കൊറോണവൈറസ് ചര്‍മ്മത്തില്‍ 9 മണിക്കൂറോളം സജീവം
കൊറോണവൈറസ് മനുഷ്യ ശരീരത്തില്‍ 9 മണിക്കൂറോളം സമയം സജീവമായി തുടരുന്നെന്ന് പഠനം. ജാപ്പനീസ് ഗവേഷകര്‍ കണ്ടെത്തിയ പഠനത്തില്‍ കൊവിഡ് മഹാമാരിയെ പ്രതിരോധിക്കാന്‍ പതിവായി കൈ കഴുകേണ്ടതിന്റെ ആവശ്യകത കാണിക്കുന്നു. ഇന്‍ഫ്‌ളുവന്‍സയ്ക്ക് കാരണമാകുന്ന രോഗാണുവിനേക്കാളും അധിക സമയം കൊറോണ വൈറസ് മനുഷ്യ ശരീരത്തില്‍ നിലനില്‍ക്കുമെന്നും പഠനം പറയുന്നു.
ഇന്‍ഫ്‌ളുവന്‍സ നിലനില്‍ക്കുന്നത് 1.8 മണിക്കൂറുകള്‍
ഇന്‍ഫ്‌ളുവന്‍സയ്ക്ക് കാരണമാകുന്ന രോഗാണു മനുഷ്യ ശരീരത്തില്‍ 1.8 മണിക്കൂറുകളോളം നിലനില്‍ക്കുന്നെന്ന് ക്ലിനിക്കല്‍ ഇന്‍ഫെക്ഷ്യസ് ഡിസീസസ് ജേര്‍ണലില്‍ പ്രസിദ്ധീകരിച്ച പഠനത്തില്‍ പറയുന്നു. 9 മണിക്കൂറോളം വൈറസ് ചര്‍മ്മത്തില്‍ തുടരുന്നത് സമ്പര്‍ക്കം വഴിയുള്ള രോഗസാധ്യത വര്‍ദ്ധിപ്പിക്കുമെന്നും ഗവേഷകര്‍ വ്യക്തമാക്കി. ഐഎവിയുമായി (ഇന്‍ഫ്‌ളുവന്‍സ എ വൈറസ്) താരതമ്യം ചെയ്യുമ്പോള്‍ കോണ്‍ടാക്ട് ട്രാന്‍സ്മിഷന്റെ അപകടസാധ്യത വര്‍ദ്ധിക്കാനിടയുണ്ട്.
പരിശോധിച്ചത് കൊവിഡ് ബാധിച്ച് മരിച്ചയാളുടെ മൃതദേഹം
കൊവിഡ് ബാധിച്ച് മരിച്ചയാളുടെ മൃതദേഹം പോസ്റ്റ്മാര്‍ട്ടം ചെയ്തതിന് ഒരു ദിവസം ശേഷം ശേഖരിച്ച ചര്‍മ്മത്തെ ഗവേഷണ സംഘം പരീക്ഷിച്ചു. ഹാന്‍ഡ് സാനിറ്റൈസറില്‍ ഉപയോഗിക്കുന്ന എഥനോള്‍ പുരട്ടിയതിന് ശേഷം 15 സെക്കന്റുകള്‍ക്കുള്ളില്‍ കൊറോണവൈറസും ഇന്‍ഫ്‌ളുവന്‍സയും നിര്‍ജ്ജീവമാകും.
അപകടസാധ്യത വര്‍ദ്ധിപ്പിക്കും
ചര്‍മ്മത്തില്‍ 9 മണിക്കൂറോളം നിലനില്‍ക്കുന്ന കൊറോണവൈറസ് അപകട സാധ്യത വര്‍ദ്ധിപ്പിക്കുന്നെന്നും പഠനം വ്യക്തമാക്കുന്നു. കൈ ശുചിത്വം പാലിക്കുന്നത് അപകടസാധ്യത കുറയ്ക്കുമെന്ന് പഠനം പറയുന്നു. കഴിഞ്ഞ വര്‍ഷം ഡിസംബറില്‍ ചൈനയില്‍ ആദ്യമായി പ്രത്യക്ഷപ്പെട്ടത് മുതല്‍ ലോകമെമ്പാടുമുള്ള 40 ദശലക്ഷം ആളുകളെ ബാധിച്ച ഈ വൈറസ് പകരുന്നത് പരിമിതപ്പെടുന്നതിന് സ്ഥിരവും സമഗ്രവുമായ കൈ കഴുകുന്നതിനുള്ള ലോകാരോഗ്യ സംഘടനയുടെ മാര്‍ഗ്ഗനിര്‍ദ്ദേശതത്തെ പഠനം പിന്തുണയ്ക്കുന്നു.