നന്ദികേട് കാണിക്കുന്നത് പാക്കിസ്ഥാൻ മാത്രമല്ലെന്ന് ട്രംപ്

വാഷിങ്ടൺ: പാക്കിസ്ഥാന് കഴിഞ്ഞ പതിനഞ്ച് വര്‍ഷമായി നല്‍കിവന്ന സാമ്പത്തികസഹായം നിര്‍ത്തലാക്കിയതിനു പിന്നാലെ പാലസ്തീനെതിരെ സമാനമായ ഭീഷണിയുമായി അമേരിക്കൻ പ്രസിഡന്‍റ് ഡോണള്‍ഡ് ട്രംപ്. പാലസ്തീൻ സമാധാനച‍ര്‍ച്ചകൾക്ക് താത്പര്യം കാണിക്കുന്നില്ലെന്നും പാലസ്തീനുള്ള എല്ലാ സാമ്പത്തികസഹായങ്ങളും നിര്‍ത്തലാക്കുമെന്നുമായിരുന്നു ട്രംപിന്‍റെ ഭീഷണി.

ഒരു കാര്യവുമില്ലാതെ കോടിക്കണക്കിന് ഡോളര്‍ നല്‍കി സഹായിക്കുന്നത് പാക്കിസ്ഥാനെ മാത്രമല്ലെന്ന ആമുഖവുമായാണ് ട്രംപ് പാലസ്തീനെതിരെ ട്വീറ്റ് ചെയ്തത്. പാലസ്തീന് വര്‍ഷങ്ങളായി കോടിക്കണക്കിന് ഡോളര്‍ സഹായമായി നല്‍കുന്നുണ്ടെങ്കിലും അതിനനുസരിച്ചുള്ള ബഹുമാനമോ പ്രതികരണമോ പാലസ്തീന്‍റെ ഭാഗത്തുനിന്നുണ്ടാകുന്നില്ലെന്ന് ട്രംപ് ആരോപിച്ചു.

ഏറ്റവും വലിയ തര്‍ക്കവിഷയമായ ജറുസലേം ചര്‍ച്ചയിൽ നിന്ന് മാറ്റിയിട്ടുപോലും പാലസ്തീൻ ഇസ്രയേലുമായുള്ള ചര്‍ച്ചകള്‍ക്ക് തയ്യാറാകുന്നില്ലെന്നും ഇതിന് ഇസ്രയേൽ വലിയ വില കൊടുക്കേണ്ടി വരുന്നതായും ട്രംപ് അഭിപ്രായപ്പെട്ടു. സമാധാനചര്‍ച്ചകളോട് മുഖം തിരിക്കാനാണെങ്കിൽ നമ്മളെന്തിനാണ് പാലസ്തീന് കോടിക്കണക്കിന് ഡോളര്‍ സഹായമായി നല്‍കുന്നതെന്നായിരുന്നു ട്രംപിന്‍റെ ചോദ്യം.

ജറുസലേമിനെ ഇസ്രയേലിന്‍റെ തലസ്ഥാനമാക്കി ട്രംപ് പ്രഖ്യാപിച്ചതിനെത്തുടര്‍ന്ന് പാലസ്തീൻ - ഇസ്രയേൽ ബന്ധം വഷളായിരുന്നു. ഇതിനെത്തുടര്‍ന്നുണ്ടായ സംഘര്‍ഷത്തിൽ ഇസ്രയേൽ സുരക്ഷാസേനയുമായുള്ള ഏറ്റുമുട്ടലിൽ 13 പാലസ്തീൻ പൗരന്മാരാണ് കൊല്ലപ്പെട്ടത്. എന്നാൽ ട്രംപിന്‍റെ പ്രഖ്യാപനത്തെ യുഎൻ പൊതുസഭ വോട്ടിനിട്ട് തള്ളിയിരുന്നു. ഇതിനു പിന്നാലെയാണ് യുഎസിന്‍റെ സമാധാനശ്രമങ്ങളുമായി സഹകരിക്കില്ലെന്ന് പാലസ്തീൻ വ്യക്തമാക്കിയത്.