കണ്ണുകൾക്കും വേണം വ്യായാമം; ഇവ ചെയ്ത് നോക്കൂ

ഇന്ന് എല്ലാ മേഖലകളിലും കമ്പ്യൂട്ടർ ഒഴിച്ചുകൂടാൻ പറ്റാത്ത ഒരു ഉപകരണമായി മാറിക്കഴിഞ്ഞു. ജോലി സ്ഥലത്തെ കമ്പ്യൂട്ടർ ഉപയോഗം കഴിഞ്ഞ് തിരിച്ച് വീട്ടിലെത്തിയാലും വീണ്ടും കമ്പ്യൂട്ടർ തുറന്ന് പലതും നോക്കിയിരിക്കും അല്ലെ? വ്യക്തിപരമായ പല ആവശ്യങ്ങൾക്കും കമ്പ്യൂട്ടർ ഉപയോഗിക്കുന്നത് അപ്പോഴാണ്. കമ്പ്യൂട്ടർ ഉപയോഗിച്ച് ജോലി ചെയ്യുന്നത് മാറ്റി നിർത്തിയാൽ, ഫേസ്ബുക് നോക്കാനും സാധനങ്ങൾ ഓൺലൈനിൽ വാങ്ങാനും വാർത്തകൾ വായിക്കാനും യൂട്യൂബിൽ വീഡിയോകൾ കാണാനും എന്ന് തുടങ്ങി എന്തെല്ലാം ആവശ്യങ്ങൾക്കാണ്‌ നിങ്ങൾ കമ്പ്യൂട്ടർ ഉപയോഗിക്കുന്നത്? ഇതിന്റെയെല്ലാം ഇടയ്ക്ക് മൊബൈൽ ഫോണിന്റെ ഉപയോഗം വേറെ. ഈ പറഞ്ഞ കാര്യങ്ങളെല്ലാം കമ്പ്യൂട്ടറിൽ അല്ലെങ്കിൽ സ്മാർട്ട് ഫോണിൽ നോക്കുന്നവരാണ് ഭൂരിഭാഗം ആളുകളും. ഈ പറഞ്ഞത് ശരിയല്ലെന്ന് തോന്നുന്നുണ്ടോ?

ഒരു കാര്യം നിങ്ങളും സമ്മതിക്കും. പരിധിയില്ലാത്ത വിസ്മയ കാഴ്ചകളാണ് ഇത്തരം സംവിധാനങ്ങളിലൂടെ കണ്ണ് നമുക്ക് നൽകുന്നത്. പക്ഷെ ഇങ്ങനെ ദിവസത്തിന്റെ ഭൂരിഭാഗവും കമ്പ്യൂട്ടറിലോ മൊബൈൽ ഫോണിലോ നോക്കിയിരിക്കുമ്പോൾ കണ്ണിന്റെ ആരോഗ്യത്തെക്കുറിച്ച് നിങ്ങൾ ആലോചിക്കാറുണ്ടോ? ഇത്തരം മാറിയ ജീവിതശൈലികൾ കണ്ണിന്റെ ആരോഗ്യത്തെ പ്രതികൂലമായി ബാധിക്കാറുണ്ട്.

'കണ്ണില്ലെങ്കിലറിയാം അതിന്റെ വില' എന്ന പ്രസ്താവന എത്ര സത്യമാണ്. അതിനാൽ കണ്ണിന്റെ ആരോഗ്യം മറ്റെന്തിനേക്കാളും പ്രധാനപ്പെട്ട ഒന്നാണ്. ശരീരത്തിലെ മറ്റെല്ലാ അവയവങ്ങളും പ്രധാനപ്പെട്ടത് തന്നെ. എന്നാലും ഒരല്പം കൂടുതൽ ശ്രദ്ധ കണ്ണിന് വേണം.

കണ്ണിന്റെ സംരക്ഷണം

കമ്പ്യൂട്ടർ തുടർച്ചയായി ഉപയോഗിക്കുന്നവരിൽ കണ്ണുകളിൽ ജലാംശം നഷ്ടപ്പെടുന്നതിനാൽ വരൾച്ച അനുഭവപ്പെടാറുണ്ട്. അതുകൊണ്ട് കണ്ണുകളിൽ ആവശ്യത്തിന് ഈർപ്പം നിലനിൽക്കുന്നുണ്ട് എന്ന ഉറപ്പാക്കേണ്ടതുണ്ട്. മാത്രമല്ല, കണ്ണിലെ പേശികൾക്ക് കൂടുതൽ സമ്മർദ്ദം അനുഭവപ്പെടുമ്പോഴാണ് കണ്ണിന് വേദന, തലവേദന, കണ്ണിൽ നിന്ന് വെള്ളം വരിക, കാഴ്ചത്തകരാർ തുടങ്ങിയവ ഉണ്ടാകുന്നത്.

ചിട്ടയോടെയുള്ള സമീകൃതാഹാര ശീലവും വ്യായാമങ്ങളും കണ്ണിനെ കൂടുതൽ ആരോഗ്യത്തോടെ കാത്തു സൂക്ഷിക്കാൻ സഹായിക്കും. അമിത വണ്ണം കുറയ്ക്കാനും കൈകളും കാലുകളും ബലപ്പെടുത്താനും മാത്രമല്ല വ്യായാമം. വ്യായാമം കണ്ണുകൾക്കുമുണ്ട്. കണ്ണിനുണ്ടാകുന്ന തളർച്ചയും മറ്റ് അസ്വസ്ഥതകളും മാറ്റി കണ്ണിലെ പേശികളുടെ ശക്തി കൂട്ടി കാഴ്‌ചശക്തി കൂടുതൽ കാര്യക്ഷമമാക്കാൻ ചില വ്യായാമങ്ങൾ ജീവിതത്തിന്റെ ശീലമാക്കുക. കണ്ണിന് കൊടുക്കേണ്ട വ്യായാമങ്ങൾ എന്തൊക്കെയാണെന്ന് ശ്രദ്ധിക്കൂ...

1. കൃഷ്ണമണികൾ ചലിപ്പിക്കുക: കണ്ണുകൾക്ക് കൂടുതലായി ആയാസം അനുഭവപ്പെടുമ്പോൾ ഇടയ്ക്ക് കൃഷ്ണമണികൾ ചലിപ്പിക്കേണ്ടത് അത്യാവശ്യമാണ്. കൃഷ്ണമണികൾ മുകളിലേയ്ക്കും താഴേയ്ക്കും 10 തവണയെങ്കിലും ചലിപ്പിക്കുക. കണ്ണിന് നൽകാവുന്ന വ്യായാമങ്ങളിൽ മറ്റൊന്ന്, ഇരു കൃഷ്ണമണികളും മൂക്കിനോട് ചേർത്ത് കൊണ്ടുവരുക. മൂക്കിന്റെ തുമ്പിലേയ്ക്ക് നോക്കുക എന്ന് ചുരുക്കം. കുറച്ച് സെക്കന്റുകൾ അങ്ങനെ നോക്കിയശേഷം കണ്പീലികളിലേയ്ക്ക് നോക്കുക. വീണ്ടും മൂക്കിന്റെ തുമ്പിലേയ്ക്ക് നോക്കുക. ഇത് അഞ്ച് മുതൽ പത്ത് തവണ വരെ ആവർത്തിക്കാം.

ഇത് കൂടാതെ തന്നെ കൃഷ്ണമണികൾ ഉപയോഗിച്ച് ചെയ്യാവുന്ന മറ്റൊരു വ്യായാമമാണ് വൃത്താകൃതിയിൽ ചലിപ്പിക്കൽ. കൃഷ്ണമണി വലതു ഭാഗത്തേയ്ക്ക് പത്ത് തവണ വൃത്താകൃതിയിൽ ചലിപ്പിക്കുക. കുറച്ച് സെക്കന്റുകൾ കണ്ണിന് വിശ്രമം നൽകിയ ശേഷം ഇടത് ഭാഗത്തേക്കും ഇത് പോലെ തന്നെ ചെയ്യുക.

2. കണ്ണ് ചിമ്മൽ: ഒരുപാട് നേരം കമ്പ്യൂട്ടറിൽ നോക്കിയിരിക്കുമ്പോൾ കണ്ണുകളിലെ ജലാംശം നഷ്ടപ്പെട്ട കണ്ണുകൾക്ക് വരൾച്ച അനുഭവപ്പെടാം. ഇങ്ങനെ ഉണ്ടാകുമ്പോൾ കണ്ണുകൾ ഇടക്കിടക്ക് ചിമ്മുന്നത് നന്നായിരിക്കും.

3. ദൃഷ്ടി ഉറപ്പിക്കാൻ: ഒരു പേനയോ പെൻസിലോ കയ്യിൽ നീട്ടിപ്പിടിക്കുക. ദൃഷ്ടി ഈ വസ്തുവിന്റെ മുകൾഭാഗത്തേയ്ക്ക് കേന്ദ്രീകരിക്കുക. പതുക്കെ ഈ വസ്തു മുകളിലേയ്ക്കും താഴേയ്ക്കും വശങ്ങളിലേക്കും ചലിപ്പിക്കുക. ഈ വസ്തു ചലിപ്പിക്കുമ്പോൾ മുകൾഭാഗത്ത് കേന്ദ്രീകരിച്ച നിങ്ങളുടെ ദൃഷ്ടി മാറാതെ നോക്കുക. ഇങ്ങനെ പത്ത് തവണ ചെയ്യാം.

അകലെയുള്ള ഒരു വസ്തുവിനെ നോക്കുക. അത് എന്തുമാകാം. ഭിത്തി പതിപ്പിച്ചിട്ടുള്ള എന്തെങ്കിലും വസ്തുവോ സ്വിച്ച് ബോർഡോ അങ്ങനെ ഏതെങ്കിലും ഒരു വസ്തുവിലേയ്ക്ക് നോക്കുക. ശേഷം മൂക്കിന്റെ അഗ്രഭാഗത്തേയ്ക്ക് നോക്കാം. ഈ വ്യായാമം അഞ്ച് മുതൽ പത്ത് തവണ വരെ ആവർത്തിക്കാം.

4. ഉള്ളംകയ്യിലെ ചൂട് കണ്ണുകൾക്ക്: കൈകൾ കൂട്ടിയോജിപ്പിച്ച് തിരുമ്മി ചൂടാക്കിയ ശേഷം ഉള്ളംകൈയിലെ ചൂട് കണ്ണുകളിൽ വെച്ച് കൊടുക്കുന്നതും കണ്ണുകളുടെ ആരോഗ്യത്തിനു നല്ലതാണ്.

5. പേശികൾക്ക് ആയാസം നൽകാൻ: നിങ്ങളിരിക്കുന്ന മുറിയിലെ ജനലിലൂടെ പുറത്തേയ്ക്ക് നോക്കി കാണുന്ന ഓരോ വസ്തുവിലും അൽപനേരം ശ്രദ്ധ കേന്ദ്രീകരിക്കുക. രണ്ട് മുതൽ അഞ്ച് മിനിട്ട് വരെ ഇങ്ങനെ ചെയ്യാം. ഇത് കണ്ണിന്റെ പേശികൾക്ക് കൂടുതൽ വഴക്കം നൽകാൻ സഹായിക്കും.

6. കണ്ണുകൾ അടച്ച് തുറക്കുന്നത്: ഏകദേശം അഞ്ച് സെക്കന്റുകൾ എങ്കിലും കണ്ണുകൾ മുറുക്കെ അടച്ച് പിടിക്കുക. അതിനു ശേഷം അത്ര സമയം തന്നെ കണ്ണുകൾ തുറന്ന് പിടിക്കുക. ഇത് അഞ്ച് പ്രാവശ്യം ചെയ്യാം. കണ്ണിന് നൽകുന്ന ഓരോ വ്യായാമം കഴിഞ്ഞും കണ്ണുകൾ കുറച്ച് സമയം അടച്ച് പിടിക്കാൻ ശ്രദ്ധിക്കണം.