വളര്‍ത്തുപൂച്ചയെ തല്ലിയ ഭര്‍ത്താവിനെ ഭാര്യ വെടിവെച്ചുകൊന്നു

ഡാലസ്: വീട്ടിൽ വളര്‍ത്തുന്ന പൂച്ചയെ തല്ലിയതിനെത്തുടര്‍ന്നുണ്ടായ തര്‍ക്കത്തിൽ ഭാര്യ ഭര്‍ത്താവിനെ വെടിവെച്ചുകാന്നു. ഡാലസിലെ ഫോര്‍ട്ട് വര്‍ത്ത് ഫാള്‍ മാനര്‍ ഡ്രൈവിലെ വീട്ടിലായിരുന്നു സംഭവം. രാവിലെ ഏഴുമണിയോടുകൂടിയായിരുന്നു മേരി ഹാരിസൺ ഭര്‍ത്താവ് ഡെക്സ്റ്റര്‍ ഹാരിസണെ വെടിവെച്ച് കൊന്നത്. മേരി തന്നെയാണ് വിവരം പോലീസിനെ അറിയിച്ചത്.

കുറച്ചുദിവസം മുൻപ് ഇവര്‍ വളര്‍ത്തുന്ന പൂച്ചയെ വീട്ടിൽ നിന്ന് കാണാതായിരുന്നു. തുടര്‍ന്ന് പൂച്ചയെ കണ്ടെത്താനായി ഇവര്‍ പരസ്യം നല്‍കിയിരുന്നു. തുടര്‍ന്ന് പൂച്ച തിരിച്ചെത്തിയതായും അയൽക്കാര്‍ പറയുന്നു.

വെടിയേറ്റു കിടന്ന ഡെക്സ്റ്ററിനെ പോലീസ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കൊലപാതകക്കുറ്റം ചുമത്തി അറസ്റ്റ് ചെയ്ത മേരിയെ ഡാലസ് കൗണ്ടി ജയിലിലടച്ചു. ഒരു ലക്ഷം ഡോളറിന്‍റെ ജാമ്യം ഇവര്‍ക്ക് അനുവദിച്ചിട്ടുണ്ട്.