പെട്ടന്ന് ഭാരം കുറയുന്നത് ഈ രോഗ ലക്ഷണങ്ങളാകാം, സൂക്ഷിക്കുക

കലോറി, കഴിക്കുന്ന ഭക്ഷണം, വ്യായാമം, മൊത്തത്തിലുള്ള ആരോഗ്യം, മെഡിക്കൽ അവസ്ഥകൾ, പ്രായം, ലിംഗഭേദം, മറ്റ് സാമൂഹിക ഘടകങ്ങൾ എന്നിങ്ങനെയുള്ള വിവിധ ഘടകങ്ങൾ ഒരു വ്യക്തിയുടെ മൊത്തത്തിലുള്ള ശരീര ഭാരം നിർണ്ണയിക്കുന്നു. ശരീരഭാരം കൂടുന്നത് ആരോഗ്യത്തിന് തന്നെ ഭീഷണിയാണ്. അതുകൊണ്ടാണ് പല ആളുകളും ഭാരം ആരോഗ്യകരമായ രീതിയിൽ നിലനിർത്തുവാനുള്ള മാർഗ്ഗങ്ങൾ സ്വീകരിക്കുന്നത്. ഭക്ഷണ ശീലത്തിൽ മാറ്റങ്ങൾ വരുത്തുന്നതും പതിവായ വ്യായാമവുമെല്ലാം ഇതിനുള്ള മാർഗ്ഗങ്ങളാണ്. എന്നാൽ പ്രത്യേകിച്ച് ശ്രമിക്കാതെ തന്നെ ശരീര ഭാരം കുറയുന്നത് അത്ര നല്ലതല്ല. അസന്തുലിതമായ ശാരീരിക അവസ്ഥ മൂലം പെട്ടെന്ന് ശരീരഭാരം കുറയാം. ഇത് ഒരുപക്ഷെ ഏതെങ്കിലും രോഗത്തിന്റെ ലക്ഷണമാകാം(Weight Loss). അതിനാൽ പെട്ടെന്ന് ശരീരഭാരം കുറയുന്നത് ശ്രദ്ധയിൽപ്പെട്ടാൽ, ഉടൻ തന്നെ ഒരു ഡോക്ടറെ സമീപിച്ച് സ്ഥിതിഗതികൾ വിലയിരുത്തുക.6 മുതൽ 12 മാസങ്ങൾക്കുള്ളിൽ നിങ്ങളുടെ ഭാരത്തിന്റെ 5%-ൽ കൂടുതൽ കുറയുകയാണെങ്കിൽ,ഉടൻ തന്നെ ഡോക്ടറെ കാണേണ്ടതാണ്. പ്രത്യേകിച്ച് നിങ്ങൾ പ്രായപൂർത്തിയായ ആളാണെങ്കിൽ. പെട്ടെന്ന് ഒരു കാരണവുമില്ലാതെ ശരീരഭാരം കുറയുന്നത് ഒരു ആരോഗ്യപ്രശ്നത്തിന്റെ ലക്ഷണമാകാം.

പെട്ടന്ന് ഭാരം കുറയുന്നതിന്റെ വിവിധ കാരണങ്ങൾ

ഹൈപ്പർതൈറോയിഡിസം, പ്രമേഹം, സമ്മർദ്ദം, ക്യാൻസർ, സിഒപിഡി, ഹൃദ്രോഗം, ഡിമെൻഷ്യ അഥവാ മറവിരോഗം എന്നിവയാണ് ആളുകൾക്ക് പെട്ടെന്ന് തടി കുറയുന്നതിന്റെ സാധാരണ കാരണങ്ങളായി പറയപ്പെടുന്നത്.

പ്രമേഹം

മിക്ക ആരോഗ്യ പ്രശ്നങ്ങൾക്കും ഒരു നിശ്ശബ്ദമായ കാരണമായ പ്രമേഹം പല ആളുകളിലും ശരീരഭാരം പെട്ടന്ന് കുറയാൻ ഇടയാക്കുന്നു. ഇൻസുലിൻ അപര്യാപ്തമായതിനാൽ, ശരീരത്തിലെ കോശങ്ങൾ കൊഴുപ്പും പേശികളും ഊർജ്ജത്തിനായി ഉപയോഗിക്കാൻ തുടങ്ങുന്നു, അങ്ങനെ മൊത്തത്തിലുള്ള ശരീരഭാരം കുറയുന്നതിന് കാരണമാകും.

ഹൈപ്പർതൈറോയിഡിസം

ഈ അവസ്ഥയിൽ ശരീരത്തിൽ കൂടുതൽ തൈറോയ്ഡ് ഹോർമോൺ ഉൽപ്പാദിപ്പിക്കപ്പെടുമ്പോൾ, ശരീരത്തിന്റെ മൊത്തത്തിലുള്ള മെറ്റബോളിസം കൂടുതൽ കലോറി എരിച്ച് കളയുന്നു, അതിനാൽ നിങ്ങൾ ശ്രമിക്കാതെ തന്നെ ശരീരഭാരം കുറയ്ക്കുന്നു. ശരീരഭാരം കുറയ്ക്കുന്നതിനു പുറമേ, ഈ അവസ്ഥയിൽ ഒരാൾക്ക് ഇടയ്ക്കിടെയുള്ള മലവിസർജ്ജനവും ഹൃദയമിടിപ്പ് വർദ്ധിക്കുന്നതും അനുഭവപ്പെടാം.

സമ്മർദ്ദം

ദഹനനാളത്തിന്റെ പ്രവർത്തനത്തെയും ഉപാപചയ നിരക്കിനെയും ബാധിക്കുന്ന ഹോർമോണുകളുടെ രൂപീകരണത്തിന് സമ്മർദ്ദം കാരണമാകുന്നു. സമ്മർദ്ദംശരീര ഭാരത്തെ ബാധിക്കുമെന്ന് അറിയാമോ? ഇത് ഒന്നുകിൽ കഠിനമായ തരത്തിൽ ശരീരഭാരം വർദ്ധിപ്പിക്കും അല്ലെങ്കിൽ ഗുരുതരമായ രീതിയിൽ ശരീരഭാരം കുറയ്ക്കാനും ഇടയാക്കും.
ശരീരം നൽകും ഈ സൂചനകൾ സിങ്കിന്റെ കുറവ് മൂലമാകാം, ശ്രദ്ധിക്കുക
ഹൃദ്രോഗം

ഹൃദയ സംബന്ധമായ രോഗങ്ങൾ ഉണ്ടെങ്കിൽ അതും ശരീരഭാരത്തെ ബാധിച്ചേക്കാം. പെട്ടന്ന് ഭാരം കുറയുന്നതിന് ഹൃദ്രോഗം ഒരു കാരണമാണ്.

ക്യാൻസർ

ക്യാൻസറിന്റെ ആദ്യ ലക്ഷണങ്ങളിലൊന്ന് ശരീരഭാരം കുറയുന്നതാണ്. രോഗനിർണയം നടത്തുന്നവരിൽ 40% പേരും വിശദീകരിക്കാനാകാത്ത വിധം വണ്ണം കുറയുന്നു എന്ന ലക്ഷണവുമായാണ് എത്തുന്നത്. ക്യാൻസറിന്റെ കൂടിയ അവസ്ഥയിലൂടെ കടന്നു പോകുന്ന 80% ആളുകളിലും ശരീരഭാരം കുറയുന്നത് നിരീക്ഷിക്കപ്പെടുന്നു. അന്നനാളം, പാൻക്രിയാസ്, ആമാശയം, ശ്വാസകോശം എന്നിവിടങ്ങളിലെ ക്യാൻസറുകൾ ശരീരഭാരം കുറയ്ക്കാൻ കാരണമാകുന്നു.

ക്രോണിക് ഒബ്‌സ്ട്രക്റ്റീവ് പൾമണറി ഡിസീസ് (COPD)

ശ്വാസകോശം ശരിയായി പ്രവർത്തിക്കാത്തതും ആരോഗ്യത്തെ പ്രതികൂലമായി ബാധിക്കുന്ന ഒരു ഘടകമാണ്. ശ്വസിക്കുന്നതിനായി ശരീരം കഠിനമായ പ്രവർത്തന ഘട്ടത്തിലൂടെ കടന്നുപോകുന്നു, ഇത് കലോറികൾ 10 മടങ്ങ് വേഗത്തിൽ കത്തിക്കുന്നു, അങ്ങനെ ശരീരഭാരം കുറയുന്നത് സിഒപിഡി യുടെ ഒരു പ്രധാന ലക്ഷണമാക്കി മാറ്റുന്നു.

ഡിമെൻഷ്യ

മറവി രോഗവും ശരീരഭാരം കുറയുന്നതും തമ്മിൽ ബന്ധമുണ്ടെന്നാണ് പറയപ്പെടുന്നത്. ഇത് നിങ്ങളുടെ അടിസ്ഥാന ഓർമ്മശക്തി, സാമൂഹിക കഴിവുകൾ തുടങ്ങിയവയെ ദുർബലപ്പെടുത്തുന്നു. പിന്നീടുള്ള ഘട്ടങ്ങളിൽ, നിങ്ങൾ ഭക്ഷണം കഴിക്കാൻ മറക്കുന്നതിനാലോ ചവയ്ക്കാനോ വിഴുങ്ങാനോ ബുദ്ധിമുട്ടായതിനാലോ നിങ്ങൾക്ക് വളരെയധികം ഭാരം കുറയാം. ഡിമെൻഷ്യ ബാധിച്ച രണ്ടോ മൂന്നോ വ്യക്തികളിൽ ഒരാൾക്ക് ശരീരഭാരം കുറയുന്നതായി പഠനങ്ങൾ വെളിപ്പെടുത്തുന്നു.