അര്‍ധരാത്രിയിൽ സൗദി നിരത്തുകളിൽ വളയം പിടിച്ച് സ്ത്രീകള്‍

റിയാദ്: സൗദി അറേബ്യയിൽ സ്വന്തമായി വാഹനമോടിക്കാനുള്ള സ്ത്രീകളുടെ വിലക്ക് നീങ്ങി. സൗദി അറേബ്യയുടെ ചരിത്രത്തിലെ വിപ്ലവകരമായ തീരുമാനം ആഘോഷമാക്കാനായി ആയിരക്കണക്കിന് സ്ത്രീകളാണ് ഞായറാഴ്ച അര്‍ധരാത്രി തന്നെ കാറുമായി റോഡുകളിലേയ്ക്ക് ഇറങ്ങിയത്. ആദ്യഘട്ടത്തിൽ 54000 സ്ത്രീകള്‍ക്കാണ് ഡ്രൈവിങ് ലൈസൻസ് ലഭിച്ചത്.

സമര്‍ അൽമോഗ്രനാണ് പുതിയ തീരുമാനപ്രകാരം സൗദിയിൽ വാഹനമോടിച്ച ആദ്യ സ്ത്രീയെന്നാണ് അന്താരാഷ്ട്രമാധ്യമങ്ങള്‍ റിപ്പോര്‍ട്ട് ചെയ്യുന്നത്. തന്‍റെ മക്കളെ വീട്ടിൽ വീട്ടിൽ ഉറക്കിക്കിടത്തിയ ശേഷമായിരുന്നു കിങ് ഫഹദ് ഹൈവേയിലൂടെ സമറിന്‍റെ ഡ്രൈവിങ്.

സൗദി കിരീടാവകാശിയായ മുഹമ്മദ് ബിൻ സൽമാന്‍ രാജകുമാരന്‍റെ സാമൂഹിക - സാമ്പത്തിക പരിഷ്കാരങ്ങളുടെ ഭാഗമായാണ് പുതിയ തീരുമാനം നടപ്പിലായത്. പുതിയ തീരുമാനം പ്രഖ്യാപിക്കപ്പെട്ടതോടെ ആയിരക്കണക്കിന് സ്ത്രീകളാണ് ഡ്രൈവിങ് പരിശീലനത്തിനായി ചേര്‍ന്നത്. വിവിധ പ്രവിശ്യകളിൽ സ്ത്രീകള്‍ക്ക് ഡ്രൈവിങ് പരിശീലനത്തിനായി കേന്ദ്രങ്ങള്‍ തുറന്നിരുന്നു. ഇതിനായി നാല് സര്‍വകലാശാലകളുമായി കരാറിൽ ഒപ്പുവെയ്ക്കുകയും ചെയ്തു.

സ്ത്രീകള്‍ വാഹനമോടിക്കാൻ തുടങ്ങിയതോടെ വനിതാ ടാക്സികളും നിരത്തിലിറങ്ങുമെന്ന് പൊതുഗതാഗത അതോരിറ്റി അറിയിച്ചിട്ടുണ്ട്. നിലവിൽ സ്വദേശി സ്ത്രീകള്‍ക്ക് മാത്രമാണ് വനിതാ ടാക്സി ഓടിക്കാൻ അനുവാദം നല്‍കുന്നത്. പെൺകുട്ടികളുടെ സ്കൂള്‍ ബസുകള്‍ ഓടിക്കാനും കാര്‍ റെന്‍റൽ സര്‍വീസുകള്‍ നടത്താനും സ്ത്രീകള്‍ക്ക് അനുവാദമുണ്ട്.

ഡ്രൈവിങ് പരിശീലനത്തിന് പുറമെ അപകടകരമായ സാഹചര്യങ്ങളെ നേരിടാനും അത്യാവശ്യം മെക്കാനിക്കൽ പണികള്‍ ചെയ്യാനുമെല്ലാം സ്ത്രീകളെ പരിശീലിപ്പിക്കുന്നുണ്ട്. ഇത് വലിയ സാമൂഹ്യമുന്നേറ്റത്തിന് വഴിവെക്കുമെന്നാണ് വിലയിരുത്തൽ.

അതേസമയം പുതിയ തീരുമാനം സൗദിയിൽ ഹൗസ് ഡ്രൈവര്‍മാരായി ജോലി ചെയ്യുന്ന മലയാളികള്‍ ഉള്‍പ്പെടെയുള്ള പ്രവാസി പുരുഷന്മാരുടെ ജോലിയ്ക്ക് തിരിച്ചടിയാകുമെന്നും വിലയിരുത്തപ്പെടുന്നു.