ബീച്ചിലൂടെ നടന്ന ശേഷം മടങ്ങിയെത്തുന്ന നായകൾ ചാകുന്നു; കാരണം തേടി അധികൃതർ

ഓസ്‌ട്രേലിയയിലെ ക്വീൻസ്ലാൻഡ് ഉൾപ്പടെയുള്ള പ്രദേശങ്ങളിൽ നായകൾ ചാകുന്നതിൽ ദുരൂഹത. ക്വീൻസ്ലാൻഡ് ഉൾപ്പടെയുള്ള പ്രദേശങ്ങളിലെ ബീച്ചുകളിൽ നടക്കാൻ വന്ന് ഉടമകളോടൊപ്പം മടങ്ങിയ നായകൾ ചത്തതിലാണ് ദുരൂഹതയേറുന്നത്. നായകളുടെ ഉടമകളോട് ജാഗ്രത പാലിക്കണമെന്ന് അധികൃതർ നിർദേശം നൽകി. ബീച്ചുകളിൽ നായകൾ ചത്ത് വീഴുകയും ചിലത് രോഗാവസ്ഥയിലാകുകയും ചെയ്തു. ഇത് വലിയ ആശങ്കയാണ് സൃഷ്ടിച്ചിരിക്കുന്നത്. ഒരേ ബീച്ചിൽ നടക്കാൻ വന്ന അഞ്ച് നായകളാണ് ദുരൂഹമായി ചത്തത്. ക്വീൻസ്ലാൻഡിലെ സൺഷൈൻ കോസ്റ്റിലാണ് സംഭവം നടന്നത്. ബീച്ചിൽ നിന്ന് മടങ്ങി വീടുകളിൽ എത്തുന്ന നായകൾക്ക് രോഗം പിടിപെടുന്നതും ആശങ്കയായിരിക്കുകയാണ്. ബീച്ചിൽ എത്തിയ ശേഷം വിഷം ഉള്ളിൽ ചെന്നതാകാമെന്നാണ് നിഗമനം. ചില നായകൾ വിഷം ഉള്ളിൽ ചെന്നതിന്‍റെ ലക്ഷണങ്ങൾ കാണിച്ചതായും റിപ്പോർട്ടുണ്ട്. നായകൾ വീടുകളിലേക്ക് മടങ്ങിയ ശേഷം തുടരെ ഛർദിച്ചു. ഇതിൽ ഒരു നായയെ അരിഗ്യസ്ഥിതി മോശമായതിനെ തുടർന്ന് സമീപത്തുള്ള ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

Also Read: 'ഞാനെന്റെ മക്കൾക്ക് ഭക്ഷണം കൊടുക്കണോ അതോ കൊല്ലണോ?' വിലക്കയറ്റത്തിൽ പ്രതിഷേധിച്ച് യുവതി; എന്താണ് പാകിസ്ഥാനെ വട്ടം കറക്കുന്ന സാമ്പത്തിക പ്രതിസന്ധിക്ക് കാരണം?


നായകൾ നടക്കുന്ന വഴിയിൽ ചോക്ലേറ്റ് ഇട്ടിരുന്നുവെന്നും ഇത് കഴിച്ചതാണ് അപകടത്തിന് കാരണമായതെന്നും ചില ഉടമകൾ പറയുന്നു. എന്നാൽ പ്രദേശവാസികൾ നായകൾക്ക് വിഷം കൊടുത്തതാണെന്നും ആരോപണമുണ്ട്. കുടിക്കാനുള്ള വെള്ളത്തിൽ ബാറ്ററി ആസിഡ് കലർത്തിയതാകാമെന്നും ആരോപണമുണ്ട്. എന്നാൽ യഥാർത്ഥ കാരണമെന്താണെന്ന് പോലീസ് അന്വേഷിച്ചു വരികയാണ്. ഈ ബീച്ചുകളിൽ അരുമമൃഗങ്ങളുമായി എത്തുന്നവർ ജാഗ്രത പുലർത്തണമെന്ന് അധികൃതർ അറിയിച്ചു. അവ എന്ത്, എവിടെ നിന്ന് കഴിക്കുന്നുവെന്ന് ഉറപ്പാക്കണമെന്നും നോർത്ത് കോസ്റ്റ് വെറ്ററിനറി എമർജൻസി ആൻഡ് ക്രിട്ടിക്കൽ കെയർ അധികൃതർ അറിയിച്ചു. ചാകുകയോ രോഗാവസ്ഥയിലാകുകയോ ചെയ്ത നായകൾ 12 മണിക്കൂറിന്‍റെ ഇടവേളയിൽ ഈ പ്രദേശത്ത് എത്തിയിരുന്നു എന്നതാണ് ഇവയെ പരസ്പരം ബന്ധിപ്പിക്കുന്ന വസ്തുതയായി കണ്ടെത്താൻ കഴിഞ്ഞത്. നായകൾ ചത്തതിന് പിന്നിലെ യഥാർത്ഥ സംഭവത്തിൽ അന്വേഷണം ശക്തമാക്കിയിരിക്കുയാണ്.