ട്രംപിന്റെ യാത്രാ വിലക്കിന് യു എസ് സുപ്രീകോടതിയുടെ അനുമതി

വാഷിങ്ടണ്‍: ആറ് മുസ്ലിം രാജ്യങ്ങളില്‍നിന്ന് അമേരിക്കയിലേയ്ക്കുള്ള പ്രവേശനം തടയുന്നതിന് ട്രംപ് ഭരണകൂടം കൊണ്ടുവന്ന യാത്രാ വിലക്കിനെ അനുകൂലിച്ച് യുഎസ് സുപ്രീം കോടതി. യാത്രാവിലക്ക് സംബന്ധിച്ച സര്‍ക്കാര്‍ ഉത്തരവ് പൂര്‍ണമായും നടപ്പില്‍ വരുത്തുന്നതിന് കോടതി അനുമതി നല്‍കി.

യാത്രാവിലക്ക് സംബന്ധിച്ച സര്‍ക്കാര്‍ ഉത്തരവ് ഭരണഘടനാപരമാണെന്ന വാദം സ്വീകരിച്ചിട്ടിലെങ്കിലും ഉത്തരവ് മരവിപ്പിക്കേണ്ട സാഹചര്യമില്ലെന്നാണ് കോടതി നിലപാട്. അഞ്ചുപേരടങ്ങുന്ന ബഞ്ചില്‍ മൂന്നു ജഡ്ജിമാരാണ് ഉത്തരവിന് അനുകൂലമായി നിലപാടെടുത്തത്.

അതേസമയം, നിയമം സംബന്ധിച്ച വ്യവഹാരങ്ങള്‍ കീഴ് കോടതികളില്‍ ഇപ്പോഴും നടന്നു വരികയാണ്. ഉത്തരവ് വിവേചനപരമാണെന്നും ഭരണഘടനാപരമായി നിലനില്‍ക്കില്ലെന്നും ചൂണ്ടിക്കാണിച്ച് സമര്‍പ്പിച്ച ഹര്‍ജി ഹൈക്കോടതിയില്‍ നിലവിലുണ്ട്. ഇറാന്‍, ലിബിയ, യെമെന്‍, സൊമാലിയ, സുഡാന്‍, സിറിയ എന്നീ ആറ് രാജ്യങ്ങളില്‍നിന്നുള്ള അഭയാര്‍ത്ഥികള്‍ക്കാണ് ട്രംപ് ഭരണ കൂടം വിലക്കേര്‍പ്പെടുത്തിയത്.