പാകിസ്ഥാനിൽ റാലിക്കിടെ ഇമ്രാൻ ഖാന് നേരെ ചെരിപ്പേറ്

ലാഹോർ: തഹ്‌രീകെ ഇൻസാഫ് പാർട്ടി അധ്യക്ഷൻ ഇമ്രാൻ ഖാന് നേരെ പഞ്ചാബ് പ്രവിശ്യയിലെ ഗുജ്‌റത്തിൽ നടന്ന റാലിക്കിടെ ചെരിപ്പേറ്. വാഹനത്തിൽ നിന്ന് ഇമ്രാൻ ഖാൻ ജനങ്ങളോട് സംസാരിക്കുന്നതിനിടെയാണ് ചെരിപ്പേറ് ഉണ്ടായത്. എന്നാൽ ഇമ്രാൻ ഖാന് അടുത്ത് നിന്ന പാർട്ടി നേതാവ് അലിം ഖാന്‍റെ ദേഹത്താണ് ചെരിപ്പ് പതിച്ചത്.

പാകിസ്ഥാനിലെ രാഷ്ട്രീയക്കാർക്ക് നേരെ ഒരാഴ്ചക്കിടെ ഉണ്ടാകുന്ന മൂന്നാമത്തെ ആക്രമണമാണിത്. കഴിഞ്ഞ ഞായറാഴ്‌ച മുൻ പ്രധാനമന്ത്രി നവാസ് ഷെരീഫിന് നേരെ വിദ്യാർഥികൾ ചെരിപ്പെറിഞ്ഞിരുന്നു. ഇതിൽ മൂന്ന് പേരെ പോലീസ് കസ്റ്റഡിയിലെടുത്തു. സിയാൽകോട്ടിൽ സംസാരിക്കുന്നതിനിടെ പാക് വിദേശ കാര്യ മന്ത്രി ഖ്വാജ ആസിഫിന്‍റെ മുഖത്ത് നേരെ ഒരാൾ മഷിയൊഴിച്ചിരുന്നു. മഷിയൊഴിച്ചയാളെ പിന്നീട് പോലീസ് കസ്റ്റഡിയിലെടുത്തു.