പാക് മണ്ണിൽ ഭീകര പ്രവര്‍ത്തനങ്ങള്‍ അനുവദിക്കില്ലെന്ന് ഇമ്രാൻ ഖാൻ

ഇസ്ലാമാബാദ്: പാക് മണ്ണിൽ ഭീകര പ്രവര്‍ത്തനങ്ങള്‍ അനുവദിക്കില്ലെന്ന് പാകിസ്ഥാൻ പ്രധാനമന്ത്രി ഇമ്രാൻ ഖാൻ. മുൻ സര്‍ക്കാരുകള്‍ ഭീകരവാദത്തെ അംഗീകരിച്ചിരുന്നു. ഇവ‍ര്‍ തീവ്രവാദത്തിനെതിരെ ഒരു നടപടിയും സ്വീകരിച്ചില്ലെന്നും അദ്ദേഹം പറഞ്ഞു. തര്‍പാര്‍ക്കര്‍ ജില്ലിയിൽ നടന്ന പൊതുയോഗത്തിൽ സംസാരിക്കുകയായിരുന്നു ഇമ്രാൻ ഖാൻ.

പുതിയ സര്‍ക്കാര്‍ അധികാരത്തിൽ എത്തിയശേഷം ഭീകരവാദത്തിനെതിരെ ദേശീയ തലത്തിൽ നടപടി സ്വീകരിച്ചു. എന്നാൽ അയൽ രാജ്യങ്ങളിൽ നിന്ന് സമാധാന ലംഘനം ഉണ്ടാകുകയാണെങ്കിൽ തിരിച്ചടിക്കുമെന്നും ഇമ്രാൻ ഖാൻ പറഞ്ഞു.

ഞങ്ങള്‍ക്ക് യുദ്ധമല്ല സമാധാനമാണ് ആവശ്യം. എന്നാൽ ഇന്ത്യയുടെ ഭാഗത്തു നിന്ന് ആക്രമണങ്ങള്‍ ഉണ്ടായാൽ ശക്തമായ രീതിയിൽ മറുപടി നൽകും. അവസാന ശ്വാസം വരെ പോരാടും. പാകിസ്ഥാനികളെ കൊലപ്പെടുത്തിയിട്ട് തിരഞ്ഞെടുപ്പ് വിജയിക്കാൻ നോക്കേണ്ടെന്നും അദ്ദേഹം പറഞ്ഞു.