പ്രായം ഇരുപത്തിയഞ്ച് കഴിഞ്ഞു. മീശയും താടിയുമൊക്കെ വേണമെന്ന് അതിയായ ആഗ്രഹമുണ്ട്. എന്നാൽ ആ കട്ടി മീശ അങ്ങ് വരുന്നില്ല. ഇപ്പോഴും അവിടേം ഇവിടേം നാലും മൂന്നും ഏഴ് രോമങ്ങൾ മാത്രം! പല തവണ ഷേവ് ചെയ്ത് നോക്കി. രോമവളർച്ചയ്ക്ക് സഹായിക്കുന്ന പലതരം ക്രീമുകളും മറ്റും മാറി മാറി പരീക്ഷിച്ചു. എല്ലാ ദിവസവും രാവിലെ എഴുന്നേൽക്കുന്ന പാടെ കണ്ണാടിയുടെ മുമ്പിൽ ചെന്ന് അധിക രോമം വല്ലോം വളർന്നിട്ടുണ്ടോ എന്നാണ് ആദ്യം നോക്കുന്നത്. എവിടെ? നിരാശ! കൂട്ടുകാരോട് മീശയും താടിയും വളരാൻ എളുപ്പവഴികൾ ചോദിച്ചാൽ അവർ കളിയാക്കും എന്നുറപ്പ്. അവർക്ക് മനസ്സിലാകില്ലല്ലോ ഈ മീശയ്ക്ക് ഒരിത്തിരി കട്ടി വരുത്താനും താടി വളർത്താനും നമ്മൾ പെടുന്ന പെടാപ്പാട്!
ഈ താടിയും മീശയും വളരാൻ വല്ല എളുപ്പവഴികളും ഉണ്ടോ? നമ്മുടെ മിക്ക ചെറുപ്പക്കാരും ചോദിക്കുന്നതാണ്? പോരാഞ്ഞ് നല്ല കിടിലൻ മീശയും താടിയുമുള്ള ചേട്ടന്മാരെ കാണുമ്പോ തെല്ലൊരു അസൂയയും തോന്നാതില്ല. നമ്മളിവിടെ കഷ്ടപ്പെടുകയാണ് ഈ വിരലിലെണ്ണാവുന്ന രോമത്തിന്റെ എണ്ണമൊന്നു കൂട്ടാൻ. അപ്പോഴാ മുമ്പിൽ കൂടെ ഓരോരുത്തന്മാർ മീശയും പിരിച്ച് വെട്ടിയൊതുക്കിയ താടിയും തടവി റെയ്ബാൻ കൂളിംഗ് ഗ്ലാസും വെച്ച് ബൈക്കിൽ അങ്ങോട്ടും ഇങ്ങോട്ടും ചെത്തി നടക്കുന്നത്. അസൂയ എങ്ങനെ വരാതിരിക്കും. ചുമ്മാ ഇരിക്കുമ്പോൾ വെറുതെ സ്വപ്നം കാണും, അവരെപ്പോലെ മീശയൊക്കെ പിരിച്ച് കേറ്റി നല്ല ലുക്കുള്ള താടിയും തടവി നാട്ടിലൂടെ വിലസുന്നത്. ബൈക്കും കൂളിംഗ് ഗ്ലാസും ഒന്നും വേണ്ട, ആ ചേട്ടന്മാരുടെ പോലെ താടീം മീശേം മാത്രം മതിയാരുന്നു.
Also read: സൂപ്പറാണ് ചേട്ടന്റെ താടി! ഇതാ ചില താടിക്കാര്യങ്ങൾ
പുരുഷത്വത്തിന്റെ ലക്ഷണം തന്നെ താടിയും മീശയുമാണെന്ന് അവകാശപ്പെടുന്നവർ ധാരാളമുണ്ട്. മീശയും താടിയുമില്ലെങ്കിൽ പൗരുഷത്വത്തിന്റെ ആ ഗാംഭീര്യം ശൂ... ന്ന് ഇല്ലാതാകുമെന്നാണ് പരക്കെയുള്ള ധാരണ. മീശയും താടിയും ഇല്ലാത്തവരെ നിരാശരാക്കാൻ വേറെ കാരണം വല്ലതും വേണോ? എന്നാൽ ഇത്തരം അവകാശവാദങ്ങളിലൊന്നും വിശ്വസിക്കാത്ത, കോൺഫിഡൻസ് വിട്ട് കളയാൻ തയ്യാറല്ലാത്ത നല്ല ചങ്ക് ബ്രദർമാരും എത്രയോ പേരുണ്ട്. ചില ആളുകളെ സംബന്ധിച്ച് താടിയും മീശയും വളർത്തുക എന്നത് സാധ്യമായ കാര്യമല്ല. പ്രായം, ജനിതക പ്രത്യേകതകൾ തുടങ്ങിയവയെല്ലാം താടി വളരുന്നതിന്റെ പിന്നിലെ ഘടകങ്ങളാണ്.
എന്നാൽ ആണിന്റെ ജീവിതത്തിലെ ഏറ്റവും സന്തോഷം തരുന്ന സന്ദർഭങ്ങളിലൊന്നാണ് മേൽ ചുണ്ടിനു മുകളിൽ ആദ്യമായി കിളിർക്കുന്ന രോമങ്ങൾ കാണുന്നത്. ഈ രോമങ്ങൾ പോലും വളരുന്നില്ല എന്നോർത്ത് വിഷമിക്കുന്നവർക്കായി ചില കാര്യങ്ങൾ പങ്കുവെയ്ക്കാം.
ഷേവ് ചെയ്താൽ താടി വളരുമോ?
താടി വളരാൻ നിരന്തരം ഷേവ് ചെയ്താൽ മതി എന്ന ധാരണ പലരുടെയും ഇടയിലുണ്ട്. അത് വിശ്വസിച്ച് ദിവസവും ഷേവ് ചെയ്യുന്ന എത്രയോ ചെറുപ്പക്കാർ നമുക്കിടയിലുണ്ട്. ശരിക്കും ഷേവ് ചെയ്താൽ താടി വളരുമോ? യഥാർത്ഥത്തിൽ താടിവളർച്ചയും ഷേവിങ്ങും തമ്മിൽ യാതൊരു ബന്ധവുമില്ല. താടി ഉള്ളവരാണെങ്കിൽ ഷേവ് ചെയ്യുമ്പോൾ തടി വീണ്ടും വളരും. പിന്നീട് വളരുന്ന രോമങ്ങൾക്ക് സ്വാഭാവികമായി കട്ടി കൂടുതലുള്ളതായും തോന്നും. എന്നാൽ താടി ഇല്ലാത്ത ഒരാൾ നിരന്തരം ഷേവ് ചെയ്ത് കഴിഞ്ഞാൽ രോമം വളരണമെന്നില്ല. മാത്രമല്ല, വിപരീത ദിശയിലേക്ക് ഷേവ് ചെയ്യുമ്പോൾ ചർമ്മത്തിലെ ഫോളിക്കിളുകൾ നശിക്കുകയും ചെയ്യും. ഇത് താടി വളരാതിരിക്കാനും കാരണമാകും.
കരടി നെയ്യ് തേച്ചാലോ?
കരടിക്ക് ധാരാളം രോമം ഉണ്ട്. എന്ന് കരുതി കരടി നെയ്യ് തേച്ചാൽ മനുഷ്യരിൽ രോമവളർച്ച ഉണ്ടാകുമോ? കരടി നെയ്യ് തേച്ച് രോമവളർച്ച ഉണ്ടാകുമെന്ന് ഒരിടത്തും ശാസ്ത്രീയമായി തെളിയിക്കപ്പെട്ടിട്ടില്ല.
നല്ല സംശയമാണ്. ബിയേർഡ് ഓയിൽ രോമവളർച്ചയെ സഹായിക്കാനല്ല. പകരം, ഉള്ള താടി ഭംഗിയായി സൂക്ഷിക്കാൻ മാത്രമാണ് സഹായിക്കുന്നത്. രോമം ഇല്ലാത്ത മുഖത്ത് ബിയേർഡ് ഓയിൽ തേച്ചാൽ മറ്റ് പ്രയോജനം ഒന്നും ഉണ്ടാകില്ല.
സ്വാഭാവികമായി താടി വളരുന്നത് ശക്തിപ്പെടുത്താൻ എന്തൊക്കെ ചെയ്യാം എന്ന് നോക്കിയാലോ?
Also read: ഈ കാര്യങ്ങൾ ശ്രദ്ധിച്ചാൽ കഴുത്ത് വേദന പൂർണ്ണമായും ഒഴിവാക്കാം
കാത്തിരിക്കുക, മുഖം അറിയുക
നല്ല താടി വളരണമെങ്കിൽ നല്ല ക്ഷമയാണ് ആദ്യം വേണ്ടത്. താടി വളർത്തണമെന്ന് മാനസികമായി തീരുമാനിച്ച് കഴിഞ്ഞാൽ ഒരല്പം ക്ഷമ കാണിക്കണം. ഒരു സുപ്രഭാതത്തിൽ തടി പെട്ടെന്നങ്ങ് വളരില്ല. നിങ്ങളുടെ മുഖത്തിന്റെ സ്വഭാവം മനസ്സിലാക്കണം. ചർമ്മത്തിന്റെ സവിശേഷതയും തിരിച്ചറിയണം. പലരിലും താടിയുടെ വളർച്ച വ്യത്യസ്ത രീതിയിലാണ്. താടി വളർന്ന് തുടങ്ങുമ്പോൾ മുഖത്തെ എല്ലാ ഭാഗത്തും ഒരുപോലെ വരണം എന്നില്ല. എന്നാൽ വരുന്ന രോമങ്ങൾ വളരാൻ അനുവദിക്കുകയും വേണം. ഇതിനോടനുബന്ധിച്ച് ചെറുരോമങ്ങളും വളർന്ന് വരുന്നുണ്ടാകും. ആദ്യം അങ്ങിങ്ങായി വളർന്ന രോമങ്ങൾ ഷേവ് ചെയ്ത് കളഞ്ഞാൽ പിന്നെ രോമ വളർച്ച എങ്ങനെ ഉണ്ടാകും? അതുകൊണ്ട് ഈ രോമങ്ങൾ വളരാൻ അനുവദിക്കുക.
മുഖചർമ്മം മസ്സാജ് ചെയ്യുക
താടി വളർച്ച ശക്തിപ്പെടുത്താൻ മുഖത്തെ ചർമ്മം നന്നായി മസ്സാജ് ചെയ്ത കൊടുക്കുന്നത് നല്ലൊരു പ്രതിവിധിയാണ്. മുഖചർമ്മവും താടിയും ഏതെങ്കിലും നല്ല ഓയിൽ ഉപയോഗിച്ച് നല്ലപോലെ തിരുമ്മി മസ്സാജ് ചെയ്യുന്നത് മുഖത്തെ രക്തയോട്ടം കൂടാനും രോമവളർച്ച ഉണ്ടാകാനും സഹായിക്കും. ഒലിവ് ഓയിൽ, വെളിച്ചെണ്ണ, പുതിന എണ്ണ, ആവണക്കെണ്ണ തുടങ്ങിയവയിൽ ഏതെങ്കിലും മുഖം മസ്സാജ് ചെയ്യാൻ ഉപയോഗിക്കാവുന്നതാണ്.
മുഖം നന്നായി സ്ക്രബ്ബ് ചെയ്യുക
താടി വളർച്ച തടയുന്ന ഒരു പ്രധാന കാരണം മുഖത്തുണ്ടാകുന്ന മൃത കോശങ്ങളാണ്. അതുകൊണ്ട് തന്നെ ഇത്തരം മൃത കോശങ്ങൾ ഇല്ലായ്മ ചെയ്യേണ്ടതുണ്ട്. അതിനായി ഇടിയ്ക്കിടയ്ക്ക് മുഖം സ്ക്രബ്ബ് ചെയ്യുന്നത് നല്ലൊരു പ്രതിവിധിയാണ്. ഇതിനായി മാർക്കറ്റിൽ വാങ്ങാൻ കിട്ടുന്നതോ അല്ലെങ്കിൽ വീട്ടിൽ തന്നെ തയ്യാറാക്കിയതോ ആയ ഫേഷ്യൽ സ്ക്രബ്ബുകൾ ഉപയോഗിക്കാവുന്നതാണ്.
Also read: ഉപ്പൂറ്റിവേദന അത്ര നിസ്സാരമല്ല; ഈ കാര്യങ്ങൾ അടിയന്തരമായി ശ്രദ്ധിക്കണം
ആഹാരശീലത്തിൽ ശ്രദ്ധിക്കുക
പ്രോട്ടീൻ സമ്പുഷ്ടമായ ഭക്ഷണം ആഹാരക്രമത്തിൽ ഭാഗമാകുന്നത് രോമവളർച്ചയെ പരിപോഷിപ്പിക്കും. അതുകൊണ്ട് ഭക്ഷണത്തിൽ പ്രോട്ടീൻ ധാരാളം അടങ്ങിയ ഭക്ഷണം കഴിക്കാൻ ശ്രദ്ധിക്കുക. പഴങ്ങളും പച്ചക്കറികളും ധാരാളം ഭക്ഷണത്തിൽ ഉൾപ്പെടുത്തണം. വിറ്റാമിനുകൾ ധാരാളം അടങ്ങിയ ഭക്ഷണങ്ങൾ കഴിക്കാൻ ശ്രദ്ധിക്കണം. വിറ്റാമിൻ ബി അടങ്ങിയ ഭക്ഷണം ധാരാളം കഴിക്കുക. രോമവളർച്ചയെ ത്വരിതപ്പെടുത്തുന്ന വിറ്റാമിന് ബി 1, ബി 6, ബി 12, ബയോട്ടിൻ എന്നിവ അടങ്ങിയ ഭക്ഷണങ്ങളും കഴിക്കാം. കരള്, കോളിഫ്ലവര്, പയർ വർഗ്ഗങ്ങൾ, മത്സ്യം, കാരറ്റ്, വാഴപ്പഴം, സോയ, മുട്ടയുടെ മഞ്ഞക്കരു, എന്നിവയിൽ ധാരാളം ബയോട്ടിന് അടങ്ങിയിരിക്കുന്നു.
ധാരാളം വെള്ളം, ആവശ്യത്തിന് ഉറക്കം
ഇവ രണ്ടും മുഖത്തെ രോമവളർച്ചയും തമ്മിൽ എന്ത് ബന്ധം എന്ന് ആലോചിക്കുകയാകും, അല്ലെ? ഉണ്ട്. ആവശ്യത്തിന് ഉറക്കം ലഭിക്കേണ്ടത് ശരീരത്തിലെ എല്ലാ അവയവങ്ങളുടെയും പ്രവർത്തന ക്ഷമതയ്ക്ക് അത്യാവശ്യമാണ്. അതുപോലെ തന്നെ ധാരാളം വെള്ളം കുടിക്കേണ്ടതും ആവശ്യമാണ്. ദിവസവും എട്ട് ഗ്ലാസ് വെള്ളമെങ്കിലും കുടിക്കണം. ഇവ രണ്ടും ഇല്ലെങ്കിൽ രോമ വളർച്ച മുരടിച്ച് പോകാനുള്ള സാധ്യത വളരെ കൂടുതലാണ്. കൂടാതെ ഉള്ള രോമം കൊഴിഞ്ഞ് പോകാനും സാധ്യതയുണ്ട്.
മാനസിക സമ്മർദ്ദങ്ങൾക്ക് ഗുഡ് ബൈ
താടി വളരാൻ ആഗ്രഹിക്കുന്നവർ മാനസിക പിരിമുറുക്കങ്ങളിൽ നിന്ന് അകന്നു നിന്നേ പറ്റൂ. അല്ലാത്ത പക്ഷം ചെറിയ രോമങ്ങൾ പോലും കൊഴിഞ്ഞ് പോകാൻ കാരണമാകും.
ആവണക്കെണ്ണ രോമം വളരാൻ സഹായിക്കുമെന്നാണ് പഠനങ്ങൾ പറയുന്നത്. ആവണക്കെണ്ണയും വെളിച്ചെണ്ണയും കറിവേപ്പിലയും ചേർത്ത് തയ്യാറാക്കുന്ന മിശ്രിതം താടിയിൽ തേക്കുന്നത് രോമ വളർച്ചയ്ക്ക് വളരെ ഗുണകരമാണ്.
ഇത് എങ്ങനെ തയ്യാറാക്കാം?
ആദ്യമായി ഒരു പാത്രത്തിൽ ആവശ്യത്തിന് വെളിച്ചെണ്ണ എടുത്ത് ചൂടാക്കുക. തിളയ്ക്കുന്ന വെളിച്ചെണ്ണയിലേയ്ക്ക് ഒരു പിടി കറിവേപ്പില ഇടുക. ഇലകളുടെ നിറം മാറി കറുത്ത് വരുന്നത് വരെ ചൂടാക്കണം. ഈ എണ്ണ തണുക്കാൻ അനുവദിക്കുക. അതിനു ശേഷം അരിച്ചെടുത്ത ഈ എണ്ണ ഒരു കുപ്പിയിലേക്ക് ഒഴിക്കാം. ഈ എണ്ണ എത്ര അളവുണ്ടോ അത്രയും അളവിൽ തന്നെ ആവണക്കെണ്ണയും കാച്ചിയ വെളിച്ചെണ്ണയിലേയ്ക്ക് യോജിപ്പിക്കുക.
ഈ എണ്ണ ഉപയോഗിക്കേണ്ടത് എങ്ങനെ?
ഉറങ്ങുന്നതിനു കുറച്ച് മുമ്പായി മുഖം നന്നായി ആവി പിടിക്കുക. അതിനു ശേഷം മുഖം തണുത്ത വെള്ളത്തിൽ കഴുകിവൃത്തിയാക്കുക. ഉണങ്ങിയ തുണി ഉപയോഗിച്ച് തുടച്ച ശേഷം, തയ്യാറാക്കി വെച്ച എണ്ണ മുഖത്ത് നന്നായി പുരട്ടി ഉറങ്ങാൻ പോകാം. രാവിലെ വീണ്ടും മുഖം ശുദ്ധ ജലം ഉപയോഗിച്ച് കഴുകി വൃത്തിയാക്കാവുന്നതാണ്. കുറഞ്ഞത് മൂന്ന് മാസമെങ്കിലും ഇങ്ങനെ ചെയ്താൽ മുഖത്തെ രോമവളർച്ചയിൽ നല്ല വ്യത്യാസം കാണാം.
ആവണെക്കെണ്ണയും വെളിച്ചെണ്ണയും ചേർത്ത എണ്ണ പ്രയോഗിക്കേണ്ട വിധം മനസ്സിലായില്ലേ? ഇനി വെളിച്ചെണ്ണ കൊണ്ട് മറ്റൊരു പ്രയോഗം ഉണ്ട്. 10 : 1 എന്ന അനുപാതത്തിൽ വെളിച്ചെണ്ണയും റോസ് മേരി ഓയിലും ചേർത്ത് യോജിപ്പിക്കുക. ഈ മിശ്രിതം മുഖത്തും താടിയിലും തേച്ച് മസാജ് ചെയ്യുക. അതിനു ശേഷം അര മണിക്കൂർ കഴിഞ്ഞ് ശുദ്ധ ജലത്തിൽ മുഖം കഴുകി വൃത്തിയാക്കാവുന്നതാണ്.
കറുവപ്പട്ടയും നാരങ്ങാനീരും
രണ്ട് ടേബിൾ സ്പൂൺ നാരങ്ങാ നീരിലേയ്ക്ക് ഒരു ടേബിൾ സ്പൂൺ കറുവപ്പട്ട പൊടി ചേർത്ത് യോജിപ്പിച്ച ശേഷം മുഖത്ത് തേക്കുക. അരമണിക്കൂറിനു ശേഷം കഴുകാം. ഈ രീതി പതിവായി ആവർത്തിക്കുന്നതും രോമവളർച്ചയെ പരിപോഷിപ്പിക്കും.