മുടി തഴച്ച് വളരാൻ ഈ എണ്ണ മാത്രം മതി

മുടിയ്ക്ക് എപ്പോഴും നല്ലത് വെളിച്ചെണ്ണ ഉപയോ​ഗിക്കുന്നതാണ്. വെളിച്ചെണ്ണയിൽ അടങ്ങിയിരിക്കുന്ന പല ഘടകങ്ങളും മുടി വളർച്ചയ്ക്ക് ഏറെ നല്ലതാണ്. ശിരോചർമ്മത്തിൽ ആഴത്തിൽ ഇറങ്ങി മുടിയ്ക്ക് വേണ്ട പോഷകങ്ങൾ നൽകാൻ വെളിച്ചെണ്ണ ഏറെ സഹായിക്കും. മുടി നന്നായി തഴച്ച് വളരാൻ വെളിച്ചെണ്ണയ്ക്കൊപ്പം അടുക്കളയിൽ സുലഭമായി ലഭിക്കുന്ന മറ്റ് ചില കൂട്ടുകൾ കൂടി ചേർക്കണം.

കറികൾക്ക് നല്ല രുചി നൽകുന്ന ഉലുവ മുടിയുടെ ഉറ്റ സുഹൃത്താണെന്ന് തന്നെ പറയാം. ഉലുവയിൽ അടങ്ങിയിരിക്കുന്ന ഈസ്ട്രജൻ മുടിയുടെ ആരോ​ഗ്യത്തിന് വളരെ അത്യാവശ്യമാണ്. പ്രകൃതിദത്തമായ കണ്ടീഷണറായി പ്രവർത്തിക്കാൻ ഉലുവയ്ക്ക് കഴിയും. മുടി പൊട്ടുന്നത് തടയാൻ ഉലുവ ഏറെ സഹായിക്കും. ഉലുവ മുടിയിൽ ഉപയോ​ഗിക്കുന്നത്, നല്ല ഉള്ളോടെ മുടി വളരാനും മുടി കൊഴിച്ചില്‍ തടഞ്ഞ് ആരോ​ഗ്യമുള്ള മുടി വളരാനും സഹായിക്കും. മുടിയ്ക്ക് സില്‍ക്കി ഘടന നൽകാനും ഇത് നല്ലതാണ്.

കറികൾക്ക് മണവും ​ഗുണവും നൽകുന്ന കറിവേപ്പില മുടിയുടെ ആരോ​ഗ്യത്തിന് ഏറെ മികച്ചതാണ്. മുടി നന്നായി വളരാനും താരനും നരയും പോലെയുള്ള പ്രശ്നങ്ങൾ മാറ്റാനും കറിവേപ്പില ​ഗുണം ചെയ്യും. മുടിയുടെ വളർച്ചയ്ക്ക് വളരെയധികം സഹായിക്കുന്ന ബീറ്റാ കരോട്ടിൻ, പ്രോട്ടീൻ എന്നിവയുടെ ഉയർന്ന അളവ് കറിവേപ്പിലയിലുണ്ട്. ആന്റിഓക്‌സിഡന്റുകൾ, അമിനോ ആസിഡുകൾ എന്നിവയാലും സമ്പന്നമാണ് കറിവേപ്പില. തലയോട്ടിയിലെ രോമകൂപങ്ങളെ ശക്തിപ്പെടുത്തുകയും മുടി കൊഴിച്ചിൽ പൂർണമായും ഇല്ലാതാക്കാനും കറിവേപ്പില ഏറെ സഹായിക്കും.

ധാരാളം ഗുണങ്ങൾ അടങ്ങിയ അടുക്കളയിലെ ഒരു കേമനാണ് കരിഞ്ചീരകം. മുടി വളർച്ചയ്ക്ക് കരിഞ്ചീരകം സഹായിക്കുമെന്ന് പറഞ്ഞാൽ പലർക്കും ചിലപ്പോൾ വിശ്വസിക്കാൻ കഴിയില്ല. രോമകൂപങ്ങളെ ശക്തിപ്പെടുത്താൻ ഏറെ നല്ലതാണ് കരിഞ്ചീരകം. പ്രകൃതിദത്ത മോയ്ചറൈസറായി പ്രവർത്തിക്കാനും അതുപോലെ മുടിയുടെ വളർച്ച ഇല്ലാതാക്കാനും വളരെ മികച്ചതാണ് കരിഞ്ചീരകം. ഇതിൽ അടങ്ങിയിട്ടുള്ള തൈമോക്വിനോൺ മുടി വളർച്ചയെ വളരെയധികം പ്രോത്സാഹിപ്പിക്കും.

മുടിയ്ക്ക് ഏറെ മികച്ചതാണ് കറ്റാർവാഴ. സൗന്ദര്യത്തിനും മുടി അഴകിനും കറ്റാർവാഴയ്ക്കുള്ള പങ്ക് വളരെ വലുതാണ്. ഇതിൽ അടങ്ങിയിരിക്കുന്ന ഫാറ്റി ആസിഡുകളും അമിനോ ആസിഡുകളും മുടി വളരാൻ വളരെയധികം സഹായിക്കും. കറ്റാർവാഴയിലെ ആന്റി ഓക്‌സിഡന്റുകളും മറ്റ് പോഷകങ്ങളും മുടി വളർച്ചയെ സഹായിക്കുന്നതാണ്. ഒരു മികച്ച പ്രകൃതിദത്ത കണ്ടീഷണറായി പ്രവർത്തിക്കാനും കറ്റാർവാഴയ്ക്ക് കഴിയും. തലയോട്ടിയിലെ ജലാംശം നിലനിർത്താനും. ഈർപ്പമുള്ളതാക്കാനും സഹായിക്കുന്നു. എ, സി, ഇ എന്നീ വൈറ്റമിനുകളും ഇതിൽ അടങ്ങിയിട്ടുണ്ട്.

ഒരു കപ്പ് വെളിച്ചെണ്ണയിലേക്ക് കറ്റാർവാഴയുടെ ജെല്ലും 10 മുതൽ 12 കറിവേപ്പിലയും ചേർക്കുക. ഇതിനോടൊപ്പം 1 ടീ സ്പൂൺ കരിഞ്ചീരകവും 1 ടീ സ്പൂൺ ഉലുവയും ചേർത്ത് നന്നായി തിളപ്പിക്കുക. എണ്ണയും നിറം മാറുന്നത് വരെ തിളപ്പിച്ച ശേഷം ഇത് അരിച്ച് എടുത്ത് ഒരു കുപ്പിയിലാക്കി സൂക്ഷിക്കാം. കാറ്റ് കയറാതെ സൂക്ഷിക്കുക. കുളിക്കുന്നതിന് മുൻപ് ഇത് മുടിയിൽ നന്നായി തേച്ച് പിടിപ്പിച്ച് അര മണിക്കൂർ കഴിഞ്ഞ് കഴുകി കളയാവുന്നതാണ്.