തായ്പെയ്: കൊറോണ വൈറസ് പടരന്നതിനിടയില് ചൈനയക്കെതിരെ ആരോപണവുമായി തായ്വാന്. ചൈനയുടെ ഇടപെടല് കാരണം ലോകാരോഗ്യ സംഘടനയുടെ സഹായം തായ്വാന് ലഭിക്കുന്നില്ലെന്നാണ് ആരോപണം. കൊറോണ വൈറസ് വ്യാപനവുമായി ബന്ധപ്പെട്ട വിവരങ്ങള് ലഭിക്കുന്നതും ചൈന തടയുകയാണെന്ന് തായ്വാന് ആരോപിക്കുന്നു.
Also Read: കൊറോണ ദുരന്തം മുന്കൂട്ടി കണ്ടു; സുഹൃത്തുക്കളെ അറിയിച്ച ഡോക്ടറോട് ചൈന ചെയ്തത്
തായ്വാന് ലോകാരോഗ്യ സംഘടനയില് അംഗമല്ല. ചൈനയുടെ എതിര്പ്പ് കാരണമാണ് തായ്വാന് അംഗത്വം ലഭിക്കാത്തത്. തായ്വാന് ചൈനീസ് പ്രവിശ്യയാണെന്നും അതിനാല് ചൈനയ്ക്ക് അംഗത്വമുള്ളതിനാല് തായ്വാന് പ്രത്യേകം അംഗത്വം വേണ്ടെന്നുമാണ് ചൈനയുടെ വാദം. എന്നാല് ഒരിക്കലും ചൈനയുടെ ഭാഗമല്ലെന്നാണ് തായ്വാന് പറയുന്നത്.
കൊറോണ വൈറസുമായി ബന്ധപ്പെട്ട എല്ലാ വിവരങ്ങളും തായ്വാന് നല്കിയിട്ടുണ്ടെന്നാണ് ചൈന തിങ്കളാഴ്ച ഡബ്ല്യുഎച്ച്ഒയെ അറിയിച്ചത്. ഇരു രാജ്യങ്ങളും തമ്മിലുള്ള ആശയവിനിമയം സുഗമമായാണ് നടക്കുന്നതെന്നും ചൈന പറഞ്ഞിരുന്നു.
Also Read: കൊറോണ പിടിമുറുക്കുന്നു; നേരിടുന്നതില് വീഴ്ചയെന്ന് സമ്മതിച്ച് ചൈന; ലോകം അതീവ ജാഗ്രതയില്
തായ്വാന് വളരെ പരിമിതമായ വിവരങ്ങള് മാത്രമാണ് ലഭിച്ചിട്ടുള്ളതെന്നാണ് തായ്വാന് വിദേശകാര്യ വക്താവ് ജൊവാന് ഓവ് പറഞ്ഞത്. വൈറസ് വലിയ ഭീഷണിയായിരിക്കുമ്പോഴും അവര് ഇപ്പോഴും ഒരു ചൈന എന്ന തത്വം പറയുകയാണ്. തായ്വാനെ ലോകാരോഗ്യ സംഘടയുടെ യോഗങ്ങളില് നിന്ന് വിലക്കുകയാണ്. - ജൊവാന് പറഞ്ഞു. രോഗത്തിന് അതിര്ത്തികളില്ലെന്നും ജനങ്ങളുടെ ആരോഗ്യത്തിനും സുരക്ഷയ്ക്കും മേല് രാഷ്ട്രീയ താത്പര്യം കാണിക്കുന്നത് ഹീനമാണെന്നും അവര് പറഞ്ഞു.
Also Read: കൊറോണ വൈറസ്: ഹോങ്കോങ്ങില് ഒരാള് മരിച്ചു; ചൈനയ്ക്ക് പുറത്ത് രണ്ടാമത്തെ മരണം
യുഎസ്, ജപ്പാന് തുടങ്ങിയ സുഹൃദ് രാജ്യങ്ങളില് നിന്നാണ് തായ്വാന് കൊറോണ വൈറസുമായി ബന്ധപ്പെട്ട വിവരങ്ങള് ലഭിക്കുന്നത്. തായ്വാന്റെ പ്രതിരോധ പ്രവര്ത്തനങ്ങള് ഫലപ്രദമാണെന്നും ജൊവാന പറഞ്ഞു.
തായ്വാനില് വൈറസ് ബാധിച്ചവരുടെ എണ്ണം തെറ്റായാണ് ഡബ്ല്യുഎച്ച്ഒ വെബ്സൈറ്റില് കൊടുത്തിരിക്കുന്നതെന്ന് തായ്വാന് ആരോഗ്യ മന്ത്രി ചെന് ഷി ചുങ് പറഞ്ഞു. തായ്വാനില് 13 പേര്ക്ക് വൈറസ് ബാധ സ്ഥിരീകരിച്ചതായാണ് ഡബ്ല്യുഎച്ച്ഒ പറയുന്നത്. എന്നാല് ഇത് തെറ്റാണ്. 10 പേര്ക്കാണ് ഇവിടെ രോഗം സ്ഥിരീകരിച്ചത്. തെറ്റായ വിവരം നല്കിയതിലുള്ള പ്രതിഷേധം ഡബ്ല്യുഎച്ച്ഒയെ അറിയിച്ചിട്ടുണ്ട്- ചെന് ഷി ചുങ് പറഞ്ഞു.