കണ്ണിന് ചുറ്റുമുള്ള കറുപ്പും ചുളിവകളും വേഗത്തിൽ മാറ്റാൻ ഈ ക്രീം

വെറും നാല് ചേരുവകൾ ഉപയോഗിച്ചാണ് ഇത് തയാറാക്കുന്നത്. വീട്ടിൽ വളരെ സുലഭമായി ലഭിക്കുന്ന ചേരുവകളാണ് ഇതിന് ആവശ്യം.

Authored byറ്റീന മാത്യു | Samayam Malayalam 13 Apr 2024, 3:29 pm

പ്രായമാകുന്നത് അനുസരിച്ച് പലർക്കും ചർമ്മത്തിൽ പല തരത്തിലുള്ള മാറ്റങ്ങളാണ് സംഭവിക്കുന്നത്. ആരോഗ്യം സംരക്ഷിക്കുന്നത് പോലെ ചർമ്മവും കാത്തു സൂക്ഷിക്കേണ്ടത് വളരെ പ്രധാനമാണ്. മുപ്പത് കഴിഞ്ഞ സ്ത്രീകൾ പൊതുവെ നേരിടുന്ന പ്രശ്നമാണ് കണ്ണിന് ചുറ്റുമുള്ള കറുപ്പ്. പൊതുവെ സ്ട്രെസ്, ഉറക്കകുറവ് എന്നിവയെല്ലാം ഇതിന് കാരണമാകാറുണ്ട്. അതുപോലെ ചർമ്മത്തിലുണ്ടാകുന്ന ചുളിവുകളും ഒരു പ്രധാന പ്രശ്നമാണ്. മേക്കപ്പ് ഇട്ട് ഇത് മറയ്ക്കാമെങ്കിലും പ്രകൃതിദത്തമായ രീതിയിലുള്ള പരിഹാരങ്ങൾ പലപ്പോഴും ഏറെ നല്ലതാണ്. ഇത്തരത്തിൽ കണ്ണിന് ചുറ്റുമുള്ള കറുപ്പും ചർമ്മത്തിലെ ചുളിവുകളും മാറ്റാൻ ഒരു ഫേസ് പായ്ക്ക് നോക്കാം.

easy home remedy to clear dark circles and wrinkles — കണ്ണിന് ചുറ്റുമുള്ള കറുപ്പും ചുളിവകളും വേഗത്തിൽ മാറ്റാൻ ഈ ക്രീം

വൈറ്റമിൻ ഇ

ചർമ്മത്തിലെ എല്ലാ പ്രശ്നങ്ങൾക്കുമുള്ള പരിഹാരം വൈറ്റമിൻ ഇയിൽ ഉണ്ട്. പ്രായമാകുന്നത് തടയാൻ സഹായിക്കുന്ന ഒരു പ്രധാനിയാണ് വൈറ്റമിൻ ഇ ഓയിൽ. വൈറ്റമിൻ ഇ ആഹാരത്തിൽ ഉൾപ്പെടുത്തുന്നതും അതുപോലെ ചർമ്മത്തിലെ വൈറ്റമിൻ ഇ ഗുളികകൾ ഉപയോഗിക്കുന്നതും പല തരത്തിലുള്ള ഗുണങ്ങളാണ് നൽകുന്നത്. മാത്രമല്ല മുഖക്കുരു, പാടുകൾ എന്നിവയെല്ലാം മാറ്റാനും വൈറ്റമിൻ ഇ ഏറെ സഹായിക്കും.

ബദാം ഓയിൽ

ബദാം ഓയിൽ ഉപയോഗിച്ച് ചർമ്മം മസാജ് ചെയ്യുന്നത് പാടുകളും ചുളിവകളും ഇല്ലാതാക്കാൻ ഏറെ സഹായിക്കും. ചർമ്മത്തിൻ്റെ തിളക്കം വീണ്ടെടുക്കാനും ബദാം ഓയിൽ ഏറെ നല്ലതാണ്. ഫാറ്റി ആസിഡുകൾ, ആൻ്റി ഓക്സിഡൻ്റുകൾ, വൈറ്റമിൻ ഇ എന്നിവയാൽ സമ്പുഷ്ടമാണ് ബദാം ഓയിൽ. രാത്രിയിൽ കിടക്കുന്നതിന് മുൻപ് വെറുതെ ബദാം ഓയിൽ കൊണ്ട് ചർമ്മം മസാജ് ചെയ്യുന്നതും പല തരത്തിലുള്ള ഗുണങ്ങൾ നൽകാൻ സഹായിക്കും.

കാപ്പിപൊടി

ചർമ്മത്തിലെ മൃതകോശങ്ങളെ പുറന്തള്ളാനുള്ള കഴിവുള്ളതാണ് കാപ്പിപൊടി. നിമിഷ നേരം കൊണ്ട് തിളക്കമുള്ള ചർമ്മം വീണ്ടെടുക്കാൻ കാപ്പിപൊടി സഹായിക്കും. മാത്രമല്ല ചർമ്മത്തിൽ നല്ലൊരു സ്ക്രബായി പ്രവർത്തിക്കാൻ കാപ്പിപൊടിയ്ക്ക് കഴിയും. ചർമ്മത്തെ കൂടുതൽ മിനുസമുള്ളതാക്കാനും കാപ്പിപൊടി വളരെ നല്ലതാണ്. വീട്ടിൽ തയാറാക്കുന്ന ഫേസ് പായ്ക്കുകളിൽ കാപ്പിപൊടി ഒരു പ്രധാന ഘടകമാണ്.

കറ്റാർവാഴ ജെൽ

ചർമ്മത്തിലെ എല്ലാ പ്രശ്നങ്ങൾക്കുമുള്ള ഒറ്റ പരിഹാരമാണ് കറ്റാർവാഴ ജെൽ. ചർമ്മ കോശങ്ങളെ പുനരുജ്ജീവിപ്പിക്കാനുള്ള കഴിവ് കറ്റാർവാഴയിലുണ്ട്. ഇതിൽ അടങ്ങിയിട്ടുള്ള ആൻ്റി ബാക്ടീരിയൽ, ആൻ്റി ഫംഗൽ ഗുണങ്ങൾ ചർമ്മത്തിന് ഏറെ നല്ലതാണ്. കറ്റാർവാഴ ഉപയോഗിക്കുന്നത് ചർമ്മത്തിലെ പാടുകളും കുരുക്കളും ഇല്ലാതാക്കാനും പ്രായമാകുന്നതിൻ്റെ ലക്ഷണങ്ങൾ തടയാനും ഏറെ സഹായിക്കും.

ക്രീം തയാറാക്കാൻ

1 ടീസ്പൂൺ കാപ്പിപൊടിയും, 1 ടീ സ്പൂൺ കറ്റാർവാഴ ജെല്ലും അര ടീ സ്പൂൺ ബദാം ഓയിലും 1 വൈറ്റമിൻ ഇയും നന്നായി യോജിപ്പിക്കുക. ഇനി ഇത് കണ്ണിന് ചുറ്റുമിടുക. 20 മിനിറ്റ് ശേഷം കഴുകി കളയുകയോ അല്ലെങ്കിൽ ഐ ബാഗായി രാത്രിയിൽ ഉപയോഗിക്കുകയോ ചെയ്യാം. രാത്രി വയ്ക്കുക ആണെങ്കിൽ രാവിലെ തണുത്ത വെള്ളത്തിൽ കഴുകി വ്യത്തിയാക്കുക.