റഷ്യയിലെ പുല്മേടുകളില് നിന്ന് ദേശാടനത്തിന് ഇറങ്ങുന്ന പരുന്തുകള് (steppe eagle) പുതുമയല്ല. സൈബീരിയയില് നിന്നുള്ള ഗവേഷകര് വര്ഷങ്ങളായി പരുന്തുകളെ നിരീക്ഷിക്കുന്നുണ്ട്. ഇത്തവണ പരുന്തുകള് റഷ്യന് ഗവേഷകര്ക്ക് വലിയൊരു തലവേദനയായി.
പരുന്തുകള്ക്കുള്ള എസ്എംഎസ് ട്രാക്കിങ് ഡിവൈസുകളുമായി ദീര്ഘദൂരം പരുന്തുകള് പറന്നതാണ് പ്രശ്നം. ഇത്തവണ റഷ്യയും കസാഖ്സ്ഥാനും വിട്ട് ഇറാന്, പാകിസ്ഥാന് രാജ്യങ്ങളിലേക്കാണ് ദേശാടന പരുന്തുകള് പറന്നത്.
ശൈത്യകാലം വരുമ്പോള് പരുന്തുകള് പാകിസ്ഥാന്, ഇന്ത്യ പ്രദേശങ്ങളിലേക്ക് പറക്കുന്നത് സ്വഭാവികമാണ്. ഇത്തവണ റഷ്യന് ഗവേഷകരെ കുഴക്കിയത് മിന് എന്ന പരുന്താണ്. കസാഖ്സ്ഥാനില് നിന്ന് ഇറാനിലേക്ക് മിന് ഒറ്റപ്പറക്കല് പറന്നു.
കസാഖ്സ്ഥാനില് ഒരിടത്തും ട്രാന്സ്മിറ്റര് പ്രവര്ത്തിച്ചില്ല. ഇറാനിലേക്ക് എത്തിയപ്പോഴാണ് ഇത് പ്രവര്ത്തിച്ചത്. ഇതോടെ സന്ദേശങ്ങള് തുരുതുരെ പ്രവഹിക്കാന് തുടങ്ങി. ഇറാനിലെ റോമിങ് ചാര്ജുകള് ബാധകമായതോടെ സൈബീരിയന് ഗവേഷകരുടെ കീശയും കാലിയായി.
കസാഖ്സ്ഥാനില് വച്ച് 15 റൂബിള് (എകദേശം 16 രൂപ) ആയിരുന്നു ഒരു എസ്എംഎസ് ലഭിക്കാനുള്ള ചാര്ജ്, ഇറാനില് ഇത് 49 റൂബിള് ( ഏകദേശം 54രൂപ) ആണ്. ഇതോടെ പണം തികയാത്ത അവസ്ഥയായി. ഗവേഷകരുടെ വിഷമം മനസിലാക്കി റഷ്യന് മൊബൈല്ഫോണ് കമ്പനി മെഗാഫോണ് കുറഞ്ഞ് നിരക്കിലുള്ള റോമിങ് പ്ലാന് അനുവദിച്ചു. ഇപ്പോള് അതിനുള്ള പണം കണ്ടെത്താന് ഓണ്ലൈന് ആയി ആളുകളോട് പണം ചോദിക്കുകയാണ് ഗവേഷകര്.