'തെറ്റായ ബുദ്ധിസം': സിചുവാനില്‍ ഇന്ത്യന്‍ സന്യാസിമാര്‍ക്ക് വിലക്ക്

ഹോങ്കോങ്ങ്: മതഭിന്നത വളര്‍ത്തുന്നു എന്നാരോപിച്ച് ചൈനയിലെ തെക്കുപടിഞ്ഞാറന്‍ സിചുവാന്‍ പ്രവിശ്യയില്‍ ഇന്ത്യന്‍ ബുദ്ധസന്യാസിമാര്‍ മതം പഠിപ്പിക്കുന്നതിന് വിലക്ക്.

ഇന്ത്യയില്‍ നിന്നുള്ള ബുദ്ധസന്യാസിമാര്‍ക്ക് എതിരെ മതം തെറ്റായി പഠിപ്പിച്ചതിന് കുറ്റം ചുമത്തിയതായും റിപ്പോര്‍ട്ടുണ്ട്. ലിട്ടാങ്ങ് പ്രദേശത്ത് ഇങ്ങനെ ചെയ്തതായി ഗ്ലോബല്‍ ടൈംസ് റിപ്പോര്‍ട്ട് ചെയ്യുന്നു.

ടിബറ്റന്‍ ബുദ്ധിസ്റ്റ് പഠനത്തിലെ ഏറ്റവും ഉയര്‍ന്ന ഡിഗ്രിയായ 'ഗെക്സ് ഹാരമ്പ' നേടുന്നവര്‍ക്ക് ലിട്ടാങ്ങില്‍ പ്രതിവര്‍ഷം ദേശഭക്തി ക്ലാസുകള്‍ സംഘടിപ്പിക്കാറുണ്ട്. ഇവരാണ് പിന്നീട് ബുദ്ധമതം പഠിപ്പിക്കുക. മറ്റു രാജ്യങ്ങളില്‍ നിന്ന് പഠിച്ചാലും ചൈനയില്‍ ബുദ്ധമതം പഠിപ്പിക്കണമെങ്കില്‍ ഈ ഡിഗ്രി കൂടിയേ തീരൂ.

ഇത്തരം ക്ലാസുകളില്‍ ശരിയായി പെരുമാറാതിരിക്കുക, അനൈക്യം വളര്‍ത്തുന്ന പ്രവൃത്തികളില്‍ ഏര്‍പ്പെടുക തുടങ്ങിയവ ഇവിടെ കൃത്യമായി നിരീക്ഷിക്കുകയും അതിനെതിരെ വേണ്ട നടപടികള്‍ കൈക്കൊള്ളുകയും ചെയ്യാറുണ്ട്.

ഗെക്സ് ഹാരമ്പ നല്‍കാന്‍ ചൈനയ്ക്ക് പ്രത്യേക നിയമങ്ങള്‍ ഉണ്ട്. പരീക്ഷയും സംവാദങ്ങളും അടക്കം നിരവധി കടമ്പകളാണ് ഇവര്‍ക്ക് മുന്നില്‍ ഉള്ളത്. 2004 മുതല്‍ ടിബറ്റന്‍ പ്രവിശ്യയില്‍ നിന്നും 105 പേരാണ് ഇതുവരെ ഈ ഡിഗ്രിക്ക് അര്‍ഹത നേടിയത്.