ബൈഡന്റെ വൈറ്റ് ഹൗസിൽ ഉന്നത സ്ഥാനത്തേക്ക് ഇന്ത്യൻ വംശജ; ആരാണ് കശ്മീർ ബന്ധമുള്ള സമീറ ഫാസിലി
വാഷിങ്ടൺ: അമേരിക്ക മറ്റൊരു യുഗത്തിലേക്ക് കാൽവയ്ക്കാൻ ഒരുങ്ങുകയാണ്. വംശീയതയും വർണ്ണവെറിയും നിറഞ്ഞ സാമൂഹികാന്തരിക്ഷം ഉണ്ടാകില്ലെന്നായിരുന്ന ജോ ബൈഡനും സംഘവും തെരഞ്ഞെടുപ്പ് ഘട്ടത്തിൽ പറഞ്ഞത്. ഇന്ത്യൻ വംശജയായ കമല ഹാരിസിനെ വൈസ് പ്രസിഡന്റ് സ്ഥാനാർഥിയാക്കിയത് തന്നെ ഇതിലേക്കുള്ള ആദ്യ ചുവടുവെയ്പ്പായാണ് വിലയിരുത്തപ്പെട്ടത്. ഇപ്പോഴിതാ അമേരിക്കയിലെ ഇന്ത്യൻ സമൂഹത്തിന് സന്തോഷമേകുന്ന മറ്റൊരു വാർത്തകൂടി വാഷിങ്ടണിൽ നിന്ന് പുറത്ത് വന്നിരിക്കുകയായണ്. വൈറ്റ് ഹൗസിലെ മറ്റൊരു ഉന്നത സ്ഥാനത്തേക്ക് ഇന്ത്യൻ വംശജയായ സമീറ ഫാസിലിയാണ് നിയമിതയായത്.
സാമ്പത്തിക കൗൺസിൽ ഡെപ്യൂട്ടി ഡയറക്ടർ
സാമ്പത്തിക വിദഗ്ധ സമീറ ഫാസിലിയെ വൈറ്റ് ഹൗസിലെ തന്ത്രപ്രധാനമായ സ്ഥാനത്തേക്കാണ് നിയുക്ത അമേരിക്കൻ പ്രസിഡന്റ് ജോ ബൈഡൻ നിയമിച്ചിരിക്കുന്നത്. ദേശീയ സാമ്പത്തിക കൗൺസിൽ ഡെപ്യൂട്ടി ഡയറക്ടർ പദവിയാണ് സമീറ ഫാസിലിക്ക് നൽകിയത്. ഭരണകൂടത്തിന്റെ സാമ്പത്തിക നയ രൂപവൽക്കരണ ചുമതല വൈറ്റ്ഹൗസ് ആസ്ഥാനമായുള്ള ദേശീയ സാമ്പത്തിക കൗൺസിലിനാണ്. ഇതിന് പുറമെ അമേരിക്കൻ പ്രസിഡന്റിന് സാമ്പത്തിക ഉപദേശം നൽകുന്നതും ഇതേ കൗൺസിലാണ്.
ആരാണ് സമീറ ഫാസിലി ?
ജോ ബൈഡൻ- കമല ഹാരിസ് കൂട്ടികെട്ടിന്റെ എക്കണോമിക് ഏജൻസി മേധാവിയാണ് നിലവിൽ സമീറ ഫാസിലി. ഫെഡറൽ റിസർവ് ബാങ്ക് ഓഫ് അറ്റ്ലാന്റയിലും നേരത്തെ ഇവർ ജോലി ചെയ്തിട്ടുണ്ട്. ഡയറക്ടർ ഓഫ് എൻഗേജ്മെന്റ് ഫോർ കമ്മ്യൂണിറ്റി ആൻഡ് എക്കണോമിക് ഡവലപ്മെന്റ് തസ്തികയിലായിരുന്നു ഇത്. ഒബാമ- ബൈഡൻ ഭരണകൂടത്തിൽ ഫാസിലി നാഷണൽ എക്കണോമിക് കൗൺസിലിൽ സീനിയർ പോളിസി ഉപദേഷ്ടാവായും സേവനമനുഷ്ഠിച്ചിട്ടുണ്ട്.
കശ്മീർ ബന്ധമുള്ള രണ്ടാമത്തെ ഇന്ത്യൻ വംശജ
അധികാരമേൽക്കാനിരിക്കുന്ന ജോ ബൈഡൻ ഭരണകൂടത്തിൽ നിയമിതയാകുന്ന കശ്മീരി ബന്ധമുള്ള രണ്ടാമത്തെ ഇന്ത്യൻ വംശജയാണ് സമീറ ഫാസിലി. നേരത്തെ കഴിഞ്ഞ ഡിസംബറിൽ ആയിഷ ഷായും വൈറ്റ്ഹൗസിൽ നിയമിതയായിരുന്നു. വൈറ്റ്ഹൗസ് ഡിജിറ്റൽ സ്ട്രാറ്റജി ഓഫീസ് പാർട്ണർഷിപ് മാനേജറായായിരുന്നു നിയമനം.
കുടുംബത്തോടൊപ്പം ജോർജിയയിൽ താമസം
ഭർത്താവിനും മൂന്ന് മക്കൾക്കുമൊപ്പം ജോർജിയയിലാണ് സമീറ ഫാസിലി താമസിക്കുന്നത്. ഹാർവാഡ് കോളേജിൽ നിന്നും യേൽ ലോ സ്കൂളിലും നിന്നും ബിരുദം നേടിയ ഇവർ യേൽ ലോ സ്കൂളിന്റെ കമ്മ്യൂണിറ്റി ആൻഡ് ഇക്കണോമിക് ഡെവലപ്മെൻറ് ക്ലിനിക്കിൽ ക്ലിനിക്കൽ ലക്ചററായാണ് ഔദ്യോഗിക ജീവിതം ആരംഭിച്ചത്.