നോ​ർ​ത്തേ​ണ്‍ വെ​ള്ള കാ​ണ്ടാ​മൃ​ഗത്തിന്‍റെ അ​വ​സാ​ന ആ​ണ്‍തരിയും ച​ത്തു

നെയ്റോബി: ലോകത്ത് ജീവിച്ചിരുന്ന നോർത്തേണ്‍ വൈറ്റ് റിനോ(വെള്ള കാണ്ടാമൃഗം)യുടെ അവസാന ആണ്‍തരിയും ചത്തു. സുഡാൻ എന്നു പേരിട്ടിരുന്ന കാണ്ടാമൃഗത്തിനു 45 വയസായിരുന്നു. കെനിയയിലെ ഓൾ പെജിറ്റ കണ്‍സർവൻസിയായിരുന്നു ഈ കാണ്ടാമൃഗത്തെ സംരക്ഷിച്ചിരുന്നത്. ഓൾ പെജിറ്റ കണ്‍സർവൻസി അധികൃതരാണ് നോർത്തേണ്‍ വെള്ള കാണ്ടാമൃഗത്തിന്‍റെ അവസാന ആണ്‍തരിയും ചത്തെന്ന വിവരം മാധ്യമങ്ങളെ അറിയിച്ചത്.



കാലിൽ രൂപപ്പെട്ട അണുബാധയാണ് സുഡാന്‍റെ മരണകാരണമെന്നാണ് റിപ്പോർട്ടുകൾ. നെയ്റോബിയിൽ നിന്ന് 250 കിലോമീറ്റർ അകലെയുള്ള ഓൾ പെജിറ്റ കന്യമൃഗകേന്ദ്രത്തിലായിരുന്നു സുഡാന്‍റെ വാസം. നോർത്തേണ്‍ വൈറ്റ് റിനോയുടെ രണ്ട് ഉപവർഗങ്ങൾ മാത്രമേ ഇനി ലോകത്ത് അവശേഷിക്കുന്നുള്ളൂ. എന്നാൽ സഹാറ ആഫ്രിക്കയിൽ നിരവധി സതേണ്‍ വൈറ്റ് റിനോകൾ നിലവിലുണ്ടെങ്കിലും ഇവയുടെ നിലനിൽപ്പ് ഭീഷണിയിലാണ്.


കൊമ്പുകൾക്കായി ഇത്തരം കാണ്ടാമൃഗങ്ങളെ വേട്ടക്കാര്‍ വൻതോതിൽ ലക്ഷ്യം വയ്ക്കുന്നതാണ് വംശനാശഭീഷണിയ്ക്ക് കാരണം. ഒരു കിലോഗ്രാം നോർത്തേണ്‍ വൈറ്റ് റിനോയുടെ കൊമ്പിന് 50,000 ഡോളറാണ് വില. സ്വർണം, കൊക്കെയ്ൻ എന്നിവയേക്കാളേറെ വില കാണ്ടാമൃഗത്തിന്‍റെ കൊമ്പിന് കിട്ടുന്നു എന്നതാണ് ഇവയുടെ ജീവന് ഭീഷണിയാകുന്നത്.