മുഖത്ത് കട്ടന്‍ ചായ തേച്ചു നോക്കിക്കേ, കാര്യം...

ഗ്രീൻ ടീ, കട്ടൻ ചായ എന്നിവ ശക്തമായ കാറ്റെച്ചിനുകളും പോളിഫെനോളുകളും അടങ്ങിയതാണ്. ഇത് ശരീരത്തിൽ നിന്ന് ഹാനികരമായ വിഷവസ്തുക്കളെ അകറ്റുന്നതിനും ചർമ്മത്തിന്റെ ആരോഗ്യം കാത്തു സൂക്ഷിയ്ക്കുന്നതിനും ചര്‍മ പ്രശ്‌നങ്ങളും അകറ്റുന്നതിനും നല്ലതാണ്. ചർമ്മത്തിലെ അണുബാധകൾ, മുഖക്കുരു, കളങ്കം എന്നിവയ്ക്കെതിരെ ഇത് പോരാടുകയും വാർദ്ധക്യത്തിന്റെ ലക്ഷണങ്ങൾ വൈകിപ്പിക്കാൻ സഹായിക്കുകയും ചെയ്യുന്നു.

മുഖക്കുരു ഉണ്ടാക്കുന്ന ബാക്ടീരിയകളോട് പോരാടാനും ചർമ്മത്തിന്റെ പിഎച്ച് സന്തുലിതാവസ്ഥ നിലനിർത്താനും ചായയുടെ പ്രകൃതിദത്തമായ സ്വഭാവഗുണങ്ങൾ സഹായിക്കുന്നു. ചർമ്മത്തിന് അനുയോജ്യമായ പോഷകങ്ങളും പ്രയോജനകരമായ സസ്യ സംയുക്തങ്ങളും അടങ്ങിയ ചായ ചർമ്മ വീക്കം കുറയ്ക്കാൻ സഹായിക്കുകയും കൊളാജൻ ഉൽപാദനത്തെ ഉത്തേജിപ്പിക്കുകയും ചെയ്യുന്നു. ആൻറി ഇൻഫ്ലമേറ്ററി ഗുണങ്ങൾ സൂക്ഷ്മാണുക്കളെ ചെറുക്കാനും ചർമ്മത്തിന് ജലാംശം നൽകാനും ചർമ്മത്തിലെ അണുബാധകളെ അകറ്റാനും സഹായിക്കുന്നു.

കഫീന്റെയും ടാന്നിന്റെയും ഗുണം ചർമ്മത്തിന് കീഴിലുള്ള രക്തക്കുഴലുകൾ ചുരുക്കാനും ഇരുണ്ട വൃത്തങ്ങളെ ഇല്ലാതാക്കാനും കണ്ണുകൾക്ക് ചുറ്റുമുള്ള വീക്കം കുറയ്ക്കാനും സഹായിക്കുന്നു. പോളിഫെനോളിക് സംയുക്തം നിറഞ്ഞ ടാന്നിക് ആസിഡ് അടങ്ങിയ ചായ വെയിലേറ്റത് മൂലമുണ്ടാകുന്ന കരുവാളിപ്പും ഇല്ലാതാക്കാൻ സഹായിക്കുന്നു. ചര്‍മത്തിന് തിളക്കം നല്‍കി ക്ഷീണമകറ്റാന്‍ കട്ടന്‍ ചായ മുഖത്ത് പുരട്ടുന്നത് ഏറെ നല്ലതാണ്.

ചർമ്മം വൃത്തിയാക്കുവാനും മാലിന്യങ്ങൾ നീക്കം ചെയ്യുന്നതിനും രണ്ട് ടേബിൾ സ്പൂൺ കട്ടൻ ചായ ഒരു ടേബിൾ സ്പൂൺ തേനുമായി കലർത്തി മുഖത്ത് ഉടനീളം പുരട്ടുക. ഈ പ്രകൃതിദത്ത ക്ലെൻസർ വളരെയധികം ഫലപ്രദമാണ്.ചുണ്ടുകളുടെ അസ്വസ്ഥത അകറ്റുവാനും അവയ്ക്ക് ഈർപ്പം പകരുവാനും ടീ ബാഗുകൾ ചുണ്ടുകളിൽ തടവുക. ചായയുടെ സത്ത് മുഖക്കുരു ഉള്ള ഭാഗങ്ങളിൽ പുരട്ടുക. ഇത് കുരുക്കൾ വേഗത്തിൽ അകറ്റുവാൻ സഹായിക്കുന്നു.