കൊവിഡ്-19 എന്ന മഹാമാരിയുടെ വ്യാപനത്തിന് ശേഷം ലോകം ഒന്ന് നിവർന്ന് നിൽക്കുവാനായി പാടുപെടുന്നതിനിടയിൽ, ഭാവിയിലേക്കുള്ള വഴി സ്വീകരിക്കുന്നതിന് മനുഷ്യവർഗം ഇപ്പോഴേ ഒരുങ്ങുകയാണ്. നമ്മുടെ ആരോഗ്യം, പരിസ്ഥിതി, ആരോഗ്യകരമായ ജീവിതരീതി എന്നിവയിൽ ശ്രദ്ധ കേന്ദ്രീകരിക്കേണ്ടത് എത്രത്തോളം പ്രധാനമാണ് എന്ന കാര്യം അംഗീകരിക്കുന്നതിൽ പണ്ടത്തേക്കാൾ കൂടുതൽ ബോധവാന്മാരാണ് നമ്മൾ ഇപ്പോൾ. വെൽനസ് വിദഗ്ധനും സംരംഭകനുമായ ലൂക്ക് കുട്ടീന്യോ നിർദ്ദേശിക്കുന്നത് ഇതാണ്: പ്രകൃതിയുമായി യോജിച്ച് പ്രവർത്തിക്കുവാൻ നമ്മൾ പഠിക്കേണ്ടതുണ്ട്, ഇതാണ് ആരോഗ്യകരമായ ജീവിതത്തിനായി മുന്നോട്ടുള്ള ഏക വഴി. ഭൂമിയിലെ ജീവജാലങ്ങളുടെ ശാരീരിക പ്രക്രിയകളിൽ ഏകദേശം 24 മണിക്കൂർ ദൈർഘ്യമുള്ള ചക്രമാണ് സർക്കേഡിയൻ റിഥം അഥവാ ജൈവഘടികാരം. ഇതിനെ ആശ്രയിച്ചാണ് നമ്മുടെ ദൈനംദിന പ്രവർത്തനങ്ങൾ നാം തീരുമാനിക്കുന്നത്.
“പ്രകൃതിയുടെ പ്രവർത്തനങ്ങൾ മുന്നോട്ട് പോകുന്നത് ജൈവഘടികാരം അനുസരിച്ചാണ്. ഞാൻ അതിനെ ‘പുതിയ ജീവിതരീതി’ എന്ന് വിളിക്കുന്നു. എന്നാൽ അത് യഥാർത്ഥത്തിൽ പുതിയതല്ലെങ്കിലും, മനുഷ്യർക്ക് അതിൽ നിന്ന് ഇപ്പോൾ സാവധാനം ബന്ധം നഷ്ടപ്പെട്ടിരിക്കുന്ന അവസ്ഥയാണ്. സിർകാഡിയൻ റിഥം അഥവാ ജൈവഘടികാരം അനുസരിച്ച് നമ്മുടെ പ്രവർത്തനങ്ങളെ നാം കൃത്യമായ സമയത്തിന് അനുസരിച്ച് സജ്ജമാക്കിയാൽ, അത് നമ്മുടെ ആരോഗ്യം പുനഃസ്ഥാപിക്കാനും ശരീരത്തിന്റെ ആരോഗ്യം വീണ്ടെടുക്കാനും വലിയ രീതിയിൽ ഉണർവേകുവാനും സഹായിക്കുമെന്ന് ഞാൻ കരുതുന്നു,” അദ്ദേഹം വിശദീകരിക്കുന്നു.
നിങ്ങൾക്ക് ഇപ്പോഴും പുറത്ത് പോയി നിങ്ങൾക്ക് ആവശ്യമുള്ളത് കഴിക്കാൻ സാധിക്കും, എന്നാൽ ഈ ശീലം ആരോഗ്യകരമാണോ എന്ന് ചിന്തിക്കേണ്ടിയിരിക്കുന്നു, 39-കാരനായ ഈ ആരോഗ്യ വിദഗ്ദ്ധൻ പറയുന്നു. “ഇത് എങ്ങനെ പ്രവർത്തിക്കുന്നുവെന്ന് മനസിലാക്കുകയും അതിനനുസരിച്ച് നിങ്ങളുടെ മനസ്സ് മാറ്റുകയും ചെയ്യുക എന്നതാണ് നമ്മൾ ചെയ്യേണ്ടത്. കാലം മാറിയിരിക്കാം, പക്ഷേ നമ്മുടെ ശരീരവും അത് പ്രവർത്തിക്കുന്ന രീതിയും അതേപടി തന്നെ നിലനിൽക്കുന്നു. പ്രകൃതിയുടെ അടിസ്ഥാനങ്ങളും തത്വങ്ങൾക്കും മാറ്റം വന്നിട്ടില്ല, ഒരിക്കലും മാറുകയുമില്ല,” അദ്ദേഹം കൂട്ടിച്ചേർക്കുന്നു.
കുട്ടീന്യോയുടെ കാഴ്ച്ചപ്പാടിൽ, ജൈവഘടികാരം അനുസരിച്ച് നമ്മുടെ ഒരു ദിവസം എങ്ങനെയായിരിക്കണം പ്രവർത്തിക്കേണ്ടത് എന്നതിനെ കുറിച്ച് ഇതാ:
1. സൂര്യൻ ഉദിക്കുമ്പോൾ തന്നെ ഉണരുക.
2. ഉറക്കമുണർന്ന ഉടൻ തന്നെ ഫോണും മറ്റ് ഗാഡ്ജറ്റുകളും നോക്കുന്നത് ഒഴിവാക്കുക, പ്രകൃതിയുമായി ബന്ധപ്പെടുന്നതിന് ഈ സമയം ഉപയോഗിക്കുക, ഈ സമയത്തുള്ള സൂര്യപ്രകാശം ഏൽക്കുക, സാധ്യമായ വിധത്തിൽ പ്രകൃതിയുമായി സംവാദിക്കുക.
3. സൂര്യൻ ഉദിച്ച് കഴിയുന്നത് വരെ ഭക്ഷണം കഴിക്കുന്നത് ഒഴിവാക്കുക.
4. ഉറക്കമുണർന്ന് മൂന്ന് മണിക്കൂർ കഴിഞ്ഞാൽ മാത്രമേ കാപ്പിയോ ചായയോ കുടിക്കാവൂ.
Also read: പുളിപ്പിച്ച ഭക്ഷണങ്ങൾ കഴിച്ചാൽ ആരോഗ്യ ഗുണങ്ങൾ ഏറെ
5. എല്ലാത്തിനും ഒരു കൃത്യമായ താളം ഉണ്ടാവുന്നതിന് എല്ലാ ദിവസവും ഒരേ സമയം ഭക്ഷണം കഴിക്കുക, വ്യായാമം ചെയ്യുക, ഉറങ്ങുക, ഉണരുക.
6. പ്രഭാതഭക്ഷണത്തിനും ഉച്ചഭക്ഷണത്തിനും പരമാവധി കലോറിയും അത്താഴത്തിന് ഏറ്റവും കുറഞ്ഞ അളവിൽ കലോറിയും ഉപയോഗിക്കുക. അത്താഴം എന്നത് ആ ദിവസം കഴിക്കുന്ന ഏറ്റവും കുറവ് ഭക്ഷണമായിരിക്കണം.
7. സൂര്യാസ്തമയത്തിന് തൊട്ട് മുമ്പോ ശേഷമോ ആ ദിവസത്തിലെ അവസാന ഭക്ഷണം കഴിക്കുക, രാത്രി മുഴുവൻ ഉപവസിക്കുക, സൂര്യാസ്തമയത്തിനുശേഷം അടുത്ത ദിവസം രാവിലെ മാത്രം ഭക്ഷണം കഴിക്കുക. ഇത് വളരെ സ്വാഭാവികവും എളുപ്പത്തിലും 12 മണിക്കൂർ ഉപവാസം അനുഷ്ഠിക്കുവാൻ നിങ്ങളെ സഹായിക്കുന്നു.
Also read: ലോക്ഡൗണ് കൂട്ടിയ ഭാരം കുറയ്ക്കാന് ഈ ഭക്ഷണ രീതി
8. അത്താഴവും ഉറങ്ങുന്ന സമയവും തമ്മിൽ രണ്ട് അല്ലെങ്കിൽ മൂന്ന് മണിക്കൂർ ഇടവേള ഉണ്ടായിരിക്കണം.
9. ഉറക്കസമയത്ത് മുറിയിൽ നീല അല്ലെങ്കിൽ മറ്റ് കൃത്രിമ വെളിച്ചങ്ങൾ ഉണ്ടെങ്കിൽ, അത് അണയ്ക്കുക. അത്തരം ലൈറ്റുകൾ മെലറ്റോണിൻ സ്രവത്തെ തടയുന്നു. ഉറങ്ങുവാൻ കിടക്കുന്നതിന് കുറഞ്ഞത് ഒന്നോ രണ്ടോ മണിക്കൂർ മുമ്പെങ്കിലും ഇത് ചെയ്യണം, എത്ര നേരത്തെ ആവുന്നോ, അത്രയും നല്ലത്. ടിവി പോലുള്ള മറ്റ് വിനോദ രീതികളിൽ നിങ്ങൾക്ക് താൽപ്പര്യമുണ്ടെങ്കിൽ നിങ്ങളുടെ ദിവസം അതിനനുസരിച്ച് കൂടി ആസൂത്രണം ചെയ്യുക.
ലോക്ക്ഡൗൺ സമയത്ത് ജീവിതശൈലിയുമായി ബന്ധപ്പെട്ട് ആളുകൾ വരുത്തിയ ഏറ്റവും പ്രധാനപ്പെട്ട മാറ്റങ്ങളിലൊന്നാണിത്. ഇത് പിന്തുടർന്ന ആളുകളിൽ നിന്ന് ആയിരക്കണക്കിന് അനുകൂല അഭിപ്രായങ്ങളാണ് ഇതുവരെ ലഭിച്ചിട്ടുള്ളത് എന്ന് അദ്ദേഹം സാക്ഷ്യപ്പെടുത്തിയിരിക്കുന്നു.