അഫ്‍ഗാനിസ്ഥാനില്‍ ആറ് ഇന്ത്യക്കാരെ തട്ടിക്കൊണ്ടുപോയി

കാബുള്‍: അഫ്‍ഗാനിസ്ഥാനില്‍ ആറ് ഇന്ത്യക്കാരെ തട്ടിക്കൊണ്ടുപോയി. അഫ്‍ഗാനിസ്ഥാനിലെ ബാഗ്‍ലന്‍ പ്രവശ്യയിലുള്ള ഒരു ഇന്ത്യന്‍ കമ്പനിയില്‍ ജോലി ചെയ്യുന്നവരെയാണ് തട്ടിക്കൊണ്ടുപോയത്. ഒരു അഫ്‍ഗാന്‍ സ്വദേശിയെയും ഇവര്‍ക്കൊപ്പം തട്ടിക്കൊണ്ടുപോയതായി മാധ്യമങ്ങള്‍ റിപ്പോര്‍ട്ട് ചെയ്‍തു.

ബാഗ്-എ-ഷമല്‍ എന്ന ഗ്രാമത്തില്‍ നിന്നാണ് ഇന്ത്യക്കാരെ തട്ടിക്കൊണ്ടുപോയതെന്ന് അഫ്‍ഗാനിസ്ഥാനിലെ വാര്‍ത്താ ഏജന്‍സി ടോളോ ന്യൂസ് റിപ്പോര്‍ട്ട് ചെയ്‍തു. കെഇസി എന്ന ഇന്ത്യന്‍ കമ്പനിക്കുവേണ്ടി ജോലി ചെയ്‍തിരുന്നവരാണ് ആറ് പേരും. ഇലക്ട്രിസിറ്റി സബ്‍ സ്റ്റേഷന്‍ പദ്ധതിയുടെ നിര്‍മ്മാണത്തിനായാണ് ഇവര്‍ അഫ്‍ഗാനിസ്ഥാനിലെത്തിയത്.

താലിബാന്‍ ആണ് തട്ടിക്കൊണ്ടുപോകലിന് പിന്നില്‍ എന്നാണ് പ്രാദേശിക സര്‍ക്കാര്‍ പറയുന്നത്. എന്നാല്‍ ഇതുവരെ ഒരു സംഘടനയും ഉത്തരവാദിത്തം ഏറ്റെടുത്തിട്ടില്ല.