മോസ്‍കോ: റഷ്യന്‍ പ്രധാനമന്ത്രി മിഖായേല്‍ മിഷുസ്‍തിന് കൊവിഡ്-19 സ്ഥിരീകരിച്ചു. തനിക്ക് കൊറോണ വൈറസ് ബാധ സ്ഥിരീകരിച്ചതായി മിഷു‍സ്‍തിന്‍ വ്യാഴാഴ്‍ച റഷ്യന്‍ പ്രസിഡന്‍റ് വ്ളാഡിമിര്‍ പുടിനെ അറിയിച്ചു.

COVID-19 LATEST UPDATE

വീഡിയോ കോണ്‍ഫറന്‍സിങ്ങിലൂടെയാണ് മിഷുസ്‍തിന്‍ പുടിനുമായി സംസാരിച്ചത്. തന്‍റെ അസാന്നിധ്യത്തില്‍ ഫസ്റ്റ് ഡെപ്യൂട്ടി പ്രധാനമന്ത്രി ആന്ദ്രെ ബെലോസോവ് പ്രധാനമന്ത്രിയുടെ ചുമതല വഹിക്കുമെന്ന് മിഷുസ്‍തിന്‍ അറിയിച്ചു. മിഷുസ്‍തിന്‍റെ നിര്‍ദേശം പുടിന്‍ അംഗീകരിച്ചു.

Also Read: റഷ്യയിലും ബ്രസീലിലും സ്ഥിതി അതിരൂക്ഷം

റഷ്യയില്‍ കൊവിഡ് ബാധിതരുടെ എണ്ണം അതിവേഗം വര്‍ധിക്കുകയാണ്. കഴിഞ്ഞ 24 മണിക്കൂറിനിടെ 7099 പേര്‍ക്കാണ് പുതുതായി രോഗം സ്ഥിരീകരിച്ചത്. ഇതുവരെയുള്ളതില്‍ ഏറ്റവും വലിയ പ്രതിദിന വര്‍ധനയാണിത്. ഇതോടെ രോഗബാധിതരുടെ എണ്ണം 106498 ആയി.

Also Read: ഈ മരുന്ന് കൊറോണയെ തടയും

ആകെ രോഗികളുടെ എണ്ണത്തില്‍ റഷ്യ ചൈനയെയും ഇറാനെയും മറികടന്നു. അമേരിക്ക, സ്‍പെയിന്‍, ഇറ്റലി, ഫ്രാന്‍സ്, യുകെ, ജര്‍മനി, തുര്‍ക്കി എന്നീ രാജ്യങ്ങളാണ് റഷ്യക്ക് മുന്നിലുള്ളത്. 24 മണിക്കൂറിനിടെ 101 മരണമാണ് റഷ്യയില്‍ റിപ്പോര്‍ട്ട് ചെയ്‍തത്. ഇതോടെ ആകെ മരണസംഖ്യ 1073 ആയി. 11619 പേര്‍ക്കാണ് രോഗം ഭേദമായത്. 2300 പേരുടെ നില അതീവ ഗുരുതരമാണ്.