന്ന് കാണുന്നതും ശുഭസൂചനയാണ്” അസ്ട്രാസെനെക വക്താവ് വാർത്താ ഏജൻസിയായ റോയിട്ടേഴ്സിനോട് പറഞ്ഞു.

പ്രായാധിക്യമുള്ളവർ വൈറസ് ബാധയേറ്റ് മരിക്കാനുള്ള സാധ്യത കൂടുതലാണെന്നിരിക്കെ പ്രായമേറിയവർക്ക് വാക്സിനിലൂടെ രോഗപ്രതിരോധശക്തി ലഭിക്കുന്നെന്ന വാർത്ത കൊവിഡ് പോരാട്ടത്തിന് ഊർജ്ജമേകുന്നതാണ്.

Also Read : മരുന്നുകമ്പനിയുമായി ഖത്തര്‍ കരാറില്‍; കൊവിഡ് വാക്സിന്‍ പുറത്തിറങ്ങിയാല്‍ ഉടന്‍ വിതരണം

ലോകത്തിന്‍റെ പലഭാഗങ്ങളിലായി നടക്കുന്ന വാക്സിൻ പരീക്ഷണങ്ങളിൽ മുന്നിൽ നിൽക്കുന്ന ഒന്നാണ് ഓക്സ്ഫോഡും അസ്ട്രാസെനകയും ചേർന്ന് വികസിപ്പിക്കുന്ന വാക്സിൻ. ഇതിനോടകം തന്നെ നിരവധി കമ്പനികളുമായും രാജ്യങ്ങളുമായി അസ്ട്രാസെനക കരാറിലേർപ്പെട്ടിട്ടുണ്ട്.