മസ്കാര ഇടുമ്പോൾ വരുത്തുന്ന തെറ്റുകൾ

മുഖത്ത് പ്രകടമായ വ്യത്യാസം വരുത്താൻ കഴിവുള്ള സൗന്ദര്യവർധക വസ്തുവാണ് മസ്കാര. ശരിയായി എഴുതിയാൽ സ്വാഭാവികമായ ഭംഗിയും സൗന്ദര്യവും മസ്കാര നൽകും. കണ്ണിന്‍റെ ക്ഷീണം കുറവായി തോന്നിക്കാനും മസ്കാര ഉപയോഗിക്കുന്നത് നല്ലതാണ്. മസ്കാര ഇടുമ്പോൾ സാധാരണയായി വരാവുന്ന തെറ്റുകൾ നോക്കാം.

പടർന്നൊലിക്കുന്ന മസ്കാര

വൈകിട്ട് വീട്ടിലെത്തി നോക്കുമ്പോൾ മസ്കാര മുഴുവൻ പടർന്നൊലിച്ചിരിക്കുകയാണോ... എങ്കിൽ നിങ്ങൾ തെറ്റായ മസ്കാരയാണ് തെരഞ്ഞെടുത്തിരിക്കുന്നത്. ദിവസം മുഴുവൻ നിൽക്കാൻ വാട്ടർപ്രൂഫ് മസ്കാരയാണ് നല്ലത്. ഓയിൽ അടങ്ങിയ ഐ ക്രീം ഉപയോഗിക്കുന്നത് മസ്കാര പടരാൻ കാരണമാവും. വാട്ടർ ബേസ്ഡ് അണ്ടർ ഐ ക്രീം ഉപയോഗിക്കുക

പെട്ടെന്ന് ഉണങ്ങിപ്പോകുന്ന മസ്കാര

വല്ലപ്പോഴും മാത്രമേ മസ്കാര ഉപയോഗിക്കുന്നുളളൂവെങ്കിൽ മസ്കാര സ്റ്റോക് ചെയ്യാതിരിക്കുക. എല്ലാ ദിവസവും ഉപയോഗിക്കുകയാണെങ്കിൽ മസ്കാര പെട്ടെന്ന് ഉണങ്ങിപ്പോകില്ല. വില കൂടിയ മസ്കാര വാങ്ങാതിരിക്കുക. കാരണം മൂന്ന്, നാല് മാസം വരെ മാത്രമേ മസ്കാര സൂക്ഷിക്കാവൂ. വിശ്വസിക്കാവുന്ന ഗുണമേന്മയുള്ള ബ്രാൻഡ് നോക്കി വാങ്ങുക.

മോശം മസ്കാര ബ്രഷ്

മസ്കാര മാത്രമല്ല, ഉപയോഗിക്കുന്ന ബ്രഷും നല്ലതായിരിക്കണം. എങ്കിൽ മാത്രമേ നല്ല രീതിയിൽ കൺപീലികളിൽ മസ്കാര എഴുതാൻ സാധിക്കൂ...പിരിയൻ ആക‍ൃതിയിലുള്ള ബ്രഷാണ് നല്ലത്. മാത്രവുമല്ല മസ്കാര ഉപയോഗിക്കുമ്പോൾ കണ്ണിനടിയിലായി ടിഷ്യു ഉപയോഗിക്കുക. അത് മുഖത്തേക്ക് മസ്കാര പടരുന്നത് തടയും.

മേയ്ക്കപ്പ് റിമൂവർ

വാട്ട‍ർ‍പ്രൂഫ് മസ്കാരയാണ് ഉപയോഗിക്കുന്നതെങ്കിൽ നല്ലൊരു ഐ മേയ്ക്കപ്പ് റിമൂവർ കൂടി വാങ്ങുക. ഉണങ്ങിയിരിക്കുന്ന മസ്കാര വലിച്ച് പറിക്കാനോ അമർത്തി ഉരസാനോ പാടില്ല. ഇത് കണ്ണിന് ചുറ്റുമുള്ള ചർമത്തിന് ദോഷം ചെയ്യും.