മല്യയെ ഇന്ത്യയ്ക്കു കൈമാറല്‍; ഇന്ന് വീണ്ടും വാദം തുടങ്ങും

ലണ്ടൻ: വിവിധ ബാങ്കുകളില്‍ നിന്ന് കോടികളുടെ വായ്പയെടുത്ത് കടന്നു കളഞ്ഞ വിവാദ മദ്യവ്യവസായി വിജയ്മല്യയെ ഇന്ത്യയിലേക്കു മടക്കി അയയ്ക്കുന്നതു സംബന്ധിച്ച കേസിൽ ലണ്ടനിലെ വെസ്റ്റ്മിൻസ്റ്റർ മജിസ്ട്രേട്ട് കോടതിയിൽ തിങ്കളാഴ്ച്ച വാദം പുനരാരംഭിക്കും.

17 ബാങ്കുകളിൽനിന്നായി 9000 കോടി രൂപയുടെ വായ്പയെടുത്തു കടന്ന മല്യയ്ക്കായി ലണ്ടനിലെ മികച്ച അഭിഭാഷകരാണു ഹാജരാവുന്നത്. 14 വരെ വാദം തുടരുന്ന കേസിൽ ഈ വർഷം അവസാനത്തോടെ വിധിയുണ്ടായേക്കും. വിധി മല്യയ്ക്ക് എതിരായാൽ രണ്ടുമാസത്തിനകം ഇന്ത്യയ്ക്കു വിട്ടുകൊടുക്കേണ്ടി വരും.

മല്യയെ പാർപ്പിക്കാൻ മുംബൈ ആർതർ റോഡ് ജയിൽ തയാറാണെന്ന് ഇന്ത്യയ്ക്കുവേണ്ടി വാദിക്കുന്ന ക്രൗൺ പ്രോസിക്യൂഷൻ സർവീസ് (സിപിഎസ്) കോടതിയെ അറിയിക്കും. ഇന്ത്യൻ ജയിലുകൾ സുരക്ഷിതമല്ലെന്നും മനുഷ്യാവകാശ ലംഘനങ്ങൾ പതിവാണെന്നുമുള്ള മല്യയുടെ വാദത്തെ മറികടക്കാനാണ് ആർതർ റോഡ് ജയിലിലെ മികവുറ്റ സുരക്ഷാസംവിധാനങ്ങള്‍ ചൂണ്ടിക്കാട്ടിയുള്ള ഇന്ത്യയുടെ ശ്രമം.