കുട്ടികളുടെ ഇടയില്‍ അഞ്ചാംപനി പടരും
പുതുവത്സരത്തിന്റെ തുടക്കത്തില്‍ കുട്ടികള്‍ക്ക് ഇടയില്‍ വ്യാപകമായ തോതില്‍ അഞ്ചാംപനി പടരാന്‍ ഇടയാക്കുമെന്നാണ് റിപ്പോര്‍ട്ട് വ്യക്തമാക്കുന്നത്. ദി ലാന്‍സെറ്റ് ജേണലില്‍ പ്രസിദ്ധീകരിച്ച പഠനത്തില്‍, വരും വര്‍ഷങ്ങളില്‍ വിനാശകരമായ അഞ്ചാംപനി തടയുന്നതിന് അടിയന്തര അന്താരഷ്ട നടപടിയ്ക്ക് നിര്‍ദേശം നല്‍കിയിട്ടുണ്ട്.
വൈറസ് പ്രവേശിക്കുന്നത് എങ്ങനെ?
പുതിയ മുന്നറിയിപ്പ് പ്രകാരം, കൊറോണ വൈറസ് പോലെ തന്നെ മൂക്കിലൂടെയാണ് ഈ വൈറസും ശരീരത്തിലേക്ക് പ്രവേശിക്കുന്നത്. ഇതിന് പരിഹാരം കാണാനായി കുട്ടികള്‍ക്ക് കുത്തിവെയ്പ് നല്‍കുന്നത് ഉള്‍പ്പെടെയുള്ള നടപടികള്‍ക്ക് രാജ്യാന്തര സമൂഹം തയ്യാറാകണമെന്നും റിപ്പോര്‍ട്ട് വ്യക്തമാക്കുന്നു. ഓസ്‌ട്രേലിയയിലെ മാര്‍ഡോക്ക് ചില്‍ഡ്രന്‍സ് റിസര്‍ച്ച് ഇന്‍സ്റ്റിറ്റ്യൂട്ടിലെ പ്രമുഖ എഴുത്തുകാരനായ കിം മള്‍ഹോളണ്ടിന്റെ നേതൃത്വത്തിലാണ് പഠനം നടത്തിയത്.
കുട്ടികളില്‍ പോഷകാഹാര കുറവ്
കൊവിഡ് മഹാമാരിയെ തുടര്‍ന്ന്, ലോകമെമ്പാടുമുള്ള സാമ്പത്തിക പ്രത്യാഘാതങ്ങളെ തുടര്‍ന്ന് കുട്ടികളിലെ പോഷകാഹാര കുറവ് വര്‍ധിച്ചിട്ടുണ്ട്. ഇത് കുട്ടികളില്‍ അഞ്ചാംപനി കൂടുതല്‍ തീവ്രമാകാന്‍ ഇടയാക്കിയേക്കും. അതോടൊപ്പം അഞ്ചാംപനി മൂലം കൂടുതല്‍ മരണങ്ങള്‍ വരെ സംഭവിച്ചേക്കാമെന്ന് റിപ്പോര്‍ട്ട് ചൂണ്ടിക്കാട്ടുന്നു.
വാക്‌സിനേഷന്‍ നഷ്ടമായത് 9.4 കോടി കുട്ടികള്‍ക്ക്
കൊവിഡ് മഹാമാരിയെ തുടര്‍ന്ന്, കുത്തിവെയ്പ് വൈകിയതിന് പിന്നാലെ 9.4 കോടി കുട്ടികള്‍ക്കാണ് ഇപ്രാവശ്യം വാക്‌സിനേഷന്‍ നഷ്ടമായത്. ഈ ഘടകങ്ങളെല്ലാം 2021 കഠിനമായ അഞ്ചാംപനി ഉണ്ടാക്കുമെന്ന് വ്യക്തമാക്കുന്നു. ദശകങ്ങള്‍ക്ക് മുമ്പ് അഞ്ചാംപനി ബാധിച്ച് ഗുരുതരമായ പ്രത്യാഘാതങ്ങള്‍ ഉണ്ടായിരുന്നു. പ്രതിരോധ കുത്തിവെയ്പിലൂടെ ഈ രോഗം തടയാന്‍ വളരെ ചെലവ് കുറവാണ്.