മുഖം മറയ്‍ക്കുന്ന വസ്ത്രം നിരോധിച്ച് ശ്രീലങ്ക

കൊളംബോ: ഇസ്ലാമിക വസ്ത്രമായ ബുര്‍ഖ ഉള്‍പ്പെടെ മുഖം മറയ്ക്കുന്ന വസ്ത്രങ്ങള്‍ വിലക്കി ശ്രീലങ്ക സര്‍ക്കാര്‍. 300ല്‍ അധികം പേരുടെ മരണത്തിന് ഇടയാക്കിയ ഈസ്റ്റര്‍ ദിന ആക്രമണങ്ങളുടെ പശ്ചാത്തലത്തിലാണ് തീരുമാനം. സുരക്ഷ മുന്‍നിര്‍ത്തിയാണ് മുഖം മറയ്‍ക്കുന്ന വസ്ത്രങ്ങള്‍ നിരോധിക്കാന്‍ തീരുമാനിച്ചതെന്നാണ് ശ്രീലങ്ക പറയുന്നത്. ഇന്ന് മുതല്‍ വിലക്ക് പ്രാബല്യത്തിലാണ്.

ശ്രീലങ്ക പ്രസിഡന്‍റ്‍ മൈത്രിപാല സിരിസേനയാണ് വിലക്ക് പ്രഖ്യാപിച്ചത്. മുഖം മറയ്‍ക്കുന്ന വസ്ത്രങ്ങള്‍ നിരോധിക്കണമെന്ന് ഒരു എംപിയാണ് ആവശ്യപ്പെട്ടത്. ആക്രമണങ്ങളുടെ പശ്ചാത്തലത്തില്‍ കൊളംബോയിലെ ഒരു ഹോട്ടലും അതിഥികള്‍ മുഖം മറയ്ക്കുന്ന വേഷങ്ങള്‍ ധരിക്കരുതെന്ന് ആവശ്യപ്പെട്ടിരുന്നു.

ശ്രീലങ്കയിലെ ന്യൂനപക്ഷങ്ങളില്‍ ഉള്‍പ്പെട്ടതാണ് ക്രിസ്ത്യന്‍, മുസ്ലീം മതവിശ്വാസികള്‍. ഭീകരാക്രമണത്തിന് ശേഷം മുസ്ലീങ്ങളോടുള്ള പ്രതികരണം എങ്ങനെയാകുമെന്ന് ആശങ്കയിലായിരുന്നു ശ്രീലങ്കയിലെ മുസ്ലീങ്ങള്‍. ഇവരില്‍ പലരും വീടിന് പുറത്തുപോലും ഇറങ്ങിയിരുന്നില്ല.