യുഎസ് സൈനിക ഹെലികോപ്റ്റർ തകർന്നു വീണെന്ന് സിറിയൻ വാർത്താ ഏജൻസി

ദമാസ്കസ്: യുഎസ് സൈനിക ഹെലികോപ്റ്റര്‍ സിറിയയിൽ തകര്‍ന്നു വീണതായി സര്‍ക്കാര്‍ വാര്‍ത്താ ഏജൻസിയുടെ റിപ്പോര്‍ട്ട്. പ്രദേശിക സോഴ്സുകളെ ഉദ്ധരിച്ച് സിറിയൻ ഭരണകൂട നിയന്ത്രണത്തിലുള്ള വാര്‍ത്താ ഏജൻസി എസ്എഎൻഎ ആണ് വാർത്ത പുറത്തു വിട്ടത്. സിറിയയിലെ അൽ-ഹസാകാ പ്രവിശ്യയിൽ കോപ്റ്റര്‍ തകര്‍ന്നു വീണെന്നാണ് റിപ്പോർട്ട്.

വടക്കുകിഴക്കൻ സിറിയയിലെ അൽ അൽ യാറൂബിയ പട്ടണത്തോടു ചേര്‍ന്നുള്ള ഗ്രാമപ്രദേശത്ത് യുഎസ് ഹെലികോപ്റ്റര്‍ തകര്‍ന്നു വീണെന്നാണ് റിപ്പോര്‍ട്ട്. ഇറാഖ് അതിര്‍ത്തിയോടു ചേര്‍ന്നുള്ള പ്രദേശമാണിത്. പ്രദേശത്ത് യുഎസ് സൈനിക വാഹനങ്ങള്‍ എത്തിയതായും വാര്‍ത്തയിൽ പറയുന്നുണ്ട്. എന്തു തരത്തിലുള്ള കോപ്റ്ററാണ് തകര്‍ന്നു വീണതെന്നോ അപകടത്തിൽ ആരെങ്കിലും മരിച്ചിട്ടുണ്ടോ എന്നും സംബന്ധിച്ച വിവരങ്ങള്‍ വാര്‍ത്താ ഏജൻസി പുറത്തു വിട്ടിട്ടില്ലെന്ന് റഷ്യൻ മാധ്യമമായ റഷ്യ ടുഡേ റിപ്പോര്‍ട്ട് ചെയ്യുന്നു.

Also Read: ചൈനയുടെ കൊവിഡ് വാക്സിൻ നവംബറിൽ പുറത്തിറങ്ങിയേക്കുമെന്ന് അധികൃതർ

പെൻ്റഗണോ യുഎസ് സൈന്യമോ റിപ്പോര്‍ട്ടിനെപ്പറ്റി ഇതുവരെ പ്രതികരിച്ചിട്ടില്ല. അപകടത്തിൻ്റെ കൂടുതൽ വിവരങ്ങള്‍ ലഭ്യമാകുന്നതേയുള്ളൂ.

Also Read: ഇന്ത്യ- ചൈന അതിര്‍ത്തി പ്രശ്‌നം ഇപ്പോഴും പരിഹരിക്കപ്പെട്ടിട്ടില്ലെന്ന് രാജ്‌നാഥ് സിങ്‌

2018ൽ സിറിയൻ അതിര്‍ത്തിയോടു ചേര്‍ന്ന് യുഎസ് സൈന്യത്തിൻ്റെ സികോര്‍സ്കൈ എച്ച്എച്ച് 60 പേവ് ഹോക്ക് ഹെലികോപ്റ്റര്‍ തകര്‍ന്നു വീണിരുന്നു. അപകടത്തിൽ കോപ്റ്ററിലുണ്ടായിരുന്ന ഏഴു പേരും കൊല്ലപ്പെട്ടിരുന്നു.