പാകിസ്ഥാന്‍ ഭീകരതയെ പിന്തുണക്കുന്നുവെന്ന് യുഎസ് സെനറ്റ്

വാഷിങ്‍ടൺ: പാകിസ്ഥാന്‍റെ ഭീകരതയെ ഇന്ത്യ നിരന്തരം അപലപിച്ചു കൊണ്ടിരിക്കെ ഇതിനെ ശരിവെക്കുന്ന ആരോപണങ്ങളുമായി യുഎസ് രംഗത്ത്. പാകിസ്ഥാന്‍ ഭീകരരാഷ്ട്രമാണെന്നും ഭീകരരെ ഉപയോഗിച്ച് അഫ്ഘാനിസ്ഥാനിലുള്ള അമേരിക്കന്‍ സൈന്യത്തെ കൊന്നൊടുക്കുകയാണെന്നും യുഎസ് സെനറ്റ് ആരോപിച്ചു. പാകിസ്ഥാനിലെ നഗരങ്ങള്‍ ഭീകരര്‍ക്ക് സുരക്ഷിത താവളങ്ങള്‍ ആക്കി മാറ്റുകയാണെന്നും സെനറ്റ് അംഗങ്ങള്‍ ആരോപിക്കുന്നു.

യുഎസ് ഡ്രോൺ ആക്രമണങ്ങളില്‍ നിന്ന് രക്ഷപ്പെടുത്താന്‍ പാകിസ്ഥാന്‍ ഭീകരരെ ജനങ്ങള്‍ക്കിടയില്‍ സ്വതന്ത്രരായി നടക്കാന്‍ അനുവദിക്കുക്കുകയാണ്. ഹഖാനി ഭീകരര്‍ എവിടെയുണ്ട് എന്ന് പാകിസ്ഥാന് കൃത്യമായി അറിയാം. ആക്രമണങ്ങള്‍ ഉണ്ടാകുമ്പോളെല്ലാം പാകിസ്ഥാന്‍ ഭീകരര്‍ക്ക് വൈദ്യസഹായം കൊടുക്കുകയാണെന്നും യുഎസ് സെനറ്റിലെ റിപ്പബ്ലിക്കന്‍ അംഗം ബോബ് കോക്കര്‍ പറഞ്ഞു.

പാക് സര്‍ക്കാര്‍ സംരക്ഷിക്കുന്ന ഹഖാനി ഭീകരരാണ് അഫ്ഘാനിസ്ഥാനില്‍ യുഎസ് സൈനികരെ കൊന്നൊടുക്കുന്നതെന്നും യുഎസ് പാക് സര്‍ക്കാരിനോട് സഹകരിക്കുന്നുവെങ്കിലും അവര്‍ക്ക് ഇരട്ടത്താപ്പ് നയമാണെന്നും യുഎസ് ആരോപിച്ചു.