ബര്‍ദുബായിലെ ഫ്ലാറ്റില്‍ പൊട്ടിത്തെറി: രണ്ട് മരണം; താമസക്കാരിലേറെയും ഇന്ത്യക്കാര്‍

ദുബായ്: ബര്‍ദുബായ് അല്‍ മന്‍ഖൂലിലെ ഫ്ലാറ്റിലുണ്ടായ പൊട്ടിത്തെറിയില്‍ രണ്ടുപേര്‍ മരിച്ചു. രണ്ടുപേര്‍ക്ക് ഗുരുതരമായി പരിക്കേറ്റു. ശനയാഴ്‍ച രാത്രി ഏഴുമണിക്കായിരുന്നു സ്ഫോടനം.

ഫ്ലാറ്റിലെ താമസക്കാരില്‍ ഭൂരിഭാഗവും ഇന്ത്യക്കാരാണ്. ഏഴ് നില കെട്ടിടത്തിന്‍റെ ആറാം നിലയിലെ സ്റ്റുഡിയോ ഫ്ലാറ്റിലാണ് സ്ഫോടനമുണ്ടായത്. സ്ഫോടനത്തില്‍ കെട്ടിടത്തിന്‍റെ ചുമരുകളും ജനാലകളും തകര്‍ന്നു. തൊട്ടടുത്ത ഫ്ലാറ്റിനും കേടുപറ്റിയിട്ടുണ്ട്. പാചകവാതക പൈപ്പ് ലൈന്‍ പൊട്ടിത്തെറിച്ചതാണെന്നാണ് സംശയിക്കുന്നത്.

സ്ഥലത്തെത്തിയ സിവില്‍ ഡിഫന്‍സ് വിഭാഗമാണ് രക്ഷാപ്രവര്‍ത്തനം നടത്തിയത്. കെട്ടിടത്തിലെ താമസക്കാരെ തൊട്ടടുത്ത ഹോട്ടല്‍ അപ്പാര്‍ട്ട്‍മെന്‍റിലേക്ക് മാറ്റി. പാചകവാതകത്തിന്‍റെ ഗന്ധം നിലനില്‍ക്കുന്നതിനാല്‍ പൈപ്പ് ലൈനിലെ ചോര്‍ച്ച പരിശോധിച്ച ശേഷം മാത്രമേ താമസക്കാരെ പ്രവേശിപ്പിക്കുകയുള്ളൂ എന്ന് അധികൃതര്‍ അറിയിച്ചു.

സ്ഫോടനമുണ്ടായപ്പോള്‍ മറ്റു ഫ്ലാറ്റുകളിലും വിറയല്‍ അനുഭവപ്പെട്ടതായി താമസക്കാര്‍ പറഞ്ഞു. മരിച്ചവരെക്കുറിച്ചുള്ള വിവരം പോലീസ് പുറത്തുവിട്ടിട്ടില്ല.