റെയിൽവേ ട്രാക്കിൽ ടിക് ടോക് വീഡിയോ ചിത്രീകരണം; ട്രെയിനിടിച്ച് 18കാരന് ദാരുണാന്ത്യം

ഇസ്ലാമാബാദ്: ടിക് ടോക് വീഡിയോ ചിത്രീകരിക്കാനുള്ള ശ്രമത്തിനിടെ ട്രെയിനിടിച്ച് യുവാവ് മരിച്ചു. പാകിസ്ഥാനിലെ ഇസ്ലാമാബാദിനു സമീപമാണ് സംഭവുണ്ടായത്. ടിക് ടോക് വീഡിയോ തയ്യാറാക്കാനായി റെയിൽവേ ട്രാക്കിനു പരിസരത്തു കൂടി നടക്കുന്നതിൻ്റെ വീഡിയോ ചിത്രീകരിക്കുന്നതിനിടയിലായിരുന്നു അപകടം.

റാവൽപിണ്ടിയോടു ചേര്‍ന്നുള്ള ഷാ ഖാലിദ് എന്ന പ്രദേശത്ത് വെള്ളിയാഴ്ചയാണ് അപകടമുണ്ടായതെന്നാണ് വാര്‍ത്താ ഏജൻസിയായ എഎഫ്പിയുടെ റിപ്പോര്‍ട്ട്. ഹംസ നവീദ് എന്ന 18കാരനാണ് മരിച്ചത്. സുഹൃത്തിനൊപ്പം റെയിൽവേ പാളത്തിൽ വീഡിയോ ചിത്രീകരിക്കുന്നതിനിടെ അപകടമുണ്ടാകുകയായിരുന്നു പ്രാദേശിക രക്ഷാപ്രവര്‍ത്തകര്‍ വാര്‍ത്താ ഏജൻസിയോടു പറഞ്ഞു. റയിൽവേ ട്രാക്കിലൂടെ നടന്ന് വീഡിയോയെടുക്കുന്നതിനിടെ പാഞ്ഞെത്തിയ ട്രെയിൻ ഹംസയെ ഇടിച്ചു തെറിപ്പിക്കുകയായിരുന്നു. ടിക് ടോക്കിലും മറ്റു സമൂഹമാധ്യമങ്ങളിലും പോസ്റ്റ് ചെയ്യാനാണ് വീഡിയോ എടുത്തതെന്നാണ് സുഹൃത്തിൻ്റെ പ്രതികരണം.

Also Read: ലാലു പ്രസാദ് യാദവിന്റെ ആരോഗ്യനില മോശം; ഡൽഹി എയിംസിലേക്ക് മാറ്റിയേക്കും

രക്ഷാപ്രവര്‍ത്തകര്‍ ഉടൻ സ്ഥലത്തെത്തിയെങ്കിലും യുവാവ് മരിച്ചിരുന്നു. അപകടവിവരവും മരണവും പ്രദേശത്തെ പോലീസ് സ്റ്റേഷനും സ്ഥിരീകരിച്ചിട്ടുണ്ട്.

Also Read: കൈയ്യിൽ കൊന്ത, ഞായറാഴ്ചകളിൽ കുർബാന മുടക്കില്ല; യുഎസ് പ്രസിഡൻ്റാകുന്ന രണ്ടാമത്തെ കത്തോലിക്കൻ

മറ്റു രാജ്യങ്ങളിലേതു പോലെ പാകിസ്ഥാനിലും ടിക് ടോകിനു വലിയ ജനപ്രീതിയാണുള്ളത്. ടിക് ടോകിലും മറ്റു സമൂഹമാധ്യമങ്ങളിലും പോസ്റ്റ് ചെയ്യാനായി യുവാക്കള്‍ സെൽഫി ചിത്രങ്ങളും വീഡിയോകളും പകര്‍ത്തുന്നത് പാകിസ്ഥാനിലെ പതിവുകാഴ്ചയാണ്.