മയക്കുമരുന്നിന് അടിമയായി ജനിച്ച കുഞ്ഞ് തിരികെ ജീവിതത്തിലേക്ക്

ജനനത്തിലേ മയക്കുമരുന്നിന് അടിമയായ കുഞ്ഞ് പ്രതികൂല സാഹചര്യങ്ങളെ തരണംചെയ്‍ത് തിരികെ ജീവിതത്തിലേക്ക്. അമേരിക്കയിലെ വെസ്‍റ്റ് വിര്‍ജീനിയ സ്വദേശികളായ റെയ്‍ച്ചല്‍ കിന്‍റേഴ്‍സ്, ഡിലന്‍ ഹിക്കി എന്നിവരുടെ മകനായ കൈറി ഹിക്കിയാണ് തന്‍റെ അമ്മയുടെ ജീവിതരീതിയിലെ പ്രശ്‍നങ്ങള്‍മൂലം മയക്കുമരുന്നിന്‍റെ അടിമയായി ജനിച്ചത്.

പത്ത് വര്‍ഷത്തോളമായി പതിവായി മയക്കുമരുന്ന് ഉപയോഗിച്ചിരുന്ന റെയ്‍ച്ചല്‍ കഴിഞ്ഞ വര്‍ഷമാണ് മയക്കുമരുന്ന് ഉപയോഗത്തില്‍നിന്ന് മുക്തി നേടി തന്‍റെ ബാല്യകാല സുഹൃത്തായ ഡിലനെ വിവാഹം ചെയ്‍തത്. റെയ്‍ച്ചലിനെപ്പോലെ ലഹരിയില്‍നിന്ന് മുക്തി നേടിയ വ്യക്തിയായിരുന്നു ഡിലനും.

കഴിഞ്ഞ ക്രിസ്‍മസിനു മുന്‍പായാണ് ഇരുവര്‍ക്കും കുഞ്ഞ് ജനിക്കുന്നത്. ജനിച്ച് മൂന്നുദിവസത്തിനുള്ളില്‍ നിയോനാറ്റല്‍ ആബ്‍സ്റ്റിനന്‍സ് സിന്‍ഡ്രോം എന്ന രോഗത്തിന്‍റെ ലക്ഷണങ്ങള്‍ കുഞ്ഞു കൈറി പ്രകടിപ്പിച്ചുതുടങ്ങി. ഗര്‍ഭാവസ്ഥയിലിരിക്കുന്ന സമയത്ത് അമിതമായി മയക്കുമരുന്ന് ശരീരത്തിലേക്ക് വരുന്ന കുഞ്ഞുങ്ങള്‍ക്ക് ഉണ്ടാകുന്ന രോഗമാണിത്. ഇതില്‍നിന്നുള്ള മോചനമാകട്ടെ അതീവ സങ്കീര്‍ണവും.

മയക്കുമരുന്നിന് അടിമകളായിരുന്ന മാതാപിതാക്കള്‍ക്കും അവരുടെ കുഞ്ഞുങ്ങള്‍ക്കുമായുള്ള ലിലീസ് പ്ലേസ് എന്ന രോഗമുക്തി കേന്ദ്രത്തില്‍ പിന്നീട് മാസങ്ങള്‍ നീണ്ട ചികിത്സയ്ക്കുശേഷമാണ് കുഞ്ഞ് കൈറി ഇപ്പോള്‍ ജീവിതത്തിലേക്ക് തിരിച്ചുവന്നിരിക്കുന്നത്. ഇപ്പോളും രോഗം പൂര്‍ണമായും ഭേദമായിട്ടില്ലാത്തതിനാല്‍ ചില അസ്വസ്ഥതകള്‍ പ്രകടമാക്കാറുണ്ട് കൈറി. ആ സമയത്ത് അവന്‍റെ ശ്രദ്ധ മാറ്റാനുള്ളതുള്‍പ്പെടെ വിവിധ കാര്യങ്ങള്‍ക്കുള്ള പരിശീലനവും മാതാപിതാക്കളായ റെയ്‍ച്ചലും ഡിലനും ചികിത്സാകാലയളവില്‍ നേടിക്കഴിഞ്ഞു.

Baby born addicted to drugs recovers

Kyrie Hickey, was born with signs of neonatal abstinence syndrome (NAS) — a clutch of problems that occur when a baby has been exposed in the womb to opioids.