'ഗ്രാമങ്ങളും അപകടത്തിൽ': യുഎസിൽ കൊവിഡ് വ്യാപനം 'പുതിയ ഘട്ടത്തിലെന്ന്' സർക്കാർ

വാഷിങ്ടൺ: രാജ്യത്ത് കൊവിഡ്-19 വ്യാപനം 'പുതിയ ഘട്ടത്തിലെ'ന്ന് യുഎസ് സര്‍ക്കാര്‍. യുഎസിലെ ഗ്രാമങ്ങളിൽ പോലും വൻനഗരങ്ങളിലേതിനു സമാനമായ വൈറസ് വ്യാപന ഭീഷണിയുണ്ടെന്ന് വൈറ്റ് ഹൗസിലെ കൊവിഡ് ഉപദേശക ഡെബോറാ ബിര്‍ക്സ് വ്യക്തമാക്കി. ഗ്രാമപ്രദേശങ്ങളിൽ വൈറസ് വ്യാപനം നിയന്ത്രിക്കാനുള്ള നടപടികള്‍ ആരംഭിച്ചതായും എന്നാൽ നിലവിലെ അവസ്ഥ മാര്‍ച്ചിലോ ഏപ്രിലിലോ ഉള്ള സാഹചര്യത്തിൽ നിന്ന് ഇപ്പോഴത്തെ സ്ഥിതി വ്യത്യസ്തമാണെന്നും അവര്‍ വാര്‍ത്താ ചാനലായ സിഎൻഎനിനോട് പറഞ്ഞു.

Also Read:'കുറ്റസമ്മതത്തോടെ ഓര്‍ക്കണം': കൊവിഡ് വ്യാപനം തടയുന്നതിൽ അലംഭാവമുണ്ടായെന്ന് മുഖ്യമന്ത്രി

രാജ്യത്ത് വൈറസ് അസാധാരണമായ വിധത്തിൽ പടര്‍ന്നതായാണ് യുഎസ് ഫെഡറൽ സര്‍ക്കാര്‍ സ്ഥിരീകരിക്കുന്നത്. നഗരപ്രദേശങ്ങളിലേതിനു തുല്യമായി ഗ്രാമങ്ങളിലും വൈറസ് പടര്‍ന്നു. ഗ്രാമങ്ങളിൽ താമസിക്കുന്നവര്‍ വൈറസിൽ നിന്ന് സുരക്ഷിതരല്ലെന്നും അവര്‍ വ്യക്തമാക്കി. "നാമൊരു പുതിയ ഘട്ടത്തിലാണ്" എന്നായിരുന്നു അവരുടെ വാക്കുകള്‍. ആളുകള്‍ മാസ്ക് ധരിക്കുകയും വ്യക്തിശുചിത്വം പാലിക്കുകയും സാമൂഹിക അകലം പാലിക്കുകയും ചെയ്യണമെന്നും അവര്‍ കൂട്ടിച്ചേര്‍ത്തു.

Also Read: രാജ്യം വിടാൻ അനുമതി വേണ്ട; അറ്റാഷെയുടെ പങ്കിനെപ്പറ്റി എൻഐഎ ഒന്നും പറഞ്ഞിട്ടില്ലെന്ന് വി മുരളീധരൻ

ഞായറാഴ്ച വരെയുള്ള ജോൺ ഹോപ്കിൻസ് സര്‍വകലാശാലയുടെ കണക്കുകള്‍ പ്രകാരം യുഎസിൽ 46,65,000ത്തിലധികം പേര്‍ക്കാണ് കൊവിഡ് സ്ഥിരീകരിച്ചത്. ഇതിൽ 1,54,834 പേര്‍ വൈറസ് ബാധിച്ചു മരിച്ചു. ലോകത്തു തന്നെ ഏറ്റവുമധികം പേര്‍ക്ക് വൈറസ് ബാധയേറ്റ രാജ്യമാണ് യുഎസ്. അതേസമയം, കഴിഞ്ഞ അഞ്ച് ദിവസമായി രാജ്യത്ത് പുതിയ കേസുകളുടെ എണ്ണത്തിൽ നേരിയ ഇടിവ് രേഖപ്പെടുത്തന്നുണ്ട്. അതേസമയം, കഴിഞ്ഞ അഞ്ച് ദിവസത്തിലാദ്യമായി യുഎസിൽ ഈ ഞായറാഴ്ച പുതുതായി 60,000 പേരിൽ താഴെ മാത്രമാണ് കൊവിഡ് സ്ഥിരീകരിച്ചത്.