ഇറ്റലിയിൽ ഭൂകമ്പത്തിൽ മരിച്ചവരുടെ എണ്ണം 159 കവിഞ്ഞു

ഇറ്റലി: ഇന്നലെ പുലർച്ചെ ഇറ്റലിയിലുണ്ടായ ഭൂകമ്പത്തിൽ മരിച്ചവരുടെ എണ്ണം 159 കവിഞ്ഞു.നിരവധി ആളുകൾ തകർന്ന കെട്ടിടങ്ങള്‍ക്കിടയിൽ കുടുങ്ങിക്കിടക്കുകയാണ് എന്നാണ് സൂചന. രക്ഷാ പ്രവർത്തനങ്ങൾ പുരോഗമിച്ചു കൊണ്ടിരിക്കുകയാണെന്ന് അധികൃതർ അറിയിച്ചു.

6.2 തീവ്രത റിക്ടർ സ്കെയിലിൽ അടയാളപ്പെടുത്തിയ ഭൂചലനം 140 കിലോമീറ്റർ ചുറ്റളവിലുള്ള ഇറ്റാലിയൻ മലനിരകളെയാണ് കൂടുതലായും ബാധിച്ചിട്ടുള്ളത്.ഭൂചലനം ഏറെ നാശം വിതച്ചിരിക്കുന്നത് അമാട്രിസ് നഗരത്തിലാണ്. അമാട്രിസിൽ 70 അതിഥികളുണ്ടായിരുന്ന ഹോട്ടലിൽനിന്നും 7 മൃതശരീരങ്ങൾ മാത്രമാണ് ഇപ്പോൾ കണ്ടു കിട്ടിയിരിക്കുന്നത്.

ഗ്രാമപ്രദേശമായ അഖുമോലിയില്‍ 8 മാസം പ്രായമുള്ള കുഞ്ഞും 9 വയസ്സുള്ള കുട്ടിയുമടക്കം ഒരു കുടുംബത്തിലെ നാല് അംഗങ്ങൾ ഭൂചലനത്തിൽ കൊല്ലപ്പെട്ടിട്ടുണ്ട്.എന്നാൽ പെസ്‌കാര ഡെൽ ട്രോൺടോ യിലെ തകർന്ന കെട്ടിടാവശിഷ്ടങ്ങൾക്കുള്ളിൽ കുടുങ്ങി കെടുന്നിരുന്ന പെൺകുട്ടിയെ രക്ഷാപ്രവർത്തകർ രക്ഷപ്പെടുത്തി. 17 മണിക്കൂറോളമാണ് പെൺകുട്ടി കെട്ടിടാവശിഷ്ടങ്ങൾക്കുള്ളിൽ കുടുങ്ങി കിടന്നത്.

ഇന്ന് കണ്ണീരിന്‍റെ ദിവസമാണെന്നും വരും ദിവസങ്ങളിൽ ഭൂചലന ബാധിത മേഖലകളുടെ പുനരുദ്ധാരണത്തെ കുറിച്ച് തീരുമാനം എടുക്കുമെന്നും ഇറ്റാലിയന്‍ പ്രധാനമന്ത്രി മാറ്റിയോ റെന്‍സി പറഞ്ഞു.പുനരുദ്ധാരണ പ്രവർത്തനങ്ങളെ കുറിച്ച് ചർച്ച ചെയ്യാൻ പ്രധാനമന്ത്രിയുടെ നേതൃത്വത്തിൽ കാബിനറ്റ് ചർച്ച വ്യാഴാഴ്ച നടക്കും.