ആപ്പ്ജില്ല

എന്നും രാത്രി ഭക്ഷണം വൈകി കഴിച്ചാല്‍ സംഭവിയ്ക്കുക...

സ്ഥിരം അത്താഴം വൈകിക്കഴിയ്ക്കുന്നവരുണ്ട്. ഇത് നല്ല ശീലമല്ല. വൈകി അത്താഴം കഴിച്ചാല്‍ സംഭവിയ്ക്കുന്ന കാര്യങ്ങള്‍ പലതാണ്, ഇതെക്കുറിച്ചറിയൂ.

Authored byസരിത പിവി | Samayam Malayalam 5 Mar 2023, 8:01 pm
നാം ഭക്ഷണം കഴിയ്ക്കുന്നത് ആരോഗ്യത്തിനും ഊര്‍ജത്തിനും വേണ്ടിയതാണ്. എന്നാല്‍ ചിലപ്പോഴെങ്കിലും ഭക്ഷണം കഴിയ്ക്കുന്ന രീതി ഭക്ഷണം കഴിയ്ക്കുന്നതിന്റെ ഉദ്ദേശ്യത്തെ തന്നെ മാറ്റി മറിയ്ക്കുന്നു. ഭക്ഷണം കഴിയ്ക്കുന്ന അളവും രീതിയും സമയവും കഴിയ്ക്കുന്ന ഭക്ഷണവും എല്ലാം തന്നെ പ്രധാനമാണ്. മാത്രമല്ല, വൈകി രാത്രി ഭക്ഷണം കഴിയ്ക്കുന്നത് വരുത്തുന്ന പല പ്രശ്‌നങ്ങളുമുണ്ട്. തടി കൂടുന്നതും വയര്‍ കൂട്ടുന്നതുമുള്‍പ്പെടെ പല ആരോഗ്യ പ്രശ്‌നങ്ങള്‍ക്കും ഇത് കാരണമാകും.
Samayam Malayalam do you have the habit of eating dinner late
എന്നും രാത്രി ഭക്ഷണം വൈകി കഴിച്ചാല്‍ സംഭവിയ്ക്കുക...



​അലര്‍ജി

അലര്‍ജി, ശ്വാസം മുട്ടല്‍, നീരിളക്കം എന്നിവ അനുഭവപ്പെടുന്നവരുണ്ട്. പ്രത്യേകിച്ചും രാത്രി സമയത്ത്. ഇത്തരക്കാര്‍ രാത്രി ചെയ്യാവുന്ന ഒന്നുണ്ട്. രാത്രിയിലെ ധാന്യങ്ങള്‍ രണ്ടാഴ്ച ഒഴിവാക്കി നോക്കൂ. അതായത് ചോറോ ചപ്പാത്തിയോ ഒന്നും തന്നെ വേണ്ട. പിന്നെ എന്തു കഴിയ്ക്കുമെന്നാണെങ്കില്‍, പച്ചക്കറികള്‍ വേവിച്ചതോ മുട്ട, മീന്‍, ഇറച്ചി എന്നിവ ആരോഗ്യകരമായ രീതിയില്‍ പാകം ചെയ്തതോ കഴിയ്ക്കാം. അതായത് ഇവ എണ്ണ ചേര്‍ത്ത രീതിയാകരുത്. മുട്ട പുഴുങ്ങിയത്, സ്‌ക്രാംബിള്‍ ചെയ്തത് കഴിയ്ക്കാം. പച്ചക്കറികള്‍ അല്‍പം നെയ്യ് ചേര്‍ത്ത് വഴറ്റി കഴിയ്ക്കാം. മീന്‍, ചിക്കന്‍ കഷ്ണങ്ങള്‍ കറി വച്ചത് കഴിയ്ക്കാം. ഇതെല്ലാം രാത്രി ഭക്ഷണമാക്കാം.

സമയവും

മാത്രമല്ല, ഇത് കഴിയ്‌ക്കേണ്ട സമയവും പ്രധാനമാണ്. ഇന്നത്തെ കാലത്ത് വൈകി അത്താഴമാണ് പലരുടേയും ശീലം. ജോലിത്തിരക്കും ടിവി പോലുള്ളവയുടെ നീണ്ട ഉപയോഗവുമെല്ലാം തന്നെ ഇതിന് കാരണമാകും. വൈകിയുള്ള അത്താഴം ഒഴിവാക്കുക. ഇത് രാത്രി എഴിന് മുന്‍പായി കഴിയ്ക്കുക. കഴിവതും സൂര്യാസ്തമയത്തിന് മുന്‍പായി. ഇത് ദഹനത്തെ സഹായിക്കും. മുകളില്‍ പറഞ്ഞ അലര്‍ജി പോലുള്ള പല പ്രശ്‌നങ്ങള്‍ക്കും പരിഹാരമാകും. രാവിലെ ഉണര്‍ന്നെഴുന്നേല്‍ക്കുമ്പോള്‍ അമിതമായ ക്ഷീണം തോന്നില്ല. പ്രമേഹം, കൊളസ്‌ട്രോള്‍ പോലുള്ള പല രോഗങ്ങളേയും പരിഹരിയ്ക്കാന്‍ ഏറ്റവും നല്ലതാണ് നേരത്തെയുള്ള അത്താഴം.

​നേരത്തെയുള്ള അത്താഴം

നേരത്തെയുള്ള അത്താഴം നല്‍കുന്ന മറ്റൊരു ഗുണം തടിയും വയറും കുറയ്ക്കുമെന്നതാണ്. അത്താഴം വൈകി കഴിയ്ക്കുമ്പോള്‍ ശരീരത്തിലെ അപചയ പ്രക്രിയ നേരാംവണ്ണം നടക്കുന്നില്ല. ശരീരത്തില്‍ കൊഴുപ്പ് അടിഞ്ഞു കൂടുന്നു. പ്രത്യേകിച്ചും വയര്‍ ഭാഗത്ത്. ഇത് ആരോഗ്യപരമായ പല പ്രശ്‌നങ്ങളും ഉണ്ടാക്കും. ദഹനം മെല്ലെയാകും. ഇത് വയറിന് ഗ്യാസ്, അസിഡിറ്റി പോലുളള അസ്വസ്ഥതകളും ഉണ്ടാക്കും. ഉറക്കം ശരിയാകില്ല. ഇത്തരം പല പ്രശ്‌നങ്ങള്‍ക്കുമുള്ള പരിഹാരമാണ് നേരത്തെയുള്ള അത്താഴമെന്നത്. ഉറങ്ങുന്നതിന് രണ്ടു മൂന്ന് മണിക്കൂര്‍ മുന്‍പായി അത്താഴമെന്നത് പ്രധാനമാണ്.

കഴിയ്ക്കുന്ന ഭക്ഷണത്തിന്റെ കാര്യത്തിലും

കഴിയ്ക്കുന്ന ഭക്ഷണത്തിന്റെ കാര്യത്തിലും രാത്രി ശ്രദ്ധ വയ്ക്കുക. അളവും പ്രധാനം. അര വയര്‍ അത്താഴമെന്ന ചൊല്ലിന് ഇവിടെ പ്രസക്തിയുണ്ട്. സൂപ്പ് പോലുള്ളവയായാലും മതിയാകും. ലഘുവായ ഭക്ഷണമെന്നത് പ്രധാനം. ഇത് അളവിലും കുറയ്ക്കുക. വറവു ഭക്ഷണങ്ങളോ അധികം കൊഴുപ്പുണ്ടാക്കുന്ന തരത്തില്‍ പാകം ചെയ്തവയോ കൊഴുപ്പുള്ളവയോ കഴിയ്ക്കരുത്. ഭക്ഷണം കഴിഞ്ഞാല്‍ അല്‍പം നടപ്പ് ശീലമാക്കാം. ഇത് ദഹനത്തിനും നല്ലതാണ്. സൂപ്പോ സാലഡോ പോലുളളവ ഏറെ നല്ലതാണ്.

ഓതറിനെ കുറിച്ച്
സരിത പിവി
ജേര്‍ണലിസം രംഗത്ത് 17 വര്‍ഷങ്ങളിലേറെ പരിചയ സമ്പത്ത്. പ്രിന്റ് മീഡിയായില്‍ തുടങ്ങി ഡിജിറ്റല്‍ മീഡിയയില്‍ സജീവം. വാര്‍ത്താ, ലൈഫ്‌സ്റ്റൈല്‍ മേഖലകളില്‍ കൂടുതല്‍ പരിചയം. വായനക്കാര്‍ക്ക് താല്‍പര്യമുള്ള മേഖലകള്‍ കണ്ടെത്തി ലളിതമായ രീതിയില്‍ അവതരിപ്പിയ്ക്കാന്‍ വൈദഗ്ധ്യം.വായനയും എഴുത്തും താല്‍പര്യം.സമകാലീന വിഷയങ്ങള്‍ അടിസ്്ഥാനമാക്കി ലേഖനങ്ങള്‍ എഴുതുന്നതില്‍ പ്രത്യേക ശ്രദ്ധ. എഴുത്തിന് പുറമേ വായന, മ്യൂസിക് എന്നിവയോട് കൂടുതല്‍ താല്‍പര്യം.... കൂടുതൽ

ആര്‍ട്ടിക്കിള്‍ ഷോ

ട്രെൻഡിങ്