താലിബാൻ തീവ്രവാദികളെ തുരത്തണമെന്ന് പാക്കിസ്ഥാനോട് യുഎസ്

വാഷിങ്ടൺ: അഫ്ഗാൻ അതി‍ര്‍ത്തിയിൽ ഭീകരപ്രവര്‍ത്തനങ്ങളിലേര്‍പ്പെടുന്ന താലിബാൻ നേതാക്കളെ പിടികൂടുകയോ പുറത്താക്കുകയോ ചെയ്യണമെന്ന് പാക്കിസ്ഥാനോട് യുഎസ് ആവശ്യപ്പെട്ടു. പാക്കിസ്ഥാന്‍റെ സ്ഥലം ഭീകരപ്രവര്‍ത്തനങ്ങള്‍ക്ക് ഉപയോഗിക്കുന്നത് തടയണമെന്നാണ് ആവശ്യം. കാബൂളിൽ ഇന്‍റര്‍കോണ്ടിനെന്‍റൽ ഹോട്ടലിലുണ്ടായ ഭീകരാക്രമണത്തിൽ 22 പേര്‍ കൊല്ലപ്പെട്ടതിനു പിന്നാലെയാണ് പുതിയ ആവശ്യവുമായി അമേരിക്ക രംഗത്തെത്തിയിരിക്കുന്നത്.

അഫ്ഗാൻ സുരക്ഷാസേനയുടെ ശക്തമായ നിലപാടിനു പിന്തുണ നല്‍കുന്നതായും യുഎസ് സഹായത്തോടെ ശത്രുക്കളെ അഫ്ഗാൻ സേന നേരിടുകയാണെന്നും വൈറ്റ് ഹൗസ് പ്രസ് സെക്രട്ടറി സാറാ സാൻഡേഴ്സ് അറിയിച്ചു. സാധാരണക്കാര്‍ക്ക് നേരെയുള്ള ആക്രമങ്ങള്‍ വര്‍ദ്ധികകുന്നത് അഫ്ഗാനിസ്ഥാനു നല്‍കുന്ന പിന്തുണ വര്‍ദ്ധിപ്പിക്കാനാണ് യുഎസിനെ പ്രേരിപ്പിക്കുന്നതെന്നും അവര്‍ പറഞ്ഞു.

തീവ്രവാദത്തിനെതിരെ ശക്തമായ നിലപാടെടുക്കണമെന്ന് യുഎസ് മുൻപ് പലതവണ പാക്കിസ്ഥാനോട് ആവശ്യപ്പെട്ടിരുന്നു. ഭീകരവിരുദ്ധ പോരാട്ടത്തിനായി പാക്കിസ്ഥാനെ യുഎസ് സഹായിക്കുന്നുണ്ടെങ്കിലും പാക്കിസ്ഥാനിൽ നിന്ന് ചതിയും വഞ്ചനയും മാത്രമാണ് തിരിച്ചു കിട്ടുന്നതെന്ന് യുഎസ് പ്രസിഡന്‍റ് ഡോണൾഡ‍് ട്രംപും അഭിപ്രായപ്പെട്ടിരുന്നു.