പ്രകൃതിദത്തവും ജൈവവുമായ ചേരുവകൾക്ക് ചർമ്മ സംരക്ഷണത്തിന്റെ കാര്യത്തിൽ ഒരുപാട് പ്രയോജനങ്ങളുണ്ട്. എന്നാൽ ഇത്തരം പ്രകൃതിദത്ത കൂട്ടുകൾ നമ്മൾ എത്രമാത്രം ഇഷ്ടപ്പെടുന്നുവോ, അത്ര തന്നെ ഇവ ചിലപ്പോൾ നമ്മിൽ വളരെ ആശയക്കുഴപ്പമുണ്ടാക്കാം. എന്നാൽ ചില ചേരുവകൾ ചർമ്മത്തിന് സംശയലേശം വളരെയധികം ഗുണം ചെയ്യും. അത്തരത്തിൽ ചർമ്മത്തിന് അത്ഭുതങ്ങൾ സൃഷ്ടിക്കുന്ന ഒരു പ്രകൃതിദത്ത പരിഹാരമാണ് ഉരുളക്കിഴങ്ങ്. ജേണൽ ഓഫ് മെഡിസിനൽ പ്ലാന്റ്സ് സ്റ്റഡീസിൽ പ്രസിദ്ധീകരിച്ച ഒരു പഠനമനുസരിച്ച്, വേവിക്കാത്ത ഉരുളക്കിഴങ്ങിൽ പൊട്ടാസ്യം, സൾഫർ, ഫോസ്ഫറസ്, ക്ലോറൈഡ് എന്നിവ അടങ്ങിയിട്ടുണ്ട് - ഇവയെല്ലാം ചർമ്മത്തിന് ഗുണം ചെയ്യും.
ഈ പച്ചക്കറിക്ക് നിങ്ങളുടെ ചർമ്മത്തിന് എന്ത് ചെയ്യാനാകുമെന്ന് നിങ്ങൾ ചിന്തിക്കുകയാണെങ്കിൽ, ഒന്നുകൂടി ഇരുത്തി ചിന്തിക്കുക! കുറച്ച് ഉരുളക്കിഴങ്ങ് നീര് ചർമ്മത്തിൽ പുരട്ടുന്നത് ചർമ്മത്തിന് ഒന്നിലധികം വഴികളിൽ ഗുണം ചെയ്യും. ഇത് പോഷക സമൃദ്ധമായതിനാൽ, നിങ്ങളുടെ ശരീരത്തിനും ചർമ്മത്തിനും ധാരാളം ഗുണങ്ങൾ നൽകുന്നു. പുറമെ പുരട്ടാൻ മാത്രമല്ല, സൗന്ദര്യ ഗുണങ്ങൾക്കായി ഉരുളക്കിഴങ്ങ് നീര് കുടിക്കുകയും ചെയ്യാം.
തയ്യാറാക്കുവാനായി : ഉരുളക്കിഴങ്ങ് കഴുകുക, മുളകൾ എന്തെങ്കിലും ഉണ്ടെങ്കിൽ അത് നീക്കം ചെയ്ത് വൃത്തിയാക്കുക. ഉരുളക്കിഴങ്ങ് തൊലി കളയുക. ചിരകി എടുത്ത ഉരുളക്കിഴങ്ങ് ഒരു ലിനൻ തുണിയിൽ ഇട്ടു അതിന്റെ നീര് പിഴിഞ്ഞെടുക്കുക. നീര് പിഴിഞ്ഞെടുക്കാൻ നിങ്ങൾക്ക് ഒരു ജ്യൂസർ ഉപയോഗിക്കുകയും ചെയ്യാവുന്നതാണ്. ഈ ജ്യൂസ് ഉടനെ തന്നെ കുടിക്കുക.
കൂടുതൽ ദീർഘിപ്പിക്കാതെ, ചർമ്മത്തിന് ഉരുളക്കിഴങ്ങ് ജ്യൂസിന്റെ ഗുണങ്ങൾ എന്തൊക്കെയാണ് എന്നത്പരിശോധിക്കാം.
വരണ്ട ചർമ്മത്തെ സഹായിക്കുന്നു
ഉരുളക്കിഴങ്ങ് ജ്യൂസിൽ വിറ്റാമിൻ സി കൂടുതലാണ് - ഇത് ചർമ്മത്തിന് ജലാംശം നൽകുന്ന ഒരു പ്രധാന ഘടകമാണ്. അതിനാൽ, ചർമ്മത്തിലെ വരൾച്ച അകറ്റാൻ നിങ്ങൾ ഒരു ഗ്ലാസ് ഉരുളക്കിഴങ്ങ് ജ്യൂസ് കുടിക്കണം. നിങ്ങൾക്ക് ജ്യൂസ് കുടിക്കാൻ താൽപ്പര്യമില്ലെങ്കിൽ, ഒരു കോട്ടൺ പഞ്ഞി ഉരുളക്കിഴങ്ങ് നീരിൽ മുക്കി മുഖത്ത് ഇത് പുരട്ടാം.
കളങ്കങ്ങളും ഇരുണ്ട പാടുകളും നീക്കം ചെയ്യുന്നു
മുഖത്ത് കളങ്കങ്ങളും കറുത്ത പാടുകളും ഉണ്ടോ? വിഷമിക്കേണ്ട, ഉരുളക്കിഴങ്ങ് നീര് പുരട്ടുന്നത് അതിൽ നിന്ന് നിങ്ങൾക്ക് കുറച്ച് ആശ്വാസം നൽകും. പ്രശ്നം ബാധിച്ച സ്ഥലത്ത് ഉരുളക്കിഴങ്ങ് നീരിൽ മുക്കിയ ഒരു കോട്ടൺ പഞ്ഞി പുരട്ടുക. ഇത് ഉണങ്ങിയ ശേഷം സാധാരണ വെള്ളത്തിൽ ചർമ്മം കഴുകുക. വ്യത്യാസം കാണുന്നതിന് ഓരോ 3-4 ദിവസം കൂടുമ്പോൾ ഇത് ആവർത്തിക്കുക.
വാർദ്ധക്യത്തിന്റെ ലക്ഷണങ്ങളുമായി പോരാടുന്നു
നിങ്ങൾ പ്രതീക്ഷിച്ചതിലും വേഗത്തിൽ വാർദ്ധക്യത്തിന്റെ ലക്ഷണങ്ങൾ ചർമ്മത്തിൽ പ്രത്യക്ഷപ്പെടുന്നുണ്ടോ? ചർമ്മത്തിന് പ്രായമാകുന്നത് തടയാനും മുഖത്തെ ചുളിവുകൾ കുറയ്ക്കാനും ഉരുളക്കിഴങ്ങ് ജ്യൂസ് സഹായിക്കും. ഇതിനായി നിങ്ങൾ ചെയ്യേണ്ടത്, കുറച്ച് ഉരുളക്കിഴങ്ങ് നീര് തൈരുമായി കലർത്തി പ്രശ്ന ബാധിത പ്രദേശത്ത് പുരട്ടുക എന്നതാണ്. ഇത് ചുളിവുകളുടെ രൂപം കുറയ്ക്കുന്നതിനും നിങ്ങളുടെ മുഖത്തിന് ഒരു യുവത്വം തുളുമ്പുന്ന തിളക്കം നൽകുന്നതിനും സഹായിക്കും.
കരപ്പൻ ഇല്ലാതാക്കാൻ
ചർമ്മത്തിന് വീക്കം, ചൊറിച്ചിൽ എന്നിവ ഉണ്ടാക്കുന്ന, ചർമ്മത്തെ വരണ്ടതും പരുക്കനുമാക്കുന്ന ഒരു ചർമ്മ പ്രശ്നമാണ് കരപ്പൻ അഥവാ എക്സിമ. എക്സിമയുടെ ലക്ഷണങ്ങളിൽ നിന്ന് മോചനം നേടാൻ ഉരുളക്കിഴങ്ങ് സഹായിക്കുമെന്ന് പഠനങ്ങൾ സൂചിപ്പിക്കുന്നു. ഇതിനായി നിങ്ങൾക്ക് എല്ലാ ദിവസവും ഒരു ഗ്ലാസ് ഉരുളക്കിഴങ്ങ് ജ്യൂസ് കുടിക്കാം അല്ലെങ്കിൽ പ്രശ്ന ബാധിത പ്രദേശങ്ങളിൽ ഉരുളക്കിഴങ്ങ് നീര് പുരട്ടാം. ഇത് ഫലപ്രദമായി പ്രവർത്തിക്കുമെങ്കിലും, ചർമ്മത്തിൽ പുതിയ കാര്യങ്ങൾ പരീക്ഷിക്കുന്നതിനു മുമ്പ് ഡോക്ടറെ സമീപിക്കുന്നത് എല്ലായ്പ്പോഴും നല്ലതാണ്.
ഉരുളക്കിഴങ്ങ് ജ്യൂസിന് ഏതെങ്കിലും പാർശ്വഫലങ്ങൾ ഉണ്ടോ?
ഏത് കാര്യവും പോലെ, ഉരുളക്കിഴങ്ങ് ജ്യൂസും ചില സന്ദർഭങ്ങളിൽ ദോഷകരമാണ്. അമിതമായി ഇത് കുടിക്കുന്നത് വയറുവേദന, വയറിളക്കം, ഛർദ്ദി എന്നിവയ്ക്ക് കാരണമാകുമെന്ന് പഠനങ്ങൾ കണ്ടെത്തിയിട്ടുണ്ട്. ഇതിൽ ഉയർന്ന അളവിലുള്ള പഞ്ചസാരയും അടങ്ങിയിട്ടുണ്ട്. അതുകൊണ്ട് ഇത് പ്രമേഹമുള്ളവർക്ക് നല്ലതല്ല. ഗർഭിണികളും മുലയൂട്ടുന്ന സ്ത്രീകളും ഉരുളക്കിഴങ്ങ് ജ്യൂസ് കുടിക്കുന്നതിന് മുമ്പ് ശ്രദ്ധിക്കുകയും ഡോക്ടറെ സമീപിക്കുകയും വേണം.
ശ്രദ്ധിക്കുക: ലേഖനത്തിൽ പരാമർശിച്ചിരിക്കുന്ന ഏതെങ്കിലും നുറുങ്ങുകൾ ഉപയോഗിക്കുന്നതിന് മുമ്പ് ഒരു വിദഗ്ദ്ധ ഡോക്ടറെ സമീപിച്ച് നിർദ്ദേശം തേടുക.