പാകിസ്ഥാന് എട്ട് എഫ്-16 വിമാനങ്ങള്‍: യുഎസ് കോണ്‍ഗ്രസിൽ ഭിന്നത

പാകിസ്ഥാന് എട്ട് എഫ്-16 വിമാനങ്ങള്‍ വില്‍ക്കാനുള്ള ഒബാമയുടെ തീരുമാനത്തില്‍ യുഎസ് കോണ്‍ഗ്രസ് അംഗങ്ങള്‍ക്ക് അഭിപ്രായ ഭിന്നത. ഈ വിമാനങ്ങള്‍ ഇന്ത്യയ്ക്കെതിരെ ഉപയോഗിക്കാന്‍ സാധ്യതയുണ്ടെന്ന് അവര്‍ ചൂണ്ടിക്കാട്ടി. തീരുമാനം പുനഃപരിശോധിക്കണമെന്ന് ആവശ്യപ്പെട്ടു.

കോണ്‍ഗ്രസിന്റെ വിദേശകാര്യ സമിതിയുടെ പാക്-അഫ്ഗാന്‍ ഉപസമിതി യോഗത്തിലാണു പാക്കിസ്ഥാന് അത്യാധുനിക പോര്‍വിമാനങ്ങള്‍ നല്‍കാനുള്ള തീരുമാനം തുറന്ന ചര്‍ച്ചയായത്. ഇന്ത്യ-പാക്ക് ബന്ധം വഷളായിരിക്കുന്ന സമയത്തു കൂടുതല്‍ ആയുധങ്ങള്‍ നല്‍കിയാല്‍ ഇന്ത്യയ്ക്കെതിരെ ഉപയോഗിക്കപ്പെടുമെന്നു താന്‍ ചൂണ്ടിക്കാട്ടിയതായി കോണ്‍ഗ്രസ് അംഗം മാറ്റ് സാല്‍മണ്‍ അറിയിച്ചു.

ഭീകരതയെ അടിച്ചമര്‍ത്തുക എന്ന സദുദ്ദേശ്യത്തോടെയാണു ഭരണകൂടം 70 കോടി ഡോളര്‍ വിലവരുന്ന വിമാനങ്ങള്‍ പാക്കിസ്ഥാനു വില്‍ക്കുന്നതെങ്കിലും അങ്ങനെ തന്നെ സംഭവിക്കണമെന്നില്ല. ഒട്ടേറെ അംഗങ്ങള്‍ തന്റെ നിലപാടിനോടു യോജിച്ചെന്നും മാറ്റ് സാല്‍മണ്‍ വെളിപ്പെടുത്തി.