ഗ്യാസ്, അസിഡിറ്റി
രാത്രി ഭക്ഷണം കഴിഞ്ഞയുടന് കിടക്കരുതെന്നതാണ് ഒന്ന്. ഇത് ഗ്യാസ്, അസിഡിറ്റി പ്രശ്നങ്ങള്ക്ക് കാരണമാകുന്ന ഒന്നാണ്. ഭക്ഷണം ദഹിയ്ക്കാനുളള സമയം നല്കണം. ഭക്ഷണം ദഹിയ്ക്കാതെ കിടക്കുന്നത് വയറിന് അസ്വസ്ഥതയുണ്ടാക്കുന്നു, തടി കൂട്ടുന്നു, ഉറക്കം തടസപ്പെടുത്തുന്നു. കിടക്കും മുന്പ് രണ്ടു മൂന്ന് മണിക്കൂര് മുന്പെങ്കിലും ഭക്ഷണം കഴിയ്ക്കുന്നതാണ് നല്ലത്. ഇതും കഴിവതും വയര് നിറച്ച് കഴിയ്ക്കാതെ അര വയറാക്കുക. ലഘു ഭക്ഷണം കഴിയ്ക്കുകയെന്നതും ശീലമാക്കുക. കിടക്കാന് പോകും മുന്പ്, അത്താഴ ശേഷം അല്പനേരം നടക്കുന്നത് നല്ലതാണ്. ഇത് ഭക്ഷണം ദഹിയ്ക്കാന് സഹായിക്കുന്നു. എന്നാല് കിടക്കും മുന്പ് കാഠിന്യമേറിയ വ്യായാമങ്ങള് ചെയ്യരുത്. ഇത് ബ്രെയിന് ഊര്ജസമ്പുഷ്ടമാകാനും ശരീരം ഉണര്ന്നിരിയ്ക്കാനും ഇടയാക്കുന്നു.
സോഷ്യല് മീഡിയായില്
കിടക്കും മുന്പ് സോഷ്യല് മീഡിയായില് പരതുന്ന ശീലം ഒഴിവാക്കുക. വാട്സാപ്പ് പോലുളളവയും അധികം ഉപയോഗിയ്ക്കരുത്. കിടക്കുന്ന നേരത്ത് ഫോണും ഇലക്ട്രോണിക് ഉപകരണങ്ങളും കഴിവതും ഉപയോഗിയ്ക്കാതിരിയ്ക്കുക. ഇതെല്ലാം നമ്മുടെ ഉറക്കത്തിന് തടസമാകുന്നവയാണ്, നമ്മുടെ ബ്രെയിനിനെ ബാധിയ്ക്കുന്നവയാണ്. ഇതു പോലെ കഴിവതും ഇത്തരം വസ്തുക്കള് ബെഡ്റൂമില് വയ്ക്കാതിരിയ്ക്കുക. പാട്ടു കേട്ട് കിടക്കുക, വായിക്കുക പോലുള്ള രീതിയില് അവലംബിയ്ക്കാം. നല്ല ഉറക്കം കിട്ടാനും മനസും തലച്ചോറും ശാന്തമാകാനും ഇത് സഹായിക്കും.
ചായ, കാപ്പി
കിടക്കും മുന്പ് ചായ, കാപ്പി ശീലങ്ങള് ഒഴിവാക്കുക. ഇത് ഉറക്കം കെടുത്തും. ഗ്യാസ്, അസിഡിറ്റി പ്രശ്നങ്ങളുണ്ടാക്കും. ഇതു പോലെ തന്നെ മദ്യപാന, പുകവലിയും ഉറങ്ങും മുന്പേ അരുത്. ഇതും ആരോഗ്യത്തിന്, ഉറക്കത്തിന് നല്ലതല്ല. മദ്യപിച്ചാല് ഉറക്കം ലഭിയ്ക്കുമെന്ന ചിന്ത പലര്ക്കുമുണ്ട്. ഇത് വാസ്തവത്തില് ഉറക്കമല്ല, മദ്യം തലച്ചോറിനെ തളര്ത്തുന്നതാണ് ചെയ്യുന്നത്. വാസ്തവത്തില് നല്ല ഉറക്കം കെടുത്തുകയാണ് മദ്യം ചെയ്യുന്നത്. ഇതു പോലെ തന്നെ കിടക്കും മുന്പ്, രാത്രിയിലും അധികം വെള്ളം കുടിയ്ക്കരുത്. ഇത് മൂത്രശങ്കയുണ്ടാക്കും. നല്ല ഉറക്കത്തിന് തടസം നില്ക്കുകയും ചെയ്യും.
വഴക്കടിയ്ക്കാതിരിയ്ക്കുക
കിടക്കും മുന്പ് പങ്കാളിയുമായി വഴക്കടിയ്ക്കാതിരിയ്ക്കുക. ഇത് അശാന്തിയുണ്ടാക്കും. നമ്മുടെ ബന്ധങ്ങളില് വിള്ളലുണ്ടാക്കും. വഴക്കുകളും പിണക്കങ്ങളും ഒരിക്കലും ബെഡ്റൂം വരെ കൊണ്ടുപോകരുതെന്ന് പൊതുവേ പറയും. നമ്മില് നെഗറ്റീവ് ഊര്ജം നിറയ്ക്കാനും ഉറക്കം കെടുത്താനും ഇത് കാരണമാകും. പങ്കാളിയുമായി മാത്രമല്ല, ആരുമായും കിടക്കും മുന്പ് പ്രത്യേകിച്ചും വഴക്കടിയ്ക്കാതിരിയ്ക്കുക.