ഒരു ചിറക് പിങ്ക്, മറ്റേത് മഞ്ഞ, ഒരേസമയം ആണും പെണ്ണുമായ പക്ഷി; അത്യപൂര്‍വമെന്ന് ഗവേഷകര്‍

ഇതുവരെ ഇത്തരത്തിലുള്ള അഞ്ച് പക്ഷികളെയാണ് കണ്ടെത്തിയിരിക്കുന്നത്. 15 വർഷം മുമ്പാണ് ഇത്തരമൊരു കണ്ടെത്തൽ കാർനെഗി മ്യൂസിയം ഓഫ് നാച്ചുറൽ ഹിസ്റ്ററിയിൽ അവസാനമായി നടന്നത്.

ബൈലാറ്ററൽ ഗൈനാൻ‌ഡ്രോമോർഫിസം എന്നാണ് ഈ പ്രതിഭാസത്തിനു പറയുന്നത്. പത്ത് ലക്ഷത്തിൽ ഒന്ന് എന്ന നിലയ്ക്കായതിനാൽ ഇത്തരത്തിൽ ജനിതക മാറ്റം സംഭവിച്ച ജീവികൾ തിരിച്ചറിയപ്പെടാതെ പോകുന്നുവെന്നാണ് ഗവേഷകർ പറയുന്നത്.

നിറ വ്യത്യാസമാണ് ജനിതക മാറ്റമുള്ള പക്ഷികളെ തിരിച്ചരിയാൻ സഹായിക്കുന്നത്. 800,000 പക്ഷികളാണ് പവർമിൽ നേച്ചർ റിസർവിലുള്ളത്.

റോസ് ബ്രെസ്റ്റഡ് ഗ്രോസ്ബീക്ക് എന്നാണ് പക്ഷിയുടെ പേര്. നിറത്തിന്റെ അടിസ്ഥാനത്തിലാണ് ഇവയിലെ ആണിനേയും പെണ്ണിനേയും തിരിച്ചറിയുന്നത്. ആൺ പക്ഷികളുടെ ചിറകിന്റെ ഉൾഭാഗത്ത് പിങ്ക് നിറവും പെൺ പക്ഷികൾക്ക് ഓറഞ്ച് നിറവുമുണ്ട്.

എന്നാൽ ഈ പക്ഷിയുടെ ശരീരത്തിന്റെ പാതി പിങ്കും മറുപാതി ഓറഞ്ചുമാണ്. ഇതാണ് ആണും പെണ്ണുമായ പക്ഷിയെ തിരിച്ചറിയാൻ നിരീക്ഷകരെ സഹായിച്ചത്.

ഈ ജനിതക മാറ്റത്തെ ഗൈനാൻ‌ഡ്രോമോർഫിസം എന്നാണ് വിളിക്കുന്നത്. (ഗ്യാൻ എന്നാൽ പെണ്ണിന് ഗ്രീക്കിൽ പറയുന്ന വാക്ക്, ആൻഡ്രോ എന്നാൽ പുരുഷൻ, മോർഫ് എന്നാൽ വൈവിധ്യം).

ഗൈനാൻ‌ഡ്രോമോർഫിസം പക്ഷികളുടെ ജീവിതത്തെ എങ്ങനെ ബാധിക്കുന്നുവെന്ന് ഇനിയും വ്യക്തമല്ല.

"പക്ഷിയുടെ ഇണ ചേരാനുള്ള കഴിവിനെ ഇത് തീർച്ചയായും ബാധിക്കും. ശരീരത്തിലെ പെൺ ഭാഗത്ത് ഒരു അണ്ഡാശയം ഉണ്ടോയെന്ന് ഞങ്ങൾക്ക് അറിയില്ല. ഉണ്ടെങ്കിൽ അതിന് ആൺ ഇണയെ ആകർഷിക്കാനും പ്രത്യുൽപാദനം നടത്താനും സാധിക്കും." ആനി ലിൻഡ്സെ പറഞ്ഞു.

പ്രജജന കാലമല്ലാത്തതിനാൽ ഇതിന് പ്രത്യുത്പാദന ശേഷിയുണ്ടോ എന്ന് മനസിലാക്കാൻ സാധിച്ചിട്ടില്ല. അതിനാൽ കൂടുതൽ പഠനത്തിലൂടെ മാത്രമേ ഈ പക്ഷിയുടെ ജനിതക സ്വഭാവത്തെ പഠിക്കാൻ സാധിക്കൂ.

പക്ഷിക്ക് ഏകദേശം ഒരു വയസ് പ്രായമാണുള്ളത്. അതായത് പ്രായപൂർത്തിയാകുന്നതുവരെ അതിന് ജീവിക്കാൻ കഴിഞ്ഞു എന്നുള്ളതാണ്. ഗൈനാൻ‌ഡ്രോമോർഫിസം ചിലന്തികളിലും കോഴികളിലുമൊക്കെ കാണാറുണ്ടെന്ന് ഗവേഷകർ പറയുന്നു.

പക്ഷികളുടെ മുട്ടയിലുണ്ടാകുന്ന ജനിതക മാറ്റമാണ് ഇത്തരമൊരു അവസ്ഥയ്ക്ക് കാരണമാകുന്നത്. പുരുഷ-സ്ത്രീ കോശങ്ങൾ ഒരു ബ്രൂണത്തിന് രൂപം നൽകുന്നതാണ് ഇതിനു കാരണം. പക്ഷിയുടെ ശരീരത്തിൽ നിന്നും ശേഖരിച്ച തൂവൽ ഉപയോഗിച്ച് ഈ ജനിതക മാറ്റം എങ്ങനെ സംഭവിച്ചുവെന്ന് കണ്ടെത്താൻ സാധിക്കുമെന്ന് ആനി ലിൻഡ്സെ പറഞ്ഞു.