മെകുനു ചുഴലിക്കാറ്റിൽ മൂന്നു മരണം: കാണാതായവരിൽ ഇന്ത്യക്കാരും

മസ്കത്ത്: യെമനിൽ നാശം വിതച്ച മെകുനു ചുഴലിക്കാറ്റ് ഒമാൻ്റെ ദക്ഷിണമേഖലയിൽ ശക്തമായതായി റിപ്പോര്‍ട്ട്. ദുരന്തത്തിൽ മൂന്നുപേര്‍ മരിച്ചതായും നിരവധി പേരെ കാണാതായതായും റിപ്പോര്‍ട്ടുണ്ട്. കാണാതായവരിൽ ഇന്ത്യക്കാരും ഉണ്ടെന്നാണ് ഖലീജ് ടൈംസ് റിപ്പോര്‍ട്ട്.

ചുഴലിക്കാറ്റ് ദോഫാര്‍ മേഖലയിലേയ്ക്ക് പ്രവേശിച്ചതായാണ് റിപ്പോര്‍ട്ട്. അടുത്ത 48 മണിക്കൂറിൽ ശക്തമായ മഴയ്ക്ക് സാധ്യതയുള്ളതായും കാലാവസ്ഥ നിരീക്ഷണവകുപ്പ് മുന്നറിയിപ്പ് നല്‍കുന്നുണ്ട്.

മണിക്കൂറിൽ 126 - 14 കിലോമീറ്റര്‍ വേഗതയിലാണ് ഇപ്പോള്‍ കാറ്റ് വീശുന്നത്. മേഖലയിൽ ശക്തമായ മഴയും രേഖപ്പെടുത്തി.

കാണാതായവരിൽ സ്വദേശികളെക്കൂടാതെ ഇന്ത്യക്കാരും സുഡാനികളും ഉള്‍പ്പെടുന്നുണ്ടെന്നാണ് റിപ്പോര്‍ട്ട്. ആയിരക്കണക്കിന് മൃഗങ്ങളെയും കാണാതായി. തീരദേശമേഖലയിൽ വൈദ്യുതിവിതരണ ശൃംഖല പൂര്‍ണമായും തകര്‍ന്നു. നിരവധി വാഹനങ്ങളും വെള്ളത്തിനടിയിലായി.