ആരോഗ്യനില മോശമാകുന്നു
Photo: Monica Almeida/Facebook
ലിങ്കൺ ഷെയർ ആശുപത്രിയിലെ നഴ്സ് ആയ മോണിക്ക അൽമെയ്ഡ രണ്ട് ഡോസ് വാക്സിനും സ്വീകരിച്ചിരുന്നു. പക്ഷേ കൊവിഡ് ഇവരെ ഗുരുതരമായി തന്നെ ബാധിച്ചു. കഴിഞ്ഞ ഒക്ടോബർ 19നായിരുന്നു മോണിക്കയ്ക്ക് കൊവിഡ് 19 സ്ഥിരീകരികരിക്കുന്നത്. ആരോഗ്യപ്രശ്നങ്ങൾ മൂർച്ഛിച്ചതിനെത്തുടർന്ന് നവംബർ 9ന് ഇവരെ ആശുപത്രിയിൽ പ്രവേശിപ്പിക്കുകയും ചെയ്തു. രുചിയും മണവും നഷ്ടമായതിന് പുറമെ ഓക്സിജൻ ലെവൽ താഴുകയും ആരോഗ്യനില വഷളാവുകയും ചെയ്തതോടെ ലിങ്കൺ കൗണ്ടി ഹോസ്പിറ്റലിലെ തീവ്രപരിചരണവിഭാഗത്തിലേക്ക് മാറ്റുകയായിരുന്നു. അവസ്ഥ മോശമായതോടെ നവംബർ 16ന് ഇൻഡ്യൂസ്ഡ് കോമയിൽ പ്രവേശിപ്പിക്കുകയും ചെയ്തു.
'പരീക്ഷണമെന്നോണം വയാഗ്ര'
Photo: Monica Almeida/Facebook
ആഴ്ചകളോളം കോമ അവസ്ഥയിൽ കിടന്ന നഴ്സിന് വെന്റിലേറ്റർ സപ്പോർട്ട് ലഭിച്ചിട്ടും ആരോഗ്യനിലയിൽ യാതൊരു പുരോഗതിയും വന്നിരുന്നില്ല. ഇതോടെ കുറച്ചുദിവസം കൂടി നോക്കി വെന്റിലേറ്റർ സപ്പോർട്ട് അവസാനിപ്പിക്കാനായിരുന്നു അധികൃതരുടെ തീരുമാനം. ഈ ഘട്ടത്തിലാണ് ഒരു പരീക്ഷണം എന്ന നിലയ്ക്ക് ഉയർന്ന ഡോസ് വയാഗ്ര നൽകാൻ ഡോക്ടർ തീരുമാനിക്കുന്നത്. വയാഗ്ര നൽകി തുടങ്ങിയതോടെ ഡിസംബർ 14ന് ആരോഗ്യസ്ഥിതിയിൽ മാറ്റമുണ്ടാവുകയും ചെയ്തു. തുടർന്ന് ശരീരം മരുന്നുകളോട് പ്രതികരിക്കാനും ആരംഭിച്ചു.
വയാഗ്ര പുതുജീവനേകുന്നു
(പ്രതീകാത്മക ചിത്രം)
കോമയിലാകുന്നതിന് മുമ്പ് പരീക്ഷണാത്മക മരുന്നുകൾ പരീക്ഷിക്കാൻ തയ്യാറാണെന്ന റിപ്പോർട്ടിൽ മോണിക്ക ഒപ്പുവെച്ചിരുന്നു. ഇതാണ് ഡോക്ടർമാരെ ഇത്തരമൊരു പരീക്ഷണത്തിന് അനുവദിച്ചതെന്നാണ് റിപ്പോർട്ട്. പുരുഷന്മാരിൽ ഉദ്ധാരണശേഷിക്കുറവ് പരിഹരിക്കാൻ വേണ്ടി വ്യാപകമായി പ്രയോഗിക്കപ്പെടുന്നതാണ് വയാഗ്ര എന്ന മരുന്ന്. രക്തക്കുഴലിന്റെ ആന്തരിക പ്രതലങ്ങളെ സ്വാധീനിച്ച് രക്തയോട്ടം മെച്ചപ്പെടുത്തിയാണ് പ്രവർത്തിക്കുന്നത്. മരുന്നിന്റെ ഈ പ്രവർത്തനം തന്നെയാണ് മോണിക്കയുടെ ആരോഗ്യസ്ഥിതിയിലും മാറ്റമുണ്ടാക്കിയത്.
തമാശയെന്ന് കരുതി
കോമയിൽ നിന്ന് ഉണർന്ന മോണിക്കയോട് ഡോക്ടർമാർ ജീവൻ രക്ഷിച്ച മരുന്നിനെക്കുറിച്ച് വെളിപ്പെടുത്തുകയും ചെയ്തു. ആദ്യം തനിക്ക് ഇത് തമാശയായാണ് തോന്നിയത്. എന്നാൽ കൂടിയ അളവിൽ വയാഗ്ര നൽകിയതാണെന്ന് ഡോക്ടർമാർ പറഞ്ഞതോടൊണ് സത്യം മനസിലായതെന്നും മോണിക്ക പറയുന്നു. "ഡോക്ടറെ എനിക്ക് അറിയാമായിരുന്നു. എന്നെ രക്ഷിച്ച മരുന്ന് വയാഗ്രയാണെനന്ന് അദ്ദേഹം പറഞ്ഞപ്പോൾ തമാശയാണെന്നാണ് കരുതിയത്. പക്ഷേ അദ്ദേഹം കാര്യങ്ങൾ വ്യക്തമാക്കി തന്നു" മോണിക്ക പറയുന്നു.
'എന്നെ രക്ഷിച്ചത് വയാഗ്ര'
Photo: Monica Almeida/Facebook
“തീർച്ചയായും എന്നെ രക്ഷിച്ചത് വയാഗ്രയാണ്. 48 മണിക്കൂറിനുള്ളിൽ അത് പ്രവർത്തിച്ച് തുടങ്ങിയിരുന്നു. ഞാൻ ആസ്മ രോഗിയാണ്. മരുന്ന് രക്തക്കുഴലുകളെ ബാധിച്ചതോടെയാണ് ആരോഗ്യ നിലമെച്ചപ്പെട്ടത്." മോണിക്ക പറഞ്ഞതായി ദി സൺ റിപ്പോർട്ട് ചെയ്യുന്നു.