കുട്ടികളെ ഒരുക്കുമ്പോൾ ഈ കാര്യങ്ങൾ കൂടി ശ്രദ്ധിക്കുക

ഷോപ്പിങിനോ വിനോദയാത്രയ്ക്കോ മറ്റു ചടങ്ങുകൾക്കോ കുട്ടികളെ കൊണ്ടുപോകുമ്പോൾ അവരെ നന്നായി ഒരുക്കി കൊണ്ടു പോകാൻ എല്ലാവരും ശ്രദ്ധിക്കാറുണ്ട്. എന്നാൽ കാഴ്ച്ചയിൽ ഭംഗിയുള്ള വസ്ത്രങ്ങളും ആക്സസറികളും തെരഞ്ഞെടുക്കുമ്പോൾ ശ്രദ്ധിക്കേണ്ട മറ്റു ചില കാര്യങ്ങളുമുണ്ട്.

1. കാഴ്ച്ചയിൽ മാത്രം പോരാ ഗുണം

കാഴ്ച്ചയിൽ ഭംഗിയുള്ള വസ്ത്രങ്ങൾക്ക് എപ്പോഴും മികച്ച നിലവാരമുണ്ടായിരിക്കണമെന്ന് നിര്‍ബന്ധമില്ല. കോട്ടണ്‍ വസ്ത്രങ്ങളായായും സിന്തറ്റിക് ആണെങ്കിലും വസ്ത്രങ്ങൾ മികച്ച നിലവാരത്തിലുള്ളവയാണെന്ന് ഉറപ്പാക്കണം. കുട്ടികളുടെ ചര്‍മ്മം ലോലമായതിനാൽ നിലവാരം കുറഞ്ഞ വസ്ത്രങ്ങള്‍ ത്വക്ക് രോഗങ്ങൾക്ക് കാരണമായേക്കും.

2. നിറങ്ങളും സുരക്ഷിതമാകണം

വസ്ത്രങ്ങൾക്ക് നിറം നല്‍കുന്ന രാസപദാര്‍ത്ഥങ്ങൾ പലപ്പോഴും ആരോഗ്യത്തിന് ഹാനികരമാകാറുണ്ട്. മുൻനിര ബ്രാൻഡുകളുടെ വസ്ത്രങ്ങൾ പരിശോധനകൾക്ക് ശേഷമാണ് വിപണിയിലെത്തുന്നത് എന്നതിനാൽ അവയാണ് കൂടുതൽ സുരക്ഷിതം.

3. മുറിവുകളുണ്ടാകുന്ന വസ്ത്രങ്ങൾ

പിറന്നാൾ ആഘോഷത്തിനും മറ്റും കുട്ടികളെ ധരിപ്പിക്കുന്ന വസ്ത്രങ്ങളിലെ മുത്തുകളും സീക്വൻസുകളും ദേഹത്ത് പോറലുകളും മുറിവുകളും ഉണ്ടാക്കുന്നില്ലെന്ന് ഉറപ്പാക്കണം. ഇത് പിന്നീട് അണുബാധയ്ക്ക് കാരണമായേക്കാം.

4. കുട്ടികൾക്കുമുണ്ട് ഫാഷൻ സ്വപ്നങ്ങൾ

കുട്ടികളുടെ പ്രായത്തിനിണങ്ങിയ ഡിസൈനുകള്‍ വേണം തെരഞ്ഞെടുക്കാൻ. വസ്ത്രങ്ങളിലെ എഴുത്തുകൾക്കും ചിത്രങ്ങൾക്കും ദ്വയാ‍ര്‍ത്ഥങ്ങളൊന്നുമില്ലെന്ന് ഉറപ്പാക്കണം. വസ്ത്രങ്ങൾ തെരഞ്ഞെടുക്കുമ്പോൾ കുട്ടികളുടെ ഇഷ്ടങ്ങൾക്കും പരിഗണന നല്‍കണം. അതുപോലെ തന്നെ അമിതമായി ആഭരണങ്ങൾ ധരിപ്പിക്കുന്നതും കുട്ടികൾക്ക് ഇഷ്ടപ്പെടാറില്ല.

5. ഒരുപോലുള്ള വസ്ത്രങ്ങൾ വേണ്ട

വീട്ടിൽ ഒന്നിലധികം കുട്ടികളുണ്ടെങ്കിൽ അവരെ ഇരട്ടകളെപ്പോലെ വസ്ത്രം ധരിപ്പിക്കണമെന്ന് നിര്‍ബന്ധമില്ല. കുട്ടികൾക്ക് അവരുടേതായ ഇഷ്ടങ്ങളും ഫാഷൻ താത്പര്യങ്ങളുമുണ്ടെന്നത് മറക്കരുത്.