ആര്‍ത്തവ ചക്രത്തിന്റെ രണ്ടാം പകുതിയില്‍ ഈസ്ട്രജനെക്കാള്‍ പ്രോജസ്ടറോണ്‍ അളവ് വര്‍ധിക്കുന്നതിനാല്‍ ചര്‍മത്തില്‍ സെബം കൂടുതലായി ഉദ്പാദിപ്പിക്കപ്പെടും. ഇത് എല്ലാ മാസവും ആര്‍ത്തവത്തോടനുബന്ധിച്ച് മുഖക്കുരു വരുന്നതിന് വഴിയൊരുക്കും. അമിതമായി സെബം പുറപ്പെടുവിയ്ക്കുന്നത് മുഖ ചര്‍മത്തിലെ സുഷിരങ്ങള്‍ അടഞ്ഞു പോകാനും അത് വലിയതും വേദനയുള്ളതുമായ മുഖക്കുരുക്കള്‍ രൂപപ്പെടുന്നതിനും കാരണമാകും.
മുഖം വൃത്തിയായി സൂക്ഷിക്കുക
ഹോര്‍മോണ്‍ വ്യത്യാസങ്ങളാണ് ഇത്തരം മുഖക്കുരുവിന് പിന്നില്‍ എന്നതിനാല്‍ പുറമേ നിന്നുള്ള പ്രതിവിധികള്‍ കൊണ്ട് പൂര്‍ണമായും ഈ പ്രശനം ഇല്ലാതാക്കാന്‍ കഴിയില്ല, എന്നാല്‍ ചില പരിചരണങ്ങള്‍ നല്‍കുന്നതിലൂടെ മുഖക്കുരു അമിതമായി ഉണ്ടാകുന്നത് ഒരു പരിധി വരെ തടയാന്‍ കഴിയും.
ചര്‍മം എല്ലായ്പ്പോഴും വൃത്തിയായി സൂക്ഷിയ്ക്കുക എന്നതാണ് ഏറ്റവും ആദ്യം ചെയ്യേണ്ടത്. ദിവസത്തില്‍ കുറഞ്ഞത് രണ്ടു തവണയെങ്കിലും മുഖത്തെ മേക്കപ്പിന്റെ അംശവും അഴുക്കും നീക്കം ചെയ്യാനായി നല്ല രീതിയില്‍ ക്ലെന്‍സ് ചെയ്യണം. മുഖം വൃത്തിയാക്കുന്നതിന് മുന്‍പ് കൈകള്‍ നന്നായി വൃത്തിയാക്കണം.
കൂടാതെ ചില ഉത്പന്നങ്ങളും ഇത്തരം മുഖക്കുരു പ്രശ്നങ്ങള്‍ ഒഴിവാക്കാന്‍ ഉപയോഗിക്കാം.
ഇവ അടങ്ങിയ ഉൽപ്പന്നങ്ങൾ
ബെൻസോയിൽ പെറോക്സൈഡ്: ആര്‍ത്തവകാല മുഖക്കുരുവിനെ തടയാന്‍ മികച്ച വഴിയാണ് ബെൻസോയിൽ പെറോക്സൈഡ്. സുഷിരങ്ങൾ അടഞ്ഞുപോയ ചർമ്മകോശങ്ങളിലൂടെ അധിക സെബം വരുന്നതും ചർമ്മത്തിന് കീഴിലുള്ള ബാക്ടീരിയകളുടെ പ്രവര്‍ത്തനം നശിപ്പിച്ച് മുഖക്കുരു തടയാനും ഇത് സഹായിക്കുന്നു.
സാലിസിലിക് ആസിഡ്: സാലിസിലിക് ആസിഡ് ഉപയോഗിക്കുന്നത് വഴി മുഖക്കുരു രൂപപ്പെടുന്നത് ഒരു പരിധി വരെ തടയാന്‍ കഴിയും. ചര്‍മ സുഷിരങ്ങള്‍ അടഞ്ഞുപോകുന്നതിന് കാരണമാകുന്ന നിര്‍ജ്ജീവ കോശങ്ങളും അഴുക്കുകളും നീക്കം ചെയ്യാനായി ഇത് ഉപയോഗിക്കാം. മുഖക്കുരുവും ചുവന്ന പാടുകളും ഇല്ലാതാക്കാന്‍ ഏറ്റവും നല്ല വഴിയാണ് ഇത്.
റെറ്റിനോയിഡുകൾ: വിറ്റാമിന്‍ എ ധാരാളമായി അടങ്ങിയ ഉത്പന്നങ്ങളാണ് ഇവ. മുഖ ചര്‍മത്തില്‍ ഉദ്പാദിപ്പിക്കപ്പെടുന്ന അധിക എണ്ണയും നിര്‍ജീവ ചർമ്മകോശങ്ങളെയും ഇല്ലാതാക്കി സുഷിരങ്ങളിൽ നിന്ന് പുറന്തള്ളാൻ റെറ്റിനോയിഡുകള്‍ സഹായിക്കും. കൂടാതെ പുതിയ ചർമ്മകോശങ്ങളുടെ ഉൽ‌പാദനത്തെ ത്വരിതപ്പെടുത്താനും ഇതിന് കഴിവുണ്ട്.
ചില വീട്ടുവൈദ്യങ്ങള്‍ പരീക്ഷിക്കാം
മഞ്ഞൾ: മുഖക്കുരു ചികിത്സിക്കുന്നതിനും പാടുകള്‍ കുറയ്ക്കുന്നതിനും മുറിവുകൾ ഉണക്കുന്നതിനും വളരെയധികം സഹായിക്കുന്ന ഒന്നാണ് മഞ്ഞൾ. ഇത് പതിവായി ഉപയോഗിക്കുന്നത് ചർമ്മത്തിന് സ്വാഭാവികമായ തിളക്കം നൽകുന്നു. അതിനാല്‍ ആര്‍ത്തവ സമയത്തെ മുഖക്കുരു ചര്‍മത്തില്‍ രൂപപ്പെടുന്നതിന് മുന്‍പ് തന്നെ ഈ മഞ്ഞള്‍ പ്രയോഗം പരീക്ഷിച്ചു നോക്കൂ. വ്യത്യാസം തീര്‍ച്ചയായും അനുഭവപ്പെടുമെന്ന് ഉറപ്പ്.
തേൻ: ആൻറി ബാക്ടീരിയൽ ഗുണങ്ങൾ വേണ്ടുവോളമടങ്ങിയ തേന്‍ ചർമ്മത്തിനെ മികച്ചതാക്കുന്നു. ചർമ്മത്തിന്റെ സുഷിരങ്ങൾ എണ്ണമയവും അഴുക്കും ഇല്ലാതെ തന്നെ നിലനിർത്തുകയും അതേ സമയം ജലാംശം നിലനിർത്തുകയും ചെയ്യുന്നതിലൂടെ മുഖക്കുരുവിനെ ചെറുക്കാൻ തേൻ സഹായിക്കും.
കറ്റാർ വാഴ: കറ്റാർ വാഴയുടെ ഗുണങ്ങൾ മുഖക്കുരു , ചുണങ്ങ്, ചൊറിച്ചിൽ, ചുവന്ന പാടുകള്‍ എന്നിവ ഇല്ലാതാക്കാന്‍ സഹായിക്കുന്നു. ഇതിന്‍റെ ആൻറി ബാക്ടീരിയൽ ഗുണങ്ങളും മുഖക്കുരുവിനെ അകറ്റി നിർത്താൻ സഹായിക്കുന്നു. അതിനാല്‍ ആര്‍ത്തവ സമയത്തും അല്ലാതെയും കറ്റാര്‍വാഴ സൗന്ദര്യ സംരക്ഷണത്തില്‍ പതിവായി ഉപയോഗിക്കുന്നത് ഗുണം ചെയ്യും.
Also read: പാലുൽപന്നങ്ങൾ കഴിച്ചാൽ മുഖക്കുരു വരുമോ?
വ്യായാമം
വിയർക്കുമ്പോൾ ചര്‍മ സുഷിരത്തില്‍ അടഞ്ഞിരിയ്ക്കുന്ന എണ്ണയെയും പൊടികളെയും പുറന്തള്ളുകയും ചെയ്യുന്നു. അതിനാല്‍ പതിവായുള്ള വ്യായാമം മുഖക്കുരു കുറയ്ക്കാന്‍ സഹായിക്കും. എന്നാല്‍ വ്യായാമത്തിന് ശേഷം വിയര്‍പ്പ് തുടച്ചുനീക്കാന്‍ ഉപയോഗിക്കുന്നത് വൃത്തിയുള്ള കോട്ടൺ തുണി ആയിരിക്കണം. അഴുക്കുള്ള ടവല്‍ ഇതിനായി ഉപയോഗിക്കുന്നത് വിപരീത ഫലമുണ്ടാക്കും. അതിനാല്‍ എല്ലാ ദിവസവും ഈ തുണി വൃത്തിയായി കഴുകി ഉണക്കി വേണം ഉപയോഗിക്കാന്‍. അതോടൊപ്പം, പരുക്കന്‍ തുണി ഉപയോഗിക്കുന്നതിനു പകരം മൃദുവായ കോട്ടണ്‍ തുണി മാത്രം ഉപയോഗിക്കുക. മുഖ ചര്‍മം അതിലോലമാണ്, അതിനാല്‍ അമര്‍ത്തി തിരുമ്മി മുഖം തുടയ്ക്കാതിരിയ്ക്കാനും ശ്രദ്ധിയ്ക്കണം.
ഇത്തരം പൊടിക്കൈകള്‍ കൊണ്ടൊന്നും നിങ്ങളുടെ മുഖക്കുരു കുറയുന്നില്ല എങ്കില്‍ തീര്‍ച്ചയായും ഒരു ചര്‍മ രോഗ വിദഗ്ദനെ തന്നെ കാണുക. പുറമെയുള്ള പ്രതിവിധികളേക്കാള്‍ ശരീരത്തിനുള്ളില്‍ പ്രവർത്തിക്കുന്ന മരുന്നുകളാണ് നിങ്ങള്‍ക്ക് അനുയോജ്യമെങ്കില്‍ അതിനായി ശ്രമിക്കാം.