മംഗൂട്ട് ചുഴലിക്കാറ്റ്: ഫിലിപ്പീൻസിൽ 64 മരണം, ചൈനയിൽ റെഡ് അലര്‍ട്ട്

ഹോങ്കോങ്: ഫിലിപ്പീൻസിൽ വൻ നാശം വിതച്ച മംഗൂട്ട് ചുഴലിക്കാറ്റ് ദക്ഷിണ ചൈനയിലേയ്ക്ക് മാറുന്നു. കനത്ത മഴയെത്തുടര്‍ന്നുണ്ടായ മണ്ണിടിച്ചിലിൽ ഫിലിപ്പീൻസിൽ 64 പേരാണ് മരിച്ചത്. ചുഴലിക്കാറ്റ് മൂലം ദക്ഷിണ ചൈനയിൽ 24 ലക്ഷം പേരെ ഒഴിപ്പിക്കുകയും 50,000 മത്സ്യബന്ധന ബോട്ടുകള്‍ തിരികെ വിളിക്കുകയും ചെയ്തതായാണ് റിപ്പോര്‍ട്ട്.

വടക്കൻ ഫിലിപ്പീൻസിലെ പാവപ്പെട്ട ഖനിത്തൊഴിലാളികള്‍ പാര്‍ക്കുന്ന ഗ്രാമങ്ങളിലാണ് ശനിയാഴ്ച ചുഴലിക്കാറ്റ് നാശം വിതച്ചത്. 45 പേരെ പ്രദേശത്തുനിന്ന് കാണാതായിട്ടുണ്ട്. 33 പേര്‍ക്ക് അപകടങ്ങളിൽ പരിക്കേറ്റു.

കഴിഞ്ഞ ഒരു ദശകത്തിനുള്ളിൽ ഹോങ്കോങിൽ അടിക്കുന്ന ഏറ്റവും ശക്തമായ ചുഴലിക്കാറ്റായിരിക്കും ഇതെന്നാണ് ഹോങ്കോങ് ഒബ്സര്‍വേറ്ററി മുന്നറിയിപ്പ് നല്‍കിയിട്ടുള്ളത്. ചുഴലിക്കാറ്റിനെത്തുടര്‍ന്ന് ദക്ഷിണ ചൈനയിൽ റെഡ് അലര്‍ട്ട് പ്രഖ്യാപിച്ചിട്ടുണ്ട്.

വിക്ടോറിയ തുറമുഖത്ത് കനത്ത ജാഗ്രത പാലിക്കാൻ നിര്‍ദേശം നല്‍കിയിട്ടുണ്ട്. മകാവുവിലെ ചൂതാട്ട കേന്ദ്രങ്ങളും അടച്ചിരിക്കുകയാണ്. കനത്ത മഴയിൽ ഹോങ്കോങിലെ കെട്ടിടങ്ങള്‍ക്കും നാശമുണ്ടായിട്ടുണ്ട്. വിമാന സര്‍വീസുകളും റദ്ദാക്കി.